2025ལོའི་ཟླ་7ཚེས་8ཉིན། ཧུའུ་ནན་ཞིང་ཆེན་གཡོད་དབྱང་གྲོང་ཁྱེར་གྱི་བོད་སྐྱོར་ལས་དོན་ཚོགས་ཆུང་ཁག་བཅུ་གཅིག་པའི་ལས་བྱེད་པས་བོད་སྐྱོར་གྱི“རྒྱུག་མཐུད་དབྱུག་པ”ལག་ཏུ་དམ་པོར་བཟུང་སྟེ། ཏུང་ཐིང་མཚེའུ་འགྲམ་ནས་རྡོག་ཐོན་གྱིས་སྤྱི་ལེ་3500ཡི་འགྲུལ་བཞུད་ཀྱི་དཀའ་ངལ་ཁྱད་དུ་བསད་ནས་ཐད་ཀར་ལྷོ་ཁ་གྲོང་ཁྱེར་ཟངས་རི་རྫོང་དུ་བསྐྱོད་དེ། རེས་སྐོར་གསར་པའི་བོད་སྐྱོར་གྱི་ལམ་བུར་སྐྱོད་འགོ་ཚུགས་པ་རེད།

ལོ་ཕྱེད་རིང་། གཡོད་དབྱང་གི་བོད་སྐྱོར་ལས་བྱེད་པས་གཡོད་དབྱང་གི་ནུས་པ་གང་ཡོད་བཏོན་ཏེ་ཟངས་རིའི་དགོས་མཁོ་སྐོང་གང་ཐུབ་བྱས་པ་དང་། བློ་གྲོས་དང་རྔུལ་ཆུའི་ཟེགས་མ་ཡངས་ཤིང་རྒྱ་ཆེ་བའི་ཟངས་རིའི་ས་གཞི་འདིར་གཏོར་ནས། གངས་ལྗོངས་ས་མཐོར“གཡོད་དབྱང་དང་ཟངས་རི་གཅིག་སེམས་གཅིག་ལ་སྦྲེལ་བའི”ལེའུ་གསར་རྐྱང་ཞིག་བརྩམས་པ་རེད།

འགོ་འཛུགས་ས་འཚོལ་ཞིབ་ཧུར་ཐག་བྱས་ནས་བོད་སྐྱོར་བྱེད་མགྱོགས་སུ་བཏང་བ།

“བོད་སྐྱོར་ལས་དོན་ལ་མཚོན་ན། འགོ་ཡག་པོ་ཞིག་འཛུགས་པ་ནི་མཐའ་མའི་རྒྱལ་ཁ་ལེན་པ་ཞིག་རེད་ལ། འགོ་ཡག་པོ་ཞིག་རྩོམ་པ་ནི་མཐའ་མའི་གདོང་མཆོང་བྱེད་པ་ཞིག་ཀྱང་རེད” ཟངས་རི་རྫོང་ཨུད་ཀྱི་རྒྱུན་ལས་ཧྲུའུ་ཅི་གཞོན་པ་དང་། རྒྱུན་ལས་རྫོང་དཔོན་གཞོན་པ། གཡོད་དབྱང་གི་བོད་སྐྱོར་ལས་དོན་ཚོགས་ཆུང་གི་ཙུའུ་ཀྲང་བཅས་ཡིན་པའི་ཕེང་ཏེན་གྱིས་གདེང་ཚོད་ཆེན་པོས་འདི་ལྟར་བརྗོད། 2025ལོའི་ཟླ་7པར་བོད་དུ་སླེབས་ཚུན། ལས་དོན་ཚོགས་ཆུང་གིས“ས་མཐོའི་མྱུར་ཚད”དང་གང་མགྱོཌ་འཚམ་པར་བྱས་ཏེ། དེ་མ་ཉིད་དུ་གཞི་རིམ་དུ་བསྐྱོད་ནས་བརྟག་ཞིབ་བྱེད་ཞོར་བསམ་གཞིག་བྱེད་པ་དང་གནད་དོན་འཕྲད་རིམ་བཞིན་ཐག་གཅོད་བྱས་པ་རེད།

འོལ་ཁ་ཆུ་ཚན་གྱི་རྨང་གཞིའི་སྒྲིག་བཀོད་ཡག་པོ་མེད་པའི་དཀའ་གནད་སེལ་ཆེད། ལས་དོན་ཚོགས་ཆུང་གིས“སྒྲིག་སྲོལ་མང་པོ་མཉམ་འདྲེས”ཐུབ་པར་སྐུལ་འདེད་བཏང་སྟེ། འོལ་ཁ་ཆུ་ཚན་དང་། གཟི་བྱིན་བླ་མཚོ། ཀུན་བདེ་གླིང་རྩྭ་ཐང་སོགས་མཛེས་ལྗོངས་ཁུལ་དག་ཕྲེང་སྟར་གཅིག་ཏུ་སྦྲེལ་ཏེ་མཉམ་དུ་གསར་སྤེལ་བྱེད་པའི་འཆར་གཞི་བཏིང་བ་རེད།

ལོ་ཕྱེད་རིང་ལ། ལས་དོན་ཚོགས་ཆུང་གི་འགྲུལ་བཞུད་ཀྱི་རྐང་རྗེས་ཟངས་རི་རྫོང་གི་ཤང་གསུམ་དང་། གྲོང་རྡལ་གཅིག སྲིད་འཛིན་གྲོང་ཚོ་39ལ་ཁྱབ་པ་དང་། ཁོང་ཚོས་ས་མཐོའི་ཁྱད་ལྡན་ཞིང་འབྲོག་ལས་དང་། རིག་གནས་དང་ཡུལ་སྐོར་མཉམ་འདྲེས། ནུས་རྒྱུ་གཙང་མ། དམངས་འཚོ་ལེགས་གཏོང་སོགས་ཀྱི་ཁྱབ་ཁོངས་མང་པོར་ཕྱོགས་ཡོངས་ནས་བརྟག་ཞིབ་བྱས་པ་རེད། མཐར་ཚན་རིག་དང་མཐུན་ཞིང་དོན་གཉེར་ཐུབ་པའི《གཡོད་དབྱང་བོད་སྐྱོར་གྱི་ལོ་གསུམ་གྱི་ལས་ཀའི་འཆར་འགོད》དང“ལོ་ལྔ་ཚན་བཅོ་ལྔ་པའི”ཁ་གཏད་རོགས་སྐྱོར་རྣམ་གྲངས་མཛོད་རིམ་བཞིན་གྲུབ་ནས། ཟངས་རི་འཕེལ་རྒྱས་ཇི་ལྟར་གཏོང་མིན་གྱི་གནས་ཚད་གསར་པ་གཏན་འཁེལ་བྱས་པ་རེད།

བརྩེ་སེམས་ཟབ་མོར་བརྟེན་ནས་ས་མཐོའི་དམངས་འཚོའི་བདེ་རྩ་བསྲུངས་པ།

“གཡོད་དབྱང་གི་བོད་སྐྱོར་ལས་དོན་ཚོགས་ཆུང་གིས་ང་ལ་ཚེ་སྲོག་གཉིས་པ་གནང་བར་ཐུགས་རྗེ་ཆེ་ཞུ་གི་ཡིན། ད་ནས་བཟུང་ངས་ཀེར་ཀེར་བྱས་ནས་འཇིག་རྟེན་ལ་ལྟ་ཆོག་གི་རེད” 2025ལོའི་ཟླ་8པར། གཡོད་དབྱང་བོད་སྐྱོར་ལས་དོན་ཚོགས་ཆུང་གི་མཐུན་སྦྱོར་འོག ལས་དོན་ཚོགས་ཆུང་དང་པེ་ཅིང་ཧའེ་དབྱིང་སྒལ་ཚིགས་བདེ་ཐང་སྤྱི་ཕན་ཐེབས་རྩ་ལྷན་ཚོགས་ཀྱིས་སྒལ་ཚིགས་ཚབས་ཆེན་འཁྱོག་པའི་ནད་པ་བློ་བཟང་ངག་དབང་ཧུའུ་ནན་དུ་སྨན་བཅོས་བྱེད་རིང་སྔ་ཕྱི་བར་གསུམ་དུ་རོགས་སྐྱོར་བྱས་ཡོད།

སྨན་བཅོས་བོད་སྐྱོར་གྱིས་ནད་པར་སྨན་བཅོས་བྱས་པ་ཙམ་མིན་པར། དེ་བས་ཀྱང་མི་སེམས་ལ་དྲོ་སྐྱིད་གང་ལེགས་སྦྱིན་ཡོད། ལས་དོན་ཚོགས་ཆུང་གིས་ཧུའུ་ནན་ཞིང་ཆེན་འཕྲོད་བསྟེན་བདེ་ཐང་ཨུ་ལྷན་དང་། ཧུའུ་ནན་ཞིང་ཆེན་བྱིས་པའི་སྨན་ཁང་། དེ་བཞིན་གཅེས་སེམས་ཁེ་ལས་བཅས་དང་ལག་གདང་སྦྲེལ་ནས། བོད་རིགས་ཕྲུ་གུ་41ལ་རིན་པ་མི་དགོས་པར་ལྷན་སྐྱེས་སྙིང་ནད་ཡོད་མེད་གྲལ་བཤེར་བྱས་པ་མ་ཟད། གཅེས་སེམས་མཚོན་པའི་འོ་རྩམ་ལྕགས་ཀྲིན་1000ཕྲུ་གུ་དམར་འབྱར་གྱི་ཁྱིམ་དུ་བསྐྱལ་བ་རེད།

སློབ་གསོ་ནི་རེ་བའི་ས་བོན་ཡིན། “མགྱོགས་པོ་ལྟོས་དང་། མཐིལ་འབུ་ཞབས་བྲོ་འཁྲབ་བཞིན་འདུག” ཕྲ་མཐོང་ཆེ་ཤེལ་འོག་གི་ངོ་མཚར་འཇིག་རྟེན་ལ་ཟངས་རི་རྫོང་སློབ་ཆུང་གི་བྱིས་པ་རྣམས་ཧང་སངས་ཡོད། གཡོད་དབྱང་བོད་སྐྱོར་ལས་དོན་ཚོགས་ཆུང་གི་སྣེ་ཁྲིད་འོག གཡོད་དབྱང་གྲོང་ཁྱེར་གྱི་སློབ་འབྲིང་བཅུ་གཉིས་པ་དང་ལྷོ་ཁ་གྲོང་ཁྱེར་གྱི་སློབ་ཆུང་གསུམ་པའི་དགེ་རྒན་རྣམས་ཟངས་རི་རྫོང་དུ་མཛེས་རྩལ་དང་ཚན་རིག་སོགས་ཀྱི་སློབ་ཚན་སྤུས་ལེགས་སློབ་ཁྲིད་བྱེད་པར་ཡོང་ཡོད།

དམངས་འཚོའི་སྐྱིད་སྡུག་ནི་བོད་སྐྱོར་ལས་དོན་གྱི་འགོ་འཛུགས་ས་དང་དོན་ལ་བབས་ས་རེད། བོད་སྐྱོར་ལས་དོན་ཚོགས་ཆུང་གིས་ད་དུང་རྫིང་ཕྱི་ཤང་སྤང་སྐོང་གྲོང་ཚོ་དང་བྲག་དཀར་གྲོང་གསར་དུ་བསྐྱོད་ནས། རིན་པ་མི་དགོས་པར་སྨན་བཅོས་བྱས་པ་དང་སྨན་རྫས་བསྐྱལ་བ་མ་ཟད། ས་མཐོར་ཐོན་མང་བའི་རུས་ཚིགས་ནད་དང་སྙིང་དང་གློ་བའི་ནད་རིགས་སོགས་ལ་དམིགས་ཏེ། ངང་རྒྱུད་རིང་པོས་བརྟག་དཔྱད་དང་དོགས་གནད་ཧུར་ཐག་བསལ་ནས་ཞིང་འབྲོག་པར་ཏང་གི་དྲོ་སྐྱིད་ཚོར་དུ་བཅུག་ཡོད།

གཡོད་དབྱང་དང་ཟངས་རིས་ལག་གདང་སྦྲེལ་ནས་མཛེས་སྡུག་ལྡན་པའི་འབྱུང་འགྱུར་གཏོད་པ།

2025ལོའི་ཟླ་11པར། “ལག་གདང་སྦྲེལ་ནས་འཕེལ་རྒྱས་བཏང་། གཡོད་དབྱང་དང་ཟངས་རི་ཁྱིམ་ཚང་གཅིག་ལྟར་བརྩེ”ཞེས་པའི་ཧུའུ་ནན་དང་བོད་ལྗོངས(གཡོད་དབྱང་དང་ཟངས་རི)ཀྱི་བརྙན་པར་གསར་རྩོམ་གྲུབ་འབྲས་འགྲེམས་སྟོན་ཐོག གཡོད་དབྱང་གི་པར་ལེན་མཁས་ཅན་ལི་མེན་གྱིས། “ཡིད་དབང་འཕྲོག་ཤོས་ནི་རི་ཀླུང་གི་མཛེས་ལྗོངས་ཁོ་ན་ཡིན་པར། རྒྱ་བོད་མང་ཚོགས་ཀྱིས་མཉམ་དུ་ཅི་འཕྲོས་མོལ་འཕྲོས་ཤོད་པའི་དྲོ་སྐྱིད་ཀྱི་རྣམ་པ་དེ་དང་། བོད་སྐྱོར་ལས་བྱེད་པས་ཡུལ་དེ་གའི་མང་ཚོགས་དང་དཔུང་པ་མཉམ་གཤིབ་ཀྱིས་འབད་འཐབ་བྱེད་པའི་རྣམ་པ་དེ་རེད”ཅེས་པའི་སྐད་ཆ་དུམ་བུ་འདི་མཉམ་སྤྱོད་བྱས་པ་རེད།

ལོ་ཕྱེད་རིང་། གཡོད་དབྱང་དང་ཟངས་རིའི་དབར་གྱི་སྤེལ་རེས་སྦྲེལ་ཟམ་རྒྱུན་ཆད་མེད་པར་སྣུར་སྲིང་ཐུབ་པ་སྟེ། ཟངས་རི་རྫོང་གི་ཏང་སྲིད་འཐུས་མི་ཚོགས་པ་གཡོད་དབྱང་དུ་རྟོག་ཞིབ་བྱེད་པར་བསྐྱོད་རིང་གཡོད་དབྱང་གི་ཁེ་ལས་དང་བྱ་གཞག་ཚན་པ་10ལྷག་ཙམ་ཟངས་རིར་ཡོང་ནས་མཉམ་ལས་བྱ་རྒྱུའི་གྲོས་མཐུན་བཞག་པ་དང་། “ལྗོངས་ཕྱིར་ལས་ཞུགས”ཐུབ་པའི་ཟངས་རི་རྫོང་གི་སློབ་མའི་ནང་མི་གཡོད་དབྱང་དུ“གཉེན་འཕྲད”བྱེད་པར་ཁྲིད་པ། ཧུའུ་ནན་ཞིང་ལས་སློབ་ཆེན་གྱི་རིགས་གཅིག་མཁས་ཅན་དང་གཡོད་དབྱང་མཁོ་ཚོང་མཉམ་ལས་ཁང་གི་ཚོགས་པ་ཟངས་རིར་གདན་དྲངས་ནས་རྒུན་འབྲུམ་ཐོན་ལས་ལ་རྟོག་ཞིབ་བྱས་པ། ཟངས་རིའི་སྨན་དོན་རྐང་འཛིན་པ་གཡོད་དབྱང་དུ་སློབ་སྦྱོང་བྱེད་པར་མངགས་པ། 2025ལོའི་ཟངས་རི་གཟི་བྱིན་བླ་མཚོའི་ཡུལ་སྐོར་དམངས་གཞས་མཛད་སྒོ་དང་ཡུལ་སྐོར་འཕེལ་རྒྱས་ཚོགས་ཆེན་བདེ་བླག་ངང་འཚོགས་རྒྱུར་སྐུལ་འདེད་བཏང་བ་ལ་སོགས། “གསེར་མདོག་ཟངས་རིའི”མིང་བྱང་ལས་བཀྲག་མདངས་རབ་ཏུ་འཚེར་བཞིན་ཡོད།

“ང་ཚོ་ནི་ཐག་རིང་ནས་ཡོང་བའི་མགྲོན་པོ་མིན་པར་ཟངས་རིའི་བུ་ཕྲུག་གི་གྲས་ཤིག་ཡིན”ཞེས་ཟངས་རི་རྫོང་ཨུད་ཀྱི་རྒྱུན་ཨུ་དང་། རྫོང་དཔོན་གཞོན་པ། གཡོད་དབྱང་བོད་སྐྱོར་ལས་དོན་ཚོགས་ཆུང་གི་ཙུའུ་ཀྲང་གཞོན་པ་བཅས་ཡིན་པའི་དབྱང་ཀྲེང་གིས་བརྗོད། བོད་སྐྱོར་ལས་དོན་སྤེལ་རིང་། བོད་སྐྱོར་ལས་བྱེད་པ་ཚོས་ཡུལ་དེ་གའི་ལས་བྱེད་མང་ཚོགས་དང་མཉམ་ཟ་མཉམ་སྡོད་བྱས་ཏེ། སེ་འབྲུའི་རྡོག་ལྟར་གོང་བུ་གཅིག་ཏུ་བསྒྲིལ་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་བཙུགས་ཡོད།

བོད་སྐྱོད་པ་རྒན་གྲས་ཀྱི་སྙིང་སྟོབས་བོར་མི་སྲིད་ལ་བོར་ཡང་མི་རུང་། ད་ཆ་ཧུའུ་ནན་ཞིང་ཆེན་གཡོད་དབྱང་གྲོང་ཁྱེར་གྱི་བོད་སྐྱོར་ལས་དོན་ཚོགས་ཆུང་ཁག་བཅུ་གཅིག་པས་གངས་རིའི་འདབས་དང་ཡར་ཀླུང་གཙང་པོའི་ངོགས་སུ་སྔར་བཞིན་འབད་འཐབ་ཆེན་པོས་ཟངས་རི་རྫོང་གི་ཚ་ཚ་འུར་འུར་གྱི་འཛུགས་སྐྲུན་ནང་ཞུགས་བཞིན་ཡོད། བོད་སྐྱོར་ལས་དོན་ཚོགས་ཆུང་གིས་རྣམ་གྲངས་དང་ཐོན་ཁུངས་ཐད་རྒྱབ་སྐྱོར་བྱས་པ་མ་ཟད། དེ་བས་སྔོན་ཐོན་གྱི་འདུ་ཤེས་དང་། གསར་གཏོད་ཀྱི་བསམ་ཕྱོགས། ཚན་རིག་དང་མཐུན་པའི་བྱེད་ཐབས་བཅས་འདི་གར་ཁྱབ་པར་བྱས་པས། ནམ་ཡང་གནས་ཐུབ་པའི་ལས་བྱེད་པའི་དཔུང་ཁག་ཅིག་འདི་གར་འཚར་ལོངས་བྱུང་དང་འབྱུང་མུས་ལགས།