ཀོག་ཧྥེ་ཁང་དུ་མངོན་མིན་རིག་གནས་ཤུལ་བཞག་གི་འཁྲབ་སྟོན་ལ་ལྟ་བ་དང་། སྤྱི་གླིང་ནང་རོལ་དབྱངས་སྤྲོ་ཚོགས་ཀྱི་གླུ་གཞས་ཉན་པ། གཟའ་མཇུག་ཏུ“བྲག་ཡིབ་བའི་གཟའ་མཇུག”དང་འགྲོགས་ནས་མཉམ་དུ་གྲོང་གསེབ་ཀྱི་མཛེས་ལྗོངས་ལ་རོལ་བ་བཅས་ད་ཆ་ཉིང་ཁྲི་གྲོང་ཁྱེར་བྲག་ཡིབ་ཆུས་སུ་གང་སར་རིག་གནས་ཀྱི་རྣམ་པ་ཟབ་ལ་རིག་གནས་ཡུལ་སྐོར་གྱི་ཉམས་ལེན་བྱེད་ཐབས་ཕུན་སུམ་ཚོགས་ཤིང་། སྤྱི་པའི་ཞབས་ཞུ་དོ་མི་སྙོམས་པ་དང་། རིག་གནས་གཞན་སྒྱུར་འཐུས་ཚང་མེད་པ། གྲོང་ཁྱེར་གྱི་ཁྱད་ཆོས་དེ་ཙམ་མི་མངོན་པ་སོགས་ཀྱི་འགྲན་སློང་ལ་ཕྱོགས་ནས་ཉིང་ཁྲི་གྲོང་ཁྱེར་བྲག་ཡིབ་ཆུས་ཀྱིས“ཆུང་ལ་སྤུས་རྟགས་དང་སྤུས་དག་ལ་མཛེས་པ”དམ་འཛིན་བྱ་གཞིར་བྱས་ཏེ“གྲོང་རྡལ་ཆུང་ངུའི་Time”དང“བྲག་ཡིབ་བའི་གཟའ་མཇུག”གི་སྤྱི་པའི་རིག་གནས་སྤུས་རྟགས་ཆེན་པོ་གཉིས་གསར་གཏོད་བྱས་ནས་བར་སྟོང་བསྐྱར་སྤྱོད་དང་། ལས་རྣམ་བསྐྱར་འཛུགས། IPལ་བརྟེན་པ་བཅས་ཀྱི“ལས་ཀའི་ཐབས་གསུམ”ལ་བརྟེན་ནས“མི་དང་། གྲོང་ཁྱེར། ཡུལ་སྐོར”བཅས་མཉམ་འདྲེས་གཏིང་ཟབ་བྱས་ཏེ། བོད་ཤར་ལྷོའི་གྲོང་ཁྱེར་གྱི་ནང་སྐྱེས་སྒུལ་ཤུགས་དང་སྐྱེ་སྟོབས་ཀྱི་གསོན་ཤུགས་འཕེལ་བར་བྱས་ཡོད།

བར་མཐོངས་བསྐྱར་སྤྱོད་བྱས་ནས་རིག་གནས་སྤྱི་གླིང་གི་ཁོར་ཡུག་ལེགས་སུ་བཏང་བ།

“སྔོན་མ་རིག་གནས་བྱེད་སྒོར་ཞུགས་བསམ་ན་རིག་གནས་ཁང་དུ་འགྲོ་དགོས་ཀྱི་ཡོད། ད་ཆ་ཁང་པའི་ཉེ་འགྲམ་དུ་སྤྱི་གླིང་དང་ཚོང་ཁང་ཡོད་པས་ཧ་ཅང་སྟབས་བདེ་པོ་འདུག”དགུན་ཁའི་དྲོ་འཇམ་ཉི་འོད་འོག་གྲོང་མི་བཀྲ་ཤིས་ཀྱིས་ཕྲུ་གུ་ཁྲིད་དེ་གྲོང་ཁྱེར་སྤྱི་གླིང་གི་འཁྲབ་སྟོན་ལ་ལྟ་བར་འགྲོ་བཞིན་འདུག་ལ། གར་སྟེགས་ཐོག་བྲག་ཡིབ་ཆུས་ཀྱི་སྒྱུ་རྩལ་ཚོགས་པའི་འཁྲབ་སྟོན་པ་ཚོས་ཞབས་བྲོ་འཁྲབ་པར་ལྟད་མོ་བ་ཚོས་དགའ་སྤྲོའི་ཐལ་མོ་རྡེབ་བཞིན་མཆིས།

དེའི་རྒྱབ་ན་བྲག་ཡིབ་ཆུས་ཀྱིས་ཆེད་དངུལ་སྒོར་ཁྲི་67བཏང་ནས་བསྐྲུན་པའི“གྲོང་ཁྱེར་ཆུང་ངུའི་Time”རྣམ་གྲངས་ཡོད། ད་ཆ་གནས་དེར་ཀོག་ཧྥེ་ཁང་དང་། སྒྱུ་རྩལ་ཁང་། ཚོང་ཁང་བཅས་བསྐྲུན་པས་མི་ཚང་མས་ཁོམ་པ་བྱུང་མ་ཐག་དཔེ་དེབ་ཁང་དུ་དཔེ་དེབ་ལྟ་ཀློག་བྱེད་པ་དང་།

(པར་ངོས་གསུམ་པར་གཟིགས)(པར་ངོས་དང་པོར་མཐུད) ཚོང་ཁང་དུ་མངོན་མིན་རིག་གནས་ཤུལ་བཞག་གི་བཟོ་རྩལ་པས་ས་ཡུལ་དངོས་སུ་སྤོས་བཟོ་བ། སྤྱི་གླིང་དུ་ཡུལ་དེའི་རོལ་ཆ་ཚོགས་པས་སྙན་འཇེབས་ཀྱི་རོལ་དབྱངས་དཀྲོལ་བ་བཅས་བྱེད་ཀྱི་ཡོད།

ཉམས་དགའ་བའི་རྣམ་པ་དེ་དག་གི་གསོན་ཤུགས་འཕེལ་ཐུབ་པ་དང་རྒྱུན་མཐུད་ཐུབ་ཆེད་བྲག་ཡིབ་ཆུས་རིག་གནས་ཡུལ་སྐོར་ཅུས་ཀྱིས“རྣམ་གྲངས་ཀྱི་དོ་དམ་པ”དང“གསར་གཏོད་བྱེད་ཐབས”ཀྱི་ལམ་ལུགས་བཏོན་པ་མ་ཟད། སྲིད་གཞུང་གིས་ཞབས་ཞུ་ཉོ་སྒྲུབ་དང་རྣམ་གྲངས་མཉམ་ལས་སོགས་ཀྱི་བྱ་ཐབས་སྤྱད་དེ། ཆེད་ལས་ཚོགས་པ་ཇུས་འགོད་ནང་ཞུགས་པར་གདན་ཞུ་བྱས་ཡོད།

ལས་རྣམ་བསྐྱར་སྒྲིག་བྱས་པ། སྤུས་རྟགས་ཆུང་ཆུང་གིས“རིག་གནས་ཡུལ་སྐོར་འཛད་སྤྱོད་ཀྱི་ཚ་རླབས་འཕེལ་བར”སྐུལ་འདེད་བཏང་བ།

“‘བྲག་ཡིབ་བའི་གཟའ་མཇུག”དང་བསྟུན་ནས་ཉིན་གསུམ་ནང་མངོན་མིན་རིག་གནས་ཤུལ་བཞག་གི་ཁྲོམ་ར་བསྐོར་བ་དང་། གྲོང་གསེབ་ཀྱི་དམངས་སྲོལ་གནས་ཚང་དུ་སྡོད་པ། བོད་ཟས་ཀྱི་བྲོ་བ་མྱོང་བ་བཅས་བྱེད་པ་དེ་མཛེས་ལྗོངས་ཁོ་ནར་ལྟ་བ་ལས་ལེགས་པ་འདུག”ཅེས་ཁྲེང་ཏུའུ་ནས་ཡོང་བའི་བུད་མེད་ཡུལ་སྐོར་བ་ལི་ཡིས་ལག་ཐོགས་ཁ་པར་ནང་གི་པར་དག་དྲ་ཐོག་ཏུ་བསྟན་བཞིན་དུ་བརྗོད་བྱུང་།

ཡུལ་སྐོར་ཁྲོམ་རའི་སྤུས་རྟགས་གཅིག་མཚུངས་ཅན་གྱི་གནད་དོན་ལ་དམིགས་ནས། བྲག་ཡིབ་ཆུས་ཀྱིས“ཀོང་པོའི་ལོ་གསར”དང“ཁམ་བུའི་མེ་ཏོག་དུས་ཆེན”སོགས་ཡུལ་དེའི་རིག་གནས་ཀྱི་IPསྔོག་འདོན་དང“བྲག་ཡིབ་བའི་གཟའ་མཇུག”འབྲེལ་ཐག་ཏུ་བྱས་ཏེ། གྲོང་གསེབ་ཀྱི་ཡུལ་སྐོར་དང་། མངོན་མིན་རིག་གནས་ཤུལ་བཞག་གི་ཚོང་འདུས། རིག་གནས་བསམ་བཀོད་ཁྲོམ་ར། བཟའ་བཏུང་ཚོང་ཁང་སོགས་ལས་རིགས་15དང་ཟུང་འབྲེལ་བྱས་ཏེ། ཡུལ་སྐོར་ལམ་ཐིག་རྩེ་གྲ་6ཇུས་འགོད་བྱས་པ་མ་ཟད། ཡུལ་སྐོར་ཁ་གསབ་སྒོར་ཁྲི་364ལྷག་ཙམ་བཏོན་ནས་སྒྲིག་བཀོད་ལེགས་སུ་བཏང་སྟེ་ཡུལ་སྐོར་བའི་ཡིད་དབང་བཀུག་ཡོད།

གྲངས་གཞིས་ར་སྤྲོད་བྱེད་ཐུབ་སྟེ། 2025ལོར་བྲག་ཡིབ་ཆུས་ཀྱིས་ཡུལ་སྐོར་བ་མི་ཐེངས་ཁྲི་482ལྷག་ཙམ་ལ་སྣེ་ལེན་བྱས་པ་དང་ཡུལ་སྐོར་ཡོང་འབབ་སྒོར་དུང་ཕྱུར་51.32ལྷག་ཙམ་ཟིན་ཏེ་དུས་མཚུངས་ལས་10.82%དང་26.43%སོ་སོར་འཕར་བ་དང་། ཞིང་འབྲོག་པ་5889རང་ཡུལ་དུ་ལས་ཞུགས་ཐུབ་ནས་འབབ་འཕར་སྒོར་ཁྲི་2092བྱུང་སྟེ། “སྤུས་རྟགས་ཆུང་ཆུང་གིས་ཐོན་ལས་ཆེན་པོར་སྐུལ་སྤེལ་གཏོང་བའི”ནུས་པ་ཐོན་ཡོད།

IPལ་བརྟེན་པ། “བོད་ཀྱི་གཡུ་གཞོང་དང་བདེ་སྐྱིད་ཀྱི་བྲག་ཡིབ”རྒྱལ་ཡོངས་སུ་དྲིལ་བསྒྲགས་བྱས་པ།

“གྲོང་ཁྱེར་ཆུང་ངུའི་Timeཡི་Logoལ་ཁྱད་ཆོས་ཆེན་པོ་འདུག་ལ། རིག་གནས་བསམ་བཀོད་ཀྱི་ཐོན་རྫས་དེ་དག་དངོས་འབྲེལ་སྙིང་རྗེ་པོ་འདུག”ཅེས་བྲག་ཡིབ་ཆུས་རིག་གནས་ཡུལ་སྐོར་ངོ་སྤྲོད་ཚོགས་འདུའི་ཐོག་ཀོང་ཀྲོའུ་ནས་ཡོང་བའི་ཡུལ་སྐོར་བས་འགྲེམས་ཁུལ་གྱི་རིག་གནས་བསམ་བཀོད་ཐོན་རྫས་ལ་བསྟོད་བསྔགས་བྱེད་བཞིན་དེ་ལྟར་བརྗོད།

ས་ཁོངས་ཀྱི་སྤུས་རྟགས་གཏོད་ཆེད། བྲག་ཡིབ་ཆུས་ཀྱིས་རིག་གནས་IPཡི་དབྱེ་འབྱེད་མ་ལག་ཞིབ་ཚགས་བཏོད་པ་དང“གྲོང་ཁྱེར་ཆུང་ངུའི་Time”ཡི་Logoཇུས་འགོད་བྱས་པ་མ་ཟད། ས་གནས་དེ་གའི་རིག་གནས་གྲགས་ཅན་མི་སྣ་གདན་འདྲེན་ཞུས་ཏེ་དྲིལ་བསྒྲགས་པ་བྱེད་དུ་བཅུག་པ་དང་། དྲིལ་བསྒྲགས་བརྙན་ཐུང་རབ་དང་རིམ་པ་པར་ལེན་དང་། “བྲག་ཡིབ་བའི་གཟའ་མཇུག”གི་རིག་གནས་བསམ་བཀོད་ཐོན་རྫས་གསར་སྤེལ་བྱས་ནས“བོད་ཀྱི་གཡུ་གཞོང་དང་བདེ་སྐྱིད་ཀྱི་བྲག་ཡིབ”ཀྱི་གཟུགས་བརྙན་བཟང་པོ་དེ་བས་མངོན་པར་བྱས་ཡོད། དེ་དང་ཆབས་ཅིག རིག་གནས་ཐོན་ཁུངས་དེ་ཉམས་ལེན་ཐུབ་པའི་ཐོན་རྫས་སུ་འགྱུར་བར་བྱས་ཏེ། མངོན་མིན་རིག་གནས་ཤུལ་བཞག་རྣམ་གྲངས་ཞིབ་འཇུག་སློབ་ཚན་དུ་འགྱུར་བ་དང་། གསར་བརྗེའི་གནས་ཡུལ་སློབ་གསོའི་སློབ་ཁང་ལ་བསྐྲུན་པ། “བདུན་གཅིག” ཕྱི་རོལ་གྱི་རོལ་དབྱངས་ཏང་གི་སློབ་ཚན་དང་ཕ་མ་དང་བུ་ཕྲུག་གི་ཉམས་ལེན་བྱེད་སྒོ་སོགས་སྤེལ་ནས་སྤུས་རྟགས་ཀྱི་ཤུགས་རྐྱེན་དེ་བས་ཟབ་ཏུ་བཏང་ཡོད།

ད་ཆ་བྲག་ཡིབ་ཆུས་ཀྱི་རིག་གནས་ཀྱི་རྣམ་པ་ཟབ་པ་དང་། གྲོང་ཁྱེར་ལ་གསོན་ཤུགས་ལྡན་པ། ཡུལ་སྐོར་གྱི་ནང་དོན་ཕུན་སུམ་ཚོགས་པ་བཅས་ཡོད་ཅིང་། “གྲོང་ཁྱེར་ཆུང་ངུའི་Time”དང“བྲག་ཡིབ་བའི་གཟའ་མཇུག”གི“སྤུས་རྟགས་ཆུང་ཆུང”གཉིས“མི་དང་། གྲོང་ཁྱེར། ཡུལ་སྐོར་བཅས་མཉམ་འདྲེས་ལ་སྐུལ་འདེད་གཏོང་བའི་སྒུལ་ཤུགས་ཆེན་པོར་གྱུར་ནས་ཉིང་ཁྲིའི་ཡུལ་སྐོར་རིག་གནས་ཀྱི་ཡུལ་སྐོར་མིང་བྱང་དེ་བས་བཀྲག་མདངས་ལྡན་པར་གྱུར་ཡོད།

（པ་སངས་ཀྱིས་བསྒྱུར། པ་སངས་དང་ཚེ་ལྷས་ཞུས）