བཀྲ་ཤིས་དཔྱིད་གསར་དུས་ཆེན་ཉིན་མོ། །
བདེ་ལེགས་བོད་ཀྱི་བཀྲ་ཤིས་ལོ་གསར། །
ཕུན་སུམ་ཚོགས་པོས་རིམ་གྱིས་ཚེས་པར། །
བཀྲ་ཤིས་བདེ་ལེགས་ལན་མང་ཞུ་རོགས། །
བསམ་དོན་ཡིད་བཞིན་འགྲུབ་པར་དཀའ་ལ། །
མི་འདོད་རྐྱེན་ངན་ཐོག་བཞིན་འབབ་ཀྱང་། །
བཀྲ་ཤིས་ལོ་གསར་ཚེས་བཟང་ཉིན་མོར། །
ལྷོད་ལྷོད་ངང་ནས་ངལ་ཞིག་གསོ་རོགས། །
དགུ་གླུད་ལྷན་དུ་འདས་དོན་བསྐྱུར་ཏེ། །
ཕུགས་འདུན་གནས་སྐབས་ཟུར་དུ་འཇོག་ལ། །
སྙིང་གཏམ་དྲོན་མོ་གླུ་རུ་ལེན་ཞོར། །
ཞིམ་པོའི་ཆང་གིས་སྐོམ་པ་སེལ་རོགས། །
བཀྲ་ཤིས་ཕྱེ་མར་ཕུད་གཏོར་གནང་གིན། །
རྟེན་འབྲེལ་ཆར་ཆུ་དུས་སུ་བབས་ཤིང་། །
ཕུན་ཚོགས་ལོ་ཕྱུགས་རྟག་ཏུ་ལེགས་ལ།
རྒྱལ་ཁམས་ཞི་བདེའི་སྨོན་འདུན་ཞུ་རོགས། །
བདུད་རྩི་སྐྱེམས་ཆང་ཕུད་གཏོར་གནང་དུས། །
ཡབ་ཡུམ་སྐུ་ཚེ་བྲག་ལས་སྲ་ཞིང་། །
ལུས་སེམས་གཉིས་ཀ་བདེ་ཞིང་སྐྱིད་པའི། །
གསོལ་བ་སྨོན་ལམ་སྙིང་ནས་འདེབས་རོགས། །
དྲིན་ཅན་ཡབ་ཡུམ་འཚོ་བཞུགས་དུས་སུ། །
བཀའ་ལ་བསྟུན་ཏེ་སྲི་ཞུ་སྒྲུབ་ལ། །
ལོ་གསར་མ་ཟད་ནམ་ཞག་རྒྱུན་དུ། །
བདེ་སྡུག་ཁམས་འདྲི་ཡང་ཡང་གནང་རོགས། །
ནང་ཚང་ལྷན་འཛོམས་གོ་སྐབས་བཟང་པོར། །
རྒན་རྒོན་བཟའ་མི་མིང་སྲིང་ལྷན་རྒྱས། །
འཆམ་མཐུན་བཀའ་མོལ་ལྷུག་པོར་གླེང་སྟེ། །
དམ་ཚིག་གཙང་མས་མཛའ་བརྩེ་སྐྱོང་རོགས། །
ཁྱིམ་མཚེས་སྤུན་ཉེ་མགྲོན་དུ་འབོད་ལ། །
ཡུལ་མི་དགའ་འཛོམས་སྐྱིད་ལ་རོལ་ཏེ། །
གླུ་བྲོ་ལ་སོགས་མངོན་མིན་རིག་གནས། །
ཉམས་པ་མེད་པར་གོང་སྤེལ་མཛད་རོགས། །
བཀྲ་ཤིས་བཞུགས་གྲལ་སྣང་བ་སྐྱིད་དུས། །
སྡེར་ཁ་དཀར་ཟས་འོ་ཞོས་བརྒྱན་ཏེ། །
ཡུལ་སྲོལ་བྱེད་སྒོས་བྱིན་གྱིས་རླབས་ནས། །
མེས་པོའི་སྲོལ་རྒྱུན་ཐུགས་ལ་འཛིན་རོགས། །
རྒན་པར་བཀུར་བསྟི་ཞབས་ཏོག་སྒྲུབ་ཅིང་། །
བྱིས་པ་བྱམས་དང་བརྩེ་བས་སྐྱོང་ལ། །
རྒན་བཀུར་གཞོན་གཅེས་ཡ་རབས་སྤྱོད་བཟང་། །
བོད་པའི་སྲོལ་བཟང་དར་སྤེལ་གནང་རོགས། །
སེམས་རྒྱུད་དྲང་ཞིང་ལས་ལ་བརྩོན་པ། །
ཁྱོ་བོར་གུས་ཤིང་བུ་ཚར་བྱམས་པ། །
ཞི་དུལ་སྤྱོད་པའི་ཁྱིམ་འཛིན་བདག་མོ། །
བདག་དང་ལྷན་དུ་སྐྱེམས་ཤིག་གསོལ་རོགས། །
མཁྱེན་དཔྱོད་ཡངས་པའི་ལས་ཞུཊ་གཞོན་ནུ། །
བློ་རིག་བཀྲ་བའི་སློབ་གཉེར་བྱིས་པ། །
མ་འོངས་ཕུགས་རེ་ཁྱེད་ཚོར་བཅོལ་བས། །
འོ་བརྒྱལ་ཆེ་སོང་ངལ་ཞིག་གསོ་རོགས། །
གླུ་དབྱངས་རྒྱ་མཚོའི་གཏིང་ཚད་ཟབ་ཅིང་། །
སྒོར་གཞས་བྲོ་ཡི་རླབས་ཕྲེང་འཁྲུག་པ། །
མེས་པོ་གོང་མའི་ཤུལ་བཞག་ནོར་བུ། །
ཉམས་ཆག་མེད་པར་རྒྱུན་འཛིན་གནང་རོཊ། །
དགུ་གླུད་བརྫངས་རྗེས་ཤོག་སྦག་སྤར་སོང་། །
སྲོལ་རྒྱུན་ཡིན་མོད་ཉེན་ཁ་ཆེ་བས། །
མེ་སྐྱོན་སྔོན་འགོག་ལེགས་པར་བསྒྲུབས་ཏེ། །
སྣོད་བཅུད་འཕྲོད་པའི་ལོ་གསར་གཏོང་རོཊ། །
འཚོ་བ་ཞེས་པའི་བསླུ་བྲིད་ཟབ་མོས། །
དལ་ཁོམ་མེད་པར་སྦྲུལ་ལོ་འདས་སོང་། །
ཤོ་སྦག་ཏག་སེའི་རྩེད་མོར་རོལ་ནས། །
ངལ་གསོའི་གུ་ཡངས་ལན་གཅིག་གནང་རོཊ། །
སྐྱིད་སྡུག་སྒང་གཤོངས་མི་ཚེའི་ལམ་བུར། །
བྱ་དངོས་ཡོད་ཚད་འགྱུར་བཞིན་མཆིས་མོད། །
ཞིམ་པོའི་ཟས་དང་ཆང་ལ་རོལ་ནས། །
རང་སེམས་རྒྱ་ཡན་ཐེངས་གཅིག་གཏོང་རོཊ། །
བྱམས་བརྩེའི་གཟི་འོད་གང་སར་འཕྲོས་ཤིང་། །
དམངས་ཕན་སྲིད་ཇུས་ཕྱོགས་བཞིར་ཁྱབ་ལ། །
དམག་དང་མུ་གེ་ནད་ཡམས་མེད་པའི། །
རྫོགས་ལྡན་གསར་པར་ལོངས་སུ་སྤྱོད་རོཊ། །
སྐྱོན་དང་ཉེས་པ་རྒྱང་དུ་དོར་ནས། །
དགེ་དང་ཡོན་ཏན་དང་དུ་བླངས་ཤིང་། །
ཤིང་མོ་སྦྲུལ་ལོར་རྫོགས་ཤད་འཐེན་ནས། །
མེ་ཕོ་རྟ་ལོར་དབུ་ཁྱུད་ཕྲིས་ཤིག །