འདི་ག་ཚགས་པར་ཁང་དུ་ལྷ་ས་ནས་ཟླ་1ཚེས་24ཉིན་གནས་ཚུལ་འབྱོར་གསལ། ཉིན་ཤས་གོང་། གསར་འགོད་པར་2026ལོའི་ལྗོངས་ཡོངས་ཀྱི་རླུང་འཕྲིན་བརྙན་འཕྲིན་ལས་དོན་ཚོཌ་འདུ་ནས་ཤེས་རྟོགས་བྱུང་བར། 2025ལོར་ལྗོངས་ཡོངས་སུ་རླུང་འཕྲིན་བརྙན་འཕྲིན་གྱི་ཕུལ་བྱུང་བརྩམས་ཆོས་ཁག་གཅིག་ཐོན་པ་དང་། བརྙན་འཕྲིན་དང་། དྲ་རྒྱ། དྲ་ཕྱི་བཅས་མཉམ་འདྲེས་བརྒྱུད་གཏོང་ལ་གྲུབ་འབྲས་མངོན་གསལ་དོད་པོ་ཐོབ་ནས། རླུང་འཕྲིན་བརྙན་འཕྲིན་ལས་རིགས་ཀྱི་ཕུལ་བྱུང་བརྩམས་ཆོས་གསར་རྩོམ་ཐད་ཚད་བརྒལ་གསར་པ་བྱུང་ནས། དུས་རབས་གསར་པའི་བོད་ཀྱི་གཏམ་རྒྱུད་ཡག་པོ་བརྗོད་པར་ལེགས་སྐྱེས་ཧུར་ཐག་ཕུལ་ཡོད།

ཤེས་རྟོགས་བྱུང་བར་གཞིགས་ན། 2025ལོར་བོད་ཀྱི་དེང་རབས་འཚོ་བ་དངོས་མཚོན་པའི་བརྗོད་བྱ་གཙོ་བོའི་འཁྲབ་གཞུང་ཐུང་གྲས་དང་པོ《ཁམ་བུའི་མེ་ཏོག་བཞད་སར་སྐྱོད》ཅེས་པ་དང་། 4Kརབ་གསལ་དངོས་མཚོན་གློག་བརྙན《བོད་ལྗོངས། སྐར་ཚོགས་འོག་གི་ངོ་མཚར་གཏམ་རྒྱུད》 དེ་བཞིན་AIལག་རྩལ་དང་3Dའགུལ་རིས་མཉམ་འདྲེས་ཀྱི་ལག་རྩལ་ཐོག་མར་སྤྱད་ཅིང་གསར་བརྗེ་བརྗོད་བྱར་བྱས་པའི་བརྙན་འཕྲིན་འགུལ་རིས་གློག་བརྙན《འགྲན་ཟླ་བྲལ་བའི་དཔའ་བོ》སོགས་ཕུལ་བྱུང་བརྩམས་ཆོས་བསྟུད་མར་བསྟན་པ་རེད། དེའི་ནང《ཁམ་བུའི་མེ་ཏོག་བཞད་སར་སྐྱོད》ཅེས་པ་རྒྱལ་ཁབ་རླུང་འཕྲིན་བརྙན་འཕྲིན་སྤྱི་ཁྱབ་ཅུས་ཀྱི“2025ལོའི་ཀྲུང་གོའི་རླུང་འཕྲིན་བརྙན་འཕྲིན་གྱི་ཕུལ་བྱུང་བརྩམས་ཆོས་ལྟ་ཉན་གྱི་མཚན་མོ། 2026ལོའི་ལོ་འཁོར་གྱི་རྒྱང་ལྟའི་བརྩམས་ཆོས”ནང་བདམས་པ་དང་། ཞིང་ཆེན་རིམ་པའི་སྲུང་སྐར་བརྙན་འཕྲིན་ལས་ཁུངས་ཁག་15དང་གཙོ་གནད་དྲ་རྒྱའི་ལྟ་ཉན་ལས་སྟེགས་5ཡིས་མཉམ་དུ་བསྟན་པར། སྲུང་སྐར་བརྙན་འཕྲིན་འཕྲིན་ལམ་ནས་ལྟ་མཁན་ཁྱོན་མི་ཐེངས་དུང་ཕྱུར་1.1ཟིན་པ་དང་། དྲ་རྒྱའི་ལས་སྟེགས་ནས་ལྟ་མཁན་མི་ཐེངས་དུང་ཕྱུར་3ལྷག་ཙམ་ཟིན་ཏེ། དྲ་ཐོག་ནས་ལྟ་ཉན་བྱེད་མཁན་གྱི་ཟིན་ཐོ་བཏོད་ཡོད་པ་རེད།

(ཚེ་ལྷས་བསྒྱུར། པ་སངས་དང་ཚེ་ལྷས་ཞུས)