འདི་ག་ཚགས་པར་ཁང་དུ་ལྷ་ས་ནས་ཟླ་1ཚེས་23ཉིན་གནས་ཚུལ་འབྱོར་གསལ། ཉེ་ཆར། བོད་ལྗོངས་ཐེན་ཧའེ་ཚོགས་པས་གཙོ་གཉེར་བྱས་པའི“བཀྲ་ཤིས་བདེ་ལེགས། ཐེན་ཧའེ་ཡི་ལོ་གསར་མཁོ་ཆས་ཚོང་འདུས་ཆེ་མོ་སྐབས་དང་པོ”འགོ་ཚུགས་པ་ལས། གྲོང་མི་ཚོར་ལོ་གསར་གྱི་མཁོ་ཆས་ཕུན་སུམ་ཚོགས་པོ་འདེམས་ཉོ་བྱེད་པར་སྟབས་བདེ་བསྐྲུན་ཡོད།

ཚོང་འདུས་ཁུལ་དུ་ཁྲོམ་བཀྱག་ལྔ་བརྒྱ་ཙམ་གོ་རིམ་ལྡན་པའི་ངང་བསྒྲིགས་ཡོད་པ་དང་། ཚོང་ཟོག་སྣ་ཁ་ཧ་ཅང་མང་པོ་ཡོད་པ་སྟེ། ས་མཐོའི་ཤ་སྐམ་པོ་དང་། མར། ནས་ཀྱི་ཐོན་རྫས་སོགས་དང་། དེ་བཞིན་རྒྱལ་ཡོངས་ས་གནས་ཁག་གི་ཤིང་ཏོག་སྐམ་པོ་དང་། དཔྱིད་གསར་གྱི་སྨོན་ཚིག་ཆ་ཡིག གྱོན་ཆས་སོགས་ལོ་གསར་གྱི་མཁོ་ཆས་གང་དགོས་ཡོད་པ་རེད།

“འདི་གར་ཅ་ལག་སྣ་ཁ་འཛོམས་པ་མ་ཟད། འགྲོ་སྐྱོད་ཀྱང་སྟབས་ཧ་ཅང་བདེ་པོ་འདུག ཕ་མ་རྒན་རྒོན་དང་ཕྲུ་གུའི་ལོ་གསར་གྱི་ལག་རྟགས་ཚང་མ་འཁྱུག་ཙམ་ཞིག་ལ་ཉོས་ཚར་སོང”ཞེས་གྲོང་མི་དབང་འདུས་ཀྱིས་ཉོས་མ་ཐག་པའི་སྲོལ་རྒྱུན་ཞིམ་ཟས་དང་གྱོན་ཆས་གསར་པ་སྟོན་བཞིན་དུ་གསར་འགོད་པར་བརྗོད།

ཤེས་རྟོགས་བྱུང་བར་གཞིགས་ན། ལོ་གསར་གྱི་མཁོ་ཆས་ཚོང་འདུས་དེ་ཟླ་3ཚེས་5ཉིན་བར་རྒྱུན་མཐུད་གཉེར་རྒྱུ་ཡིན་པ་དང་། དེས་ལྷ་སའི་དུས་ཆེན་གོང་གི་འཛད་སྤྱོད་ཁྲོམ་རར་གསོན་ཤུགས་གསར་པ་ཞིག་སྣོན་བཞིན་ཡོད་པ་རེད།