བྱང་ཐང་དབེན་པའི་ཡུལ་གྱི། །
ང་ཡི་དྲིན་ཆེན་ཨ་མ། །
མི་ལོ་དུ་མའི་རིང་ལ། །
ཕྱུགས་རིགས་འཚོས་ནས་བསྡད་ཡོད། །
སྒོ་ཟོག་འཚོ་བའི་ཨ་མས། །
ཆུང་ནས་ད་ལྟའི་བར་དུ། །
ང་རང་སློབ་གྲྭའི་ཚལ་དུ། །
ཤེས་རིག་སྦྱོང་བར་མངགས་བྱུང་། །
ཁྱིམ་གྱི་འཚོ་བའི་ཁུར་པོ། །
ཨ་མས་ཕྲག་ཏུ་བཞེས་སོང་། །
བྱམས་དང་བརྩེ་བའི་མེ་ཏོག །
བུ་ཆུང་ང་ལ་གནང་བྱུང་། །
ནམ་མཁའི་ཐོ་རེངས་སྐར་ཆེན། །
གནམ་གྱི་མཐའ་ནས་མ་ཡལ། །
དྲིན་ཆེན་ཨ་མའི་དབྱངས་རྟ། །
ལྷས་རའི་ནང་ནས་ཐོས་ཡོང་། །
ཕྱུར་བ་དར་བའི་བཀའ་དྲིན། །
དར་བ་མར་གྱི་དྲིན་ཡིན། །
མར་ནི་འོ་མའི་བཀའ་དྲིན། །
ཡོད་ཚད་ཨ་མའི་དྲིན་ཡིན། །
མི་སྡུག་དྲི་ངན་ལྕི་བ། །
ཨ་མས་ཕྱག་གིས་བསྒྲུགས་ཏེ། །
ཁྱིམ་གྱི་བད་ཀ་གྲུ་བཞིར། །
ལྕི་ཕག་ལྕགས་རིས་བསྐོར་སོང་། །
ཉི་མ་ལ་ཁར་བཞུད་མཚམས། །
ནོར་གནག་ཐང་དུ་དེད་ནས། །
ཐལ་རྡུལ་དུ་བའི་ཁྲོད་དུ། །
ཕྱུགས་ཟོག་རྡང་ལ་བཏགས་སོང་། །
དབྱར་གྱི་ཆར་ཤོད་བར་དང་། །
དགུན་གྱི་ཁ་བའི་དཀྱིལ་ན། །
ལོ་ཟླ་འཁྱག་གིས་བསྡམས་རུང་། །
ཨ་མའི་བཞོ་དབྱངས་མི་ཆད། །
དྲིན་ཆེན་ཨ་མའི་དཔྲལ་བར། །
གཉེར་མའི་བང་རིམ་ཆགས་འདུག །
དཀར་དམར་ཞལ་གྱི་དཀྱིལ་འཁོར། །
དུས་ཀྱི་རླུང་བུས་བརྐུས་སོང་། །
ལྡེམ་ཞིང་འཁྱུག་པའི་སྐུ་གཟུགས། །
ལོ་ཟླའི་ཁུར་པོས་མནན་ཏེ། །
མདའ་ལྟར་འདྲོང་བའི་སྐུ་གཟུགས། །
གཞུ་བཞིན་དལ་གྱིས་གུག་སོང་། །
འཇམ་མཉེན་ཨ་མའི་ཕྱག་ཟུང་། །
གས་ནས་རྨ་ཤུལ་ཆགས་འདུག །
མེ་ཏོག་ལྟ་བུའི་ལང་ཚོ། །
ལོ་ཟླའི་རླུང་གིས་བཅོམ་སོང་། །
གསར་པར་ཨ་གསར་མེད་ཅིང་། །
རྙིང་པར་འཁྲེང་ཞེན་མེད་པའི། །
ཕྱི་ཐག་རིང་བའི་ཨ་མ། །
བུ་ངའི་ལམ་སྟོན་སྒྲོན་མེ། །
དྲིན་ཆེན་ཨ་མའི་བཀའ་དྲིན། །
རྒྱ་མཚོ་ལས་ཀྱང་ཟབ་པས། །
ཤོག་དཀར་ཡངས་མོའི་ངོས་སུ། །
བྲིས་ཀྱང་ཚར་རྒྱུ་མེད་དོ། །