ཀ་ར་ངན་ངོན་ཙམ་གྱིས་བློ་འཚེངས་ཤིང་། །

ཁ་ཁོག་འགལ་བའི་བྱ་བ་མི་སྒྲུབ་པ། །

ག་ནས་བསམས་ཀྱང་ན་ཆུང་བྱིས་པའི་དུས། །

ང་ཡི་སེམས་ནས་བརྗེད་ཐབས་མི་འདུག་ཨང་། །

ཅ་གའི་ནོར་ལ་འདོད་རྔམ་མི་ཆེ་ཞིང་། །

ཆ་ལུགས་རྫུན་མའི་གར་ཡང་མི་འཁྲབ་པ། །

ཇ་ཡུན་ཙམ་ཡང་སེམས་ཁྲལ་མེད་པའི་ངང་། །

ཉ་གང་ཟླ་བ་བཞིན་དུ་འཛུམ་མདངས་རྒྱས། །

ཏ་ལེན་ཁུར་གྱིས་ལུས་སེམས་མ་དུད་ཅིང་། །

ཐ་མའི་རིགས་ལ་ངན་མཚང་མི་བརྗོད་པ། །

ད་ནས་བཟུང་ཞེས་སྟོང་བསམ་སྒོམ་མི་བྱེད། །

ན་ཐང་ཡིན་ཡང་སྤྲོ་དགའི་གནས་སུ་སྒྱུར། །

པ་ཝ་སངས་ལྟར་ལྷག་བསམ་དཀར་བ་དང་། །

ཕ་མ་གཅེན་གཅུང་གཡོ་སྒྱུའི་ལས་མི་སྒྲུབ། །

བ་བེའུ་འཚོ་ལུགས་ཙམ་ཡང་མི་ཤེས་ཀྱང་། །

མ་ཤེས་ཤེས་མདོག་ནམ་ཡང་སྟོན་མི་བྱེད། །

ཙ་རི་ལ་སོགས་འཁྱམ་ལ་མི་དགའ་ཞིང་། །

ཚ་གྲང་དམྱལ་བའི་གནས་ལ་མི་དོགས་པ། །

ཛ་ལང་སྤྱོད་པས་རང་གཞན་མི་ཕུང་བར། །

ཝ་མོ་བཞིན་དུ་ཞི་ཞིང་དུལ་བར་གནས། །

ཞ་ལག་ཚང་ཞེས་ཕོ་བསྟོད་མི་བྱེད་ཅིང་། །

ཟ་མ་མོ་ཞེས་ཁྱད་དུ་མི་གསོད་པ། །

འ་ཅག་ཁྱེད་ཅག་ཕྱོགས་རིས་མི་བྱེད་པར། །

ཡ་ག་མེད་པའི་སྲོང་གཏམ་ཀུན་ལ་བརྗོད། །

ར་རོ་བཞིན་དུ་ཆང་བཟི་མི་བྱེད་ཅིང་། །

ལ་ལུང་ཉུལ་ནས་རུ་སྡེ་མི་དཀྲུགས་པ། །

ཤ་རུས་གཅིག་པའི་ལ་རྒྱ་མི་ཤེས་ཀྱང་། །

ས་ཕྱོགས་གྲུབ་མཐའ་བཟང་ངན་རྩོད་མ་ཡིན། །

ཧ་ལས་མཁས་པའི་ཡོན་ཏན་མ་སྨིན་ཞིང་། །

ཨ་དོན་འབྱོངས་པའི་གྲུབ་རྟགས་མི་ལྡན་པ། །

ཧ་ཧ་དགོད་སྒྲ་གཅིག་པུས་འཚོ་བ་ཡི། །

ཨ་ཉོག་འདི་ཚོར་དངོས་གནས་སྐྱིད་ཅིག་ཡོད། །