ཞོགས་ཉི་ཟེར་མཁའ་རུ་ཤར་དུས་ལ། །
དྲིན་དགེ་རྒན་ཐུགས་བརྩེ་འོད་ལས་གསལ། །
བློ་མུན་པའི་དགྲ་ལ་འོད་སྣང་སྤར། །
འཁོར་སློབ་མའི་རྒྱུད་ལ་ཡོན་ཏན་འཕོས། །
དྲིན་དགེ་རྒན་ཚེ་གཅིག་ཕ་མ་ཡིན། །
དབྱངས་གསལ་བྱེད་སོ་བཞིའི་ལམ་བྲོ་བསྩལ། །
ནང་ཀུན་སྤྱོད་ཡ་རབས་ཕྱོགས་ལ་དྲངས། །
ཕྱི་བྱ་སྤྱོད་གཅུན་ལ་ཁྱེད་ཉིད་མཁས། །
གནམ་སྔོན་པོ་མུ་མཐའ་བྲལ་ན་ཡང་། །
དྲིན་དགེ་རྒན་ལྷག་བསམ་དེ་ལས་བརྒལ། །
བློ་རྣམ་དཔྱོད་མཁྱེན་རྒྱ་དེ་ལས་ཡངས། །
བྱམས་བརྩེ་བ་གནམ་གྱིས་བསྒྲུན་དུ་མེད། །
དྲིན་དགེ་རྒན་མཁའ་ཡི་ཟླ་བ་ཡིན། །
ཁྲ་ཚོམ་མེར་སྐར་ཚོགས་མཐའ་ནས་སྐྱོང་། །
དྲི་ཞིམ་པའི་ཆུ་སྐྱེས་རྒྱང་ནས་གསོས། །
བསིལ་འཇམ་འཇམ་འགྲོ་ལ་འོད་སྣང་སྦྱིན། །
དོན་ལེགས་ཚོགས་འབྱུང་གནས་དགེ་རྒན་ཉིད། །
དེར་བསྟེན་ན་བསོད་ནམས་རང་འཕེལ་ཡིན། །
རྒྱུད་ཡོན་ཏན་འབྱོར་ལ་ཐེ་ཚོམ་མེད། །
དེ་ཡིན་ཕྱིར་སྒོ་གསུམ་གུས་པས་གཏུད། །
དྲིན་དགེ་རྒན་བཀའ་དྲིན་གཟོ་བསམ་ན། །
དུས་དང་པོ་ཞལ་ལ་ལེགས་པར་ཉོན། །
དེའི་ཞོར་དུ་གདམས་ངག་རྗེས་སུ་ཟུངས། །
ཚེ་གང་ལ་བསླབ་པ་སློབ་གཉེར་གྱིས། །
དྲིན་དགེ་རྒན་ཐུགས་བརྩེ་མེ་ལས་དྲོ། །
དགུན་གྲང་ངར་འགོག་པའི་གོ་ཆ་ཡིན། །
དྲིན་དགེ་རྒན་བྱམས་སེམས་གདུཊ་ལས་བསིལ། །
དབྱར་ཚ་བ་འགོག་པའི་གཡང་རྟེན་ཡིན། །
ལར་དགེ་རྒན་མཆོག་གི་བཀའ་དྲིན་ནི། །
ལག་བྲིས་པ་ཙམ་གྱིས་གཞལ་དུ་མེད། །
ཁ་བཤད་པ་ཙམ་གྱིས་དོན་མེད་ཡིན། །
ལུས་གུས་གུས་བྱས་ཀྱང་ག་ལ་ནུས། །
དྲིན་དྲིན་དུ་མི་གོ་སྐྱེ་བོ་དེར། །
དོན་ལེགས་པར་བཤད་ཀྱང་དོན་མེད་ཡིན། །
ལམ་བཟང་པོར་ཁྲིད་ཀྱང་དགོས་མེད་ཡིན། །
རང་གཡང་ལ་ལྷུང་བའི་གཞི་མ་ཡིན། །
ལོ་འཁོར་མོ་ག་ཙམ་འདས་ན་ཡང་། །
མགོན་བཤེས་གཉེན་བཀའ་དྲིན་རྡོ་ལ་བརྐོས། །
སེམས་གངས་དཀར་དབུས་ནས་བརྗེད་མེད་རེད། །
བརྗེད་སོང་ན་དྲིན་གཟོ་མེད་ནི་ཡིན། །