དཔྱིད་གསར་དུས་ཆེན་དང་བོད་ཀྱི་ལོ་གསར་འཆར་ཉེར་ཡོད་པའི་སྐབས་སུ། ལྷ་སའི་ཁྲོམ་གཞུང་གང་སར་ལྒང་བཞུ་བཀལ་ནས་ལོ་གསར་གྱི་རྣམ་པས་ཁེངས། བར་སྐོར་ཁྲོམ་གཞུང་དུ་གྲོང་མི་ཚོས་ལོ་གསར་གྱི་མཁོ་ཆས་ཉོ་བར་བྲེལ་བཞིན་ཡོད་པ་དང་། སྤྱི་ཚོགས་འབྲེལ་བའི་ལས་སྟེགས་ཐོག“ལོ་གསར་གྱི་མཁོ་ཆས་ཉོ་བའི”སྐོར་གྱི་བརྗོད་གཞི་རྒྱུན་མཐུད་ངང་མང་དུ་འགྲོ་བཞིན་ཡོད། དེའི་ནང་། “རྩེ་སྒྲོའི”ཐད་གཏོང་བརྙན་ལམ་ཞིག་ལ་དོ་ཁུར་བྱེད་མཁན་ཤིན་ཏུ་མང་པོ་ཡོད། ཐད་གཏོང་ནང་ཚོན་མདོག་རྣམ་པར་བཀྲ་ལ་བཟོ་བཀོད་ཤིན་ཏུ་ལེགས་པའི་རྩེ་སྒྲོའི་བརྩམས་ཆོས་ལ་མི་རྣམས་ཀྱིས་བསྔགས་བརྗོད་ཐོབ་ཡོད། ཐད་གཏོང་ཁང་དུ་བཞག་པའི་ཁུངས་སྣེ་བརྒྱུད་གསར་འགོད་པ་ས་ཡུལ་དངོས་སུ་རྒྱུས་ལོན་བྱེད་པར་བསྐྱོད་པ་ཡིན།

(པར་ངོས་གསུམ་པར་གཟིགས)(པར་ངོས་དང་པོར་མཐུད)

ཚོང་ཁང་དུ་སླེབས་སྐབས། རྩེ་སྒྲོ་གྲལ་འགྲིག་པོས་སྟོན་ཡོད་པ་དང་། མེ་ཏོག་པདྨ་དང་གསེར་ཉ་ཁ་སྤྲོད་སོགས་སྲོལ་རྒྱུན་གྱི་རི་མོ་གསོན་ཉམས་དོད་པ་དང་བཟོ་བཀོད་ཞིབ་ཚགས་ལ་སྤུས་དག་པས་སྐུ་མགྲོན་མང་པོ་ཞིག་གི་ཡིད་དབང་བཀུག་ཡོད། ཚོང་ཁང་གི་འགན་འཁུར་བ་ཟླ་བ་རྒྱལ་མཚན་གྱིས་སྤྱི་ཚོགས་འབྲེལ་བའི་དྲ་རྒྱའི་ཐོག་དྲིལ་བསྒྲགས་བྱས་པ་ནས་བཟུང་། མངགས་ཐོ་ཧ་ཅང་མང་དུ་ཕྱིན་ནས་རྩེ་སྒྲོ་བཟོ་མཁན་རྣམས་ཉིན་གང་རྩེ་སྒྲོ་བཟོ་བར་བྲེལ་ཡང་རྩེ་སྒྲོ་འདོན་ཚད་ལས་མཁོ་ཚད་ཆེ་བ་འདུག་ཅེས་བཤད།

རིན་གོང་འོས་འཚམ་དང་རྩེར་སོན་གྱི་བཟོ་རྩལ་ལས་ཚོང་ཁང་དེའི་རྩེ་སྒྲོར་འཛད་སྤྱོད་པས་དགའ་པོ་བྱེད་ཀྱི་ཡོད། ད་ཆ་ཚོང་ཁང་དེའི་ལས་བཟོས་ཉིན་ལྟར་ལས་དུས་འཕར་མ་བྱེད་ཀྱི་ཡོད། གསར་འགོད་པ་ཚོང་ཁང་ནས་བྲལ་བའི་སྐབས་སུའང་འཛད་སྤྱོད་པ་རྒྱུན་ཆད་རྒྱུ་མི་འདུག

སྤུས་ཚད་ལ་འགན་སྲུང་དང་ལག་རྩལ་ལ་དོ་སྣང་ཆེན་པོ་བྱས་པར་བརྟེན་རྩེ་སྒྲོ་རེ་རེ་ལས་ལོ་གསར་གྱི་རྣམ་པ་ཟབ་མོ་མངོན་གྱི་ཡོད།