སྨྱུག་ཞེན།
སྤྲིན་ནག་དང་ནི་རྡུལ་གྱིས་མ་བསླད་པའི། །
དྭངས་གསལ་ཤེལ་གྱི་མེ་ལོང་མཚུངས་པ་ཡི། །
མཐའ་ཀླས་ལྷ་ལམ་ཡངས་པོའི་བཞིན་རས་ངོར། །
འོད་ཟེར་ལམ་ལམ་མཆེད་པའི་རྟ་བདུན་པ། །
རི་རྩེ་བརྒྱུད་ནས་དལ་གྱིས་ཕེབས་པའི་དུས། །
སྣང་བའི་རྦ་རླབས་འཕྱོ་བཞིན་ག་ལེར་བྱོན། །
མཐོ་བརྗིད་རི་བོ་མཛེས་པའི་འདབས་ཟུར་ན། །
སྦྲ་ནག་རོག་རོག་ཕུབ་པའི་འབྲོག་གི་གཞིར། །
ཞོགས་པའི་མཚམས་སྤྲིན་ལྷན་དུ་འཕྱོ་བ་ཡི། །
སྔོ་མདོག་དུ་སྨུག་ལང་ལོང་མཁའ་རུ་འཁྱིལ། །
ནོར་ནག་བཞོན་མའི་ངུར་སྒྲ་ལྷས་ལ་འཁོར། །
ལྷས་རའི་བུ་མོས་བཞོ་དབྱངས་ངག་ལ་གྱེར། །
མཐའ་བྲལ་ལྷ་ཡི་རྫིང་རིང་ཡངས་པོའི་ངོས། །
སྤྲིན་དཀར་ལང་ལོང་ཐོལ་གྱིས་གཡོ་བ་ཡིས། །
གཡུ་འབྲུག་སྔོན་མོས་ངར་སྒྲ་ཧད་ཀྱིས་སྒྲོག །
ཆར་གྱི་ཟེགས་མ་ཟིམ་ཟིམ་ཕྱོགས་སུ་འཐོར། །
སྤང་ལྗོངས་ཁྲ་ཚོམ་མེ་ཏོག་འདབ་བརྒྱ་གྲོལ། །
ཕྱེ་ལེབ་དང་ནི་རྐང་དྲུག་གར་ལ་རོལ། །
ལྷུན་སྟུག་ནགས་ཀླུང་ཕྱུག་མོའི་པང་ཁ་རུ། །
འཚོ་བའི་མེ་ཏོག་གསོ་བའི་རི་དྭགས་ཚོགས། །
སྙན་པའི་སྐད་ངག་འབྱིན་པའི་བྱ་བྱེའུ་སོགས། །
བགས་ཀྱིས་རྒྱུ་ཞིང་སྙན་པར་གྲགས་པ་ཡིས། །
སེམས་ཀྱི་སྨོན་པ་ངང་གིས་འཆོར་བས་ཀྱང་། །
དབྱར་གྱི་ལྗོངས་ཆེན་བསྟོད་པའི་གཞི་རུ་བྱ། །
སྔོ་ལྗང་གཡུ་འདབ་རྒོད་པའི་སྐྱེད་མོས་ཚལ། །
ཡིད་འོང་མེ་ཏོག་དཀར་སེར་ཐགས་སུ་བཀྲ། །
ཞིམ་མངར་བཅུད་ཀྱི་དྲི་ངད་ཕྱོགས་བཞིར་འཐུལ། །
དེའི་ཚེ་བདེ་དགའི་དཔལ་ལ་ལོངས་སྤྱོད་པའི། །
བུང་བ་གཞོན་ནུ་དགའ་བས་མྱོས་བྱས་པས། །
སྙན་པའི་གཤོག་གླུ་ལེན་གྱིན་འཕུར་མ་ལྡིང་། །
ནམ་མཁའ་ལ་ནི་འཇའ་ཚོན་རྣམ་པར་བཀྲ། །
འཛིན་མའི་ངོས་སུ་རྩི་ཤིང་རྣམ་པར་བཞད། །
ཆར་གྱིས་བཀྲུས་པའི་འདབ་གྲོལ་མེ་ཏོག་ཚོ། །
ལང་ཚོ་ངོམ་ཞིང་མགོ་ལྕོག་ལྡེམ་ལྡེམ་གྱིས། །
མཛེས་པའི་སྤང་དུ་སྐར་མའི་ཁྲ་རྒྱན་བཞིན། །
དབྱར་གྱི་གདོང་ལ་མཛེས་པའི་ཚོན་རྩི་བྱུགས། །