བསོད་ནམས།

ཨ་ཁུ་ཞིང་པས་ངལ་བ་རྒྱབ་བསྐྱུར་དཔུང་པ་ས་འོག་བཅུག་པ་ཡིས། །

ཧ་ལོག་དོགས་པ་སྤུ་ཙམ་མི་དགོས་སོ་ནམ་ལས་སུ་འབུངས་པ་ཡི། །

ཧ་ལམ་ཞིང་ལ་ཐོན་འབབ་ལེགས་པའི་མཇུག་སྡོམ་རྒྱག་དང་མཚུངས་སམ་ཅི། །

ཨ་ཧོ་ལོ་གཅིག་དུས་གཅིག་ངེས་གཏན་སོ་ནམ་ལོ་གསར་དགའ་སྤྲོས་བསུས། །

ས་ཡི་གོ་ལར་དྲིན་ཅན་ཉི་མས་སྐོར་བ་ལན་གཅིག་བསྐོར་དང་ལྷན། །

ཤ་མདོག་གཟུགས་དབྱིབས་མ་གཅིག་ཀུན་གྱིས་རང་སྲོལ་ལོ་གསར་གཏོང་བའི་ཚེ། །

ལ་ཀླུང་ཁམས་གཙང་དོ་ཟླ་བྲལ་བ་ཁ་བའི་ལྗོངས་ཀྱི་ཞིང་པས་ཀྱང་། །

ར་སྐྱོར་དང་བཅས་ཁང་པའི་ཕྱི་ནང་གཙང་སྦྲས་རྟེན་འབྲེལ་ཐོག་མ་བསུས། །

ཡ་རབས་གུས་ལུགས་དར་སྲོལ་མ་ཉམས་བགྲེས་སོང་རྣམ་པར་གོས་གསར་བསྒྲོན། །

འ་ཅག་ཁྱིམ་འཛིན་སྐྱེད་མ་རྣམ་པས་གནག་སྣུམ་ཤད་མའི་ན་བཟའ་བཞེས། །

ཟ་མ་ཏོག་གི་ནང་དུ་ཉར་བའི་གསེར་གྱི་གའུ་མགུལ་དུ་དཔྱངས། །

ཞྭ་གོས་ཚོས་མདོག་བཟོ་ལྟ་སྣ་ཚོགས་ནང་མིའི་གོས་གསར་མེ་ཏོག་བཞད། །

ཝ་ལོང་ཐོས་འཛིན་བུ་གའི་རྒྱན་དུ་ཐོགས་པའི་ཁྱིམ་མཚེས་ཕ་རྒན་ཚོས། །

ཛ་དྲག་མིན་པའི་གོམ་སྟབས་ལྷིང་པོས་ཁྱིམ་མཚེས་ཕན་ཚུན་ཕྱེ་མར་བཏེགས། །

ཚ་གྲང་ནད་ཀྱི་གདུང་བ་བྲལ་བའི་སྨོན་འདུན་བཟང་པོའི་འཚམས་འདྲི་ཞུས། །

ཙ་ན་ནམ་ཡང་འགྱུར་མེད་བརྟན་པ་ཁྱིམ་མཚེས་མཐུན་པའི་དམ་བཅའ་བཞག །

མ་རྒན་རྣམ་པས་ཞལ་ལག་དང་ནི་བདུད་རྩིའི་སྟོན་མོ་གང་སར་བཤམས། །

བ་སྤུ་དག་ཀྱང་ཅིག་ཅར་འགུལ་བའི་ཞིམ་ཟས་མང་བས་འགྲམ་ཆུ་ལྡང་།

ཕ་རོལ་ཞིང་གྲོང་གང་དུ་བལྟས་ཀྱང་ཁང་བཟང་དར་ལྕོག་རྒྱན་གྱིས་མཆོར། །

པ་ཏྲའི་རིས་སོགས་དགེ་ཚོགས་འདུ་བའི་རྒྱན་རིས་དུ་མས་ཁང་བཟང་བཀང་། །

ན་གཞོན་ཕོ་མོས་ལང་ཚོའི་མཆོར་སྒེག་ཕན་ཚུན་འགྲན་བཞིན་སྙན་པའི་གླུ། །

ད་ལོ་ན་ནིང་ལས་ཀྱང་ལྷག་པའི་བདེ་སྐྱིད་ལྡན་ཞེས་བླངས་པའི་ཚེ། །

ཐ་གྲུ་ཡངས་པའི་ཞིང་དང་རི་ཤུར་ཕྱོགས་ཀུན་འཁྲུག་ཆ་དོད་གྱུར་ཅིང་། །

ཏ་ལའི་ལ་མོའི་རྩེ་ནས་བླངས་ཞེས་རྣམ་ཐར་ལྷ་མོའི་གར་དང་འགྲོགས། །

ཉ་གང་ཟླ་བའི་དཔེ་ཟླར་འཇོག་པའི་སོ་ནམ་ཞིང་གྲོང་ཕྱུག་པས་ན། །

ཇ་མར་ཤ་ཆང་འདོད་རྒུས་མྱོས་འདི་ལོ་གསར་སྟོན་མོ་ཙམ་མིན་ཏེ། །

ཆ་ཤས་མིན་པར་ཀུན་གྱི་ངག་ནས་དུས་བབ་བཟང་པོའི་དྲིན་ཡིན་ཞེས། །

ཅ་ཅོའི་དགའ་འབོད་ཤིས་ཚིག་དབྱངས་ལྡན་གླིང་ལྔ་མཚོ་བཞིར་ཁྱབ་པར་གྱུར། །

ང་རང་ལྟེ་ཁྲག་འཕོ་བའི་གནས་མཆོག་སོ་ནམ་ཞིང་གྲོང་ད་ལྟའི་ཆར། །

ག་ནས་བསམས་ཀྱང་ཐོག་བརྩེཊ་མང་བའི་གྲོང་ཁྱེར་ལས་ཀྱང་སྐྱིད་དུས་འདིར། །

ཁ་བཏཊ་དཀར་གཙང་ལེགས་ཚོཊ་ཀུན་འདུ་ལག་ཟུང་གཉིས་པོས་དགུང་དུ་འཕྱར། །

ཀ་རྩོམ་རྨད་བྱུང་གར་ལ་རོལ་ཏེ་དགུང་གསར་ཐུགས་སྤྲོ་སྐྱིད་པར་སྨོན། །