དཔྱིད་འགོའི་ཁ་ཆར་འདྲེས་མ། །

ས་གཞིའི་པང་དུ་འཐོར་སོང་། །

སྔོ་ལྗང་མྱུ་གུ་འབུས་པས། །

དཔལ་ཡོན་རབ་ཏུ་རྒྱས་སོང་། །

འཇམ་མཉེན་མེ་ཏོག་འདབ་མ། །

དཀར་དམར་ཁ་དོག་མཛེས་པ། །

སྨྱུག་འཛིན་པིར་ལས་འཁྲུངས་པའི། །

སྣུམ་ཚོན་རི་མོ་འདྲ་བྱུང་། །

ལྗོན་པའི་ཡལ་གའི་རྩེ་རུ། །

བྱིའུ་ཆུང་གསུང་སྐད་ཀྱུར་ཀྱུར། །

མེ་ཏོག་ཟེའུ་འབྲུའི་དབུས་ལ། །

རྐང་དྲུག་རྩེད་འཇོར་རོལ་སོང་། །

མཛེས་སྡུག་པད་མའི་འཁྲི་ཤིང་། །

མེ་ཏོག་སྣ་བརྒྱས་བརྒྱན་འདུག །

ཟམ་ཟིམ་ཆར་དང་བསྡོངས་ནས། །

ཡིད་འོང་དཔྱིད་དཔལ་བཞད་སོང་། །

དཔྱིད་འགོའི་ནོར་འཛིན་ཕང་བར། །

མེ་ཏོག་མགོ་ལྕོག་ལྡེམ་ལྡེམ། །

སྒེག་ལྡན་ཁམ་བུའི་མེ་ཏོག །

དཔྱིད་ཀྱི་མགྲོན་དུ་ཕེབས་བྱུང་། །

ལང་ཚོའི་དཔལ་ཡོན་བཀྲ་བའི། །

མེ་ཏོག་སྐྱེད་ཚལ་འགྲིམ་དུས། །

ཁ་འབྲས་མཚར་བའི་ཆུང་འདྲིས། །

མིག་གི་ལམ་དུ་འཆར་བྱུང་། །

ཨེ་མ་དཔྱིད་འགོའི་མེ་ཏོག །

མཚར་སྡུག་གཞན་ལས་ཆེ་བ། །

མཛེས་སྡུག་དཔལ་ཡོན་འདི་འདྲ། །

དཔྱིད་ཀྱི་རྒྱན་ཆ་ཡིན་སོང་། །

དཀར་དམར་ཚོན་མདངས་ཡག་པའི། །

འབྲས་ལྡན་ཁམ་བུའི་མེ་ཏོག །

བཅུ་དྲུག་ན་ཆུང་བུ་མོའི། །

ལང་ཚོའི་འཛུམ་མདངས་འདྲ་བྱུང་། །

སྒེག་ལྡན་དཔྱིད་ཀྱི་དཔལ་ཡོན། །

མི་ཡུལ་ལོངས་སྤྱོད་འདྲ་བ། །

ཟམ་ཟིམ་ཆར་པའི་ཁྲོད་དུ། །

མེ་ཏོག་ཞལ་ཁ་ཕྱེ་སོང་། །

མ་བཏབ་མེ་ཏོག་མཛེས་པ། །

མ་བྲིས་རི་ཆུ་བརྗིད་པ། །

མ་བཞེངས་ངོ་མཚར་ཆེ་བ། །

མ་ཡུམ་གངས་ལྗོངས་ཕྱུག་མོ། །