འདི་ག་ཚགས་པར་ཁང་དུ་ལྷ་ས་ནས་ཟླ་1ཚེས་24ཉིན་གནས་ཚུལ་འབྱོར་གསལ། ཟླ་1ཚེས་23ཉིན། རང་སྐྱོང་ལྗོངས་སྤྱི་ཁྱབ་བཟོ་ཚོགས་ཀྱིས་ལྷ་སར“ས་མཐོའི་སེ་འབྲུ་དམར། རྡོག་བུ་གཅིག་ཏུ་བསྒྲིལ”ཞེས་པའི་གཞོན་ནུ་ལོ་ཆུང་གི་དགུན་སྒར་བྱེད་སྒོའི་རྡོག་ཐོན་མཛད་སྒོ་འཚོགས་པ་དང་། གཞོན་ནུ་ལོ་ཆུང་109ཅང་སུའུ་ཞིང་ཆེན་ནན་ཅིང་གྲོང་ཁྱེར་དུ་བསྐྱོད་ནས་དུས་ཡུན་ཉིན་9ཡི་ཞིབ་སྦྱོང་བྱེད་སྒོར་ཞུགས་རྒྱུ་རེད།

བྱེད་སྒོ་བདེ་འཇགས་དང་གོ་རིམ་ལྡན་པའི་ངང་སྤེལ་ཆེད། རང་སྐྱོང་ལྗོངས་སྤྱི་ཁྱབ་བཟོ་ཚོགས་ཀྱིས་ཆེད་མངགས“ཆེད་བསྐོས་རུ་སྣེ་ཁྲིད་མཁན་1+ཆེད་ལས་པ་6”གི་ཆེད་ལས་ཞབས་ཞུའི་ཚོགས་པ་བཀོད་སྒྲིག་བྱས་ཏེ། དགུན་སྒར་གྱི་ཞིབ་སྦྱོང་བྱེད་སྒོའི་བརྒྱུད་རིམ་ཧྲིལ་པོ་བདེ་བླག་ངང་སྤེལ་བར་འགན་སྲུང་བྱས་པ་རེད།

ངོ་སྤྲོད་བྱས་པར་གཞིགས་ན། ད་ཐེངས་ཀྱི་དགུན་སྒར་གྱིས“སེ་འབྲུའི་རྡོག་བུ་བློ་སེམས་གཅིག་མཐུན”ཞེས་པ་བརྗོད་དོན་གཙོ་བོར་བྱས་ནས། “བསམ་བློ་ཆབ་སྲིད་ཀྱི་སྐོར་སྐྱོད་སློབ་ཚན”ཧུར་ཐག་བཏོད་ཡོད། བྱེད་སྒོའི་ནང་གཙོ་བོ་གསར་བརྗེའི་སློབ་གསོའི་རྟེན་གཞིར་ལྟ་སྐོར་བྱེད་པ་དང་། ཚན་རྩལ་ཁང་སོགས་སུ་ཚན་རིག་ཁྱབ་གདལ་དང་ཞིབ་སྦྱོང་བྱེད་སྒོ་སྤེལ་བ། དགུན་དུས་ཀྱི་བདེ་འཇགས་ཤེས་བྱ་གསོ་སྦྱོང་དང་དེ་བཞིན་འཕྲལ་སྡོམ་རང་སྐྱོབ་སློབ་གསོའི་བྱེད་སྒོ་སྤེལ་བ། ཡུལ་དེའི་ཕུལ་བྱུང་ལས་བཟོ་དང་གཞོན་ནུའི་མིག་དཔེ་གདན་དྲངས་ནས་ཁོང་ཚོའི་ཉམས་མྱོང་མཉམ་སྤྱོད་བྱས་པ་རེད།