ཡུལ་ཁ་བའི་ལྗོངས་ཀྱི་ལྔ་རིག་ཚལ། །
གནས་ལྷ་ཡུལ་འགྲན་པའི་སློབ་ར་ན། །
ཐུགས་མེ་ལོང་འདྲ་བའི་སློབ་ཕྲུག་ཚོའི། །
རྒྱུད་མི་ཆོས་གཙང་མས་བྱུར་བུར་གང་། །
ཁྱེད་སློབ་བུའི་ཚོགས་ལ་རྟེན་འབྲེལ་ཞུ། །
སེམས་ཞིབ་མོས་རང་འགན་ཁུར་ཏུ་བཞེས། །
ཡིད་གཙང་མས་ཤེས་རིག་བདུད་རྩི་སྤྱད། །
ཐབས་རྣལ་མས་རང་རྒྱུད་མུན་པ་སེལ། །
བློ་དག་པོས་བར་ཆད་རྡུལ་དུ་བརླགས། །
ཁྱེད་སློབ་བུའི་ཚོགས་ལ་རྟེན་འབྲེལ་ཞུ། །
སྐྱིད་རྒྱབ་ཏུ་བསྐྱུར་ཏེ་ཐོས་བསམ་སྙེག །
སྡུག་ཐོད་ལ་བླངས་ནས་སློབ་ལ་བརྩོན། །
ཕྱིའི་འབྱུང་བཞི་འཁྲུགས་ཀྱང་གཉའ་མི་ཁུམ། །
ནང་ལུས་ཟུངས་ཟད་ཀྱང་དཔའ་མི་ཞུམ། །
ཁྱེད་སློབ་བུའི་ཚོགས་ལ་རྟེན་འབྲེལ་ཞུ། །