ཆབ་མཛེས་དུང་།

ཁ་བ་གངས་ཀྱི་རི་བོ་བརྗིད་པའི་འདབས། །

ཧི་མ་ལ་ཡི་མཚར་སྡུག་འཕྲོག་པའི་ཞིང་། །

མཛེས་ལྡན་སཱ་ལ་ཀཱ་ཡི་མདངས་འཛིན་མ། །

ཨ་ཅེ་འབྲོག་མོ་ས་མཐོའི་མེ་ཏོག་ཡིན། །

འཛུམ་པའི་ཚེམས་ཀྱི་སྲུབས་ཀ་རེ་རེ་ནས། །

དགོད་པའི་བཞིན་གྱི་མུ་ཏིག་ཟིལ་པ་འཐོར། །

དབྱར་སྐྱེས་ཆུ་འཛིན་གསར་པའི་ལང་ཚོ་ཡིས། །

གྲགས་སྐར་བུ་མོའི་ཚོགས་ལ་ཅོ་འདྲི་བྱེད། །

དུས་བཞིའི་འགྱུར་བའི་ཚེགས་ཀྱིས་མ་མནར་ཞིང་། །

ནོར་ནག་སྐྱོང་བའི་ཁུར་གྱིས་མ་དུད་པར། །

འཚར་ལོངས་གོ་རིམ་དྲི་མས་མ་སྦགས་པའི། །

ས་མཐོའི་འབྲོག་མོའི་གཤིས་ཀ་དྭངས་ཤིང་གཙང་། །

གནག་སྣུམ་མགོ་སྐྱེས་གཡོ་བའི་ལན་བུའི་འོག །

སྤྱན་རིས་ཟླ་དཀར་འོ་མའི་མཚོ་མོ་འཁྱིལ། །

མཁུར་ཚོས་བྱུ་རུའི་མདངས་ཀྱིས་རབ་སྤུད་ཅིང་། །

སྦྲང་རྩིའི་རྒྱལ་མཚན་འཛུམ་པའི་མེ་ཏོག་འབུས། །

འཁྱོག་ཟུར་མིག་གི་འཕྱང་འཕྲུལ་མ་སྟོན་ཞིང་། །

ལུས་ཕྲའི་མཉེན་ལྕུག་ཡལ་ག་མ་སྒུལ་ཡང་། །

གཤིས་འཇམ་ཟེཊ་མ་བབས་པའི་འོད་དཀར་གྱིས། །

གཞན་ཡིད་གཙང་པོའི་མཛེས་སྡུག་དུད་པར་བྱེད། །

སྤྲིན་དཀར་ལང་ལོང་ལྡིང་བའི་མར་ཤོད་ན། །

ཤང་ཤང་ཆུ་བོ་བཞུར་བའི་འདབས་ཤིག་ན། །

སྔོ་ལྗང་ནེའུ་གསེང་གཡུ་ཡི་མཎྜལ་དཀྱིལ། །

ཨ་ཅེ་འབྲོག་མོ་མཚར་སྡུག་མེ་ཏོག་ཅིག །

མེ་ཏོག་སྡུག་གུའི་མགོ་ལྕོག་ལྡེམ་པའི་ཡུལ། །

མཐོན་པོ་བྲག་དཀར་གནམ་ལ་སྙེག་འདྲའི་ཞོལ། །

དབྱར་དགུན་སྐྱིད་སྡུག་གངས་ལ་བྲིས་དང་ལྷན། །

ལང་ཚོའི་མེ་ཏོག་གངས་རིའི་པང་དུ་བཏབ། །