འདི་ག་ཚགས་པར་ཁང་དུ་ལྷ་ས་ནས་ཟླ་1ཚེས་24ཉིན་གནས་ཚུལ་འབྱོར་གསལ། ཉེ་ཆར། ལྗོངས་ཡོངས་ཀྱི་དྲིལ་བསྒྲགས་པུའུ་ཀྲང་གི་ཚོགས་འདུ་ལྷ་སར་འཚོགས་ཤིང་། ཚོགས་འདུར་དྲིལ་བསྒྲགས་དང་བསམ་བློ་རིག་གནས་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་གྱི་དགོངས་དོན་དང་རྒྱལ་ཡོངས་དྲིལ་བསྒྲགས་པུའུ་ཀྲང་ཚོགས་འདུའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ་ལས་དོན་ལ་ཕྱོགས་སྡོམ་དང་། དུས་བབ་ལ་དབྱེ་ཞིབ། ལས་འགན་བཀོད་སྒྲིག་བཅས་བྱས་ནས་དུས་རབས་གསར་པ་དང་རྒྱང་ལམ་གསར་པར་བོད་ཀྱི་དྲིལ་བསྒྲགས་དང་བསམ་བློ་རིག་གནས་ལས་དོན་ལ་ཁ་ཕྱོགས་གསལ་སྟོན་བྱས་ཡོད། ཚོགས་འདུ་འཚོགས་པ་དེས་ལྗོངས་ཡོངས་ཀྱི་དྲིལ་བསྒྲགས་དང་བསམ་བློ་རིག་གནས་འཐབ་ཕྱོགས་དང་རྒྱ་ཆེའི་ལས་བྱེད་པ་དང་མང་ཚོགས་ཁྲོད་ཚུར་སྣང་ལན་ཆ་ཆེན་པོ་བྱུང་ཡོད། ཚང་མས་ཚོགས་འདུའི་ཐོག་ཐུན་མོང་གི་ངོས་འཛིན་གཅིག་སྡུད་དང་ངར་ཤུགས་ལ་སྐུལ་ལྕག་བྱས་ཡོད། དར་ཆ་སྒྲེང་བ་དང་། དམངས་སེམས་སྒྲིལ་བ། མི་གསར་སྐྱོང་བ། རིག་གནས་དར་སྤེལ། གཟུགས་བརྙན་མངོན་པ་བཅས་ཀྱི་ལས་འགན་རང་རྟོགས་ངང་ཁུར་ཏེ། སྤྲོ་སེམས་དེ་བས་ཆེན་པོ་དང་དེ་བས་དངོས་སྒྲུབ་ཀྱི་སྤྱོད་ཚུལ་ལ་བརྟེན་ནས་བོད་ཀྱི་དྲིལ་བསྒྲགས་དང་བསམ་བློ་རིག་གནས་ལས་དོན་གྱི་རྣམ་པ་གསར་པ་ཧུར་ཐག་བཏོད་དེ་ཀྲུང་གོའི་ལུགས་ཀྱི་དེང་རབས་ཅན་གྱི་བོད་ཀྱི་ལེའུ་རྩོམ་ཆེད་བསམ་བློའི་འགན་ལེན་བརྟན་པོ་དང་། བསམ་པའི་སྟོབས་ཤུགས་ཆེན་པོ། ཕན་ཡོད་ཀྱི་རིག་གནས་མཐུན་རྐྱེན་བཅས་མཁོ་འདོན་བྱེད་ཀྱི་ཡིན་ཞེས་གཅིག་རྗེས་གཉིས་མཐུད་ངང་བཤད་པ་རེད།

“ཉེ་བའི་ལོ་ཤས་རིང་། ང་ཚོས‘མི་སེམས་ལ་འཇགས་ཐུབ་པ་དང་ཁྱིམ་ཚང་ཀུན་གྱིས་ཤེས་ཐུབ་པའི’དྲིལ་བསྒྲགས་སྤུས་རྟགས་བཏོད་དེ་ནང་དོན་ཟབ་པའི་གསར་འགྱུར་འཕྲིན་སྤེལ་སྣ་ཚོགས་སྤེལ་ནས་མཐའ་མཚམས་ཀྱི་གཏམ་རྒྱུད་གསོན་ཉམས་དོད་པོས་བརྗོད་ཡོད། གོམ་སྟབས་རྗེས་མར། རིགས་པའི་གཞུང་ལུགས་དྲིལ་བསྒྲགས་ཀྱི་ཐབས་ལམ་མུ་མཐུད་གསར་གཏོད་བྱས་ནས་ཏང་གི་རིགས་པའི་གཞུང་ལུགས་གསར་གཏོད་གཞི་རིམ་ལ་ཐད་ཀར་དྲིལ་བསྒྲགས་བྱས་ནས་མི་སེམས་ལ་འཇགས་པ་བྱ་རྒྱུ་དང་། རིག་གནས་བྱ་གཞག་དང་རིག་གནས་ཐོན་ལས་འཕེལ་རྒྱས་མུ་མཐུད་ཟབ་ཏུ་བཏང་ནས་རིག་གནས་ཀྱི་རྫོང་སྟོབས་ཆེན་དང་རིག་གནས་ཡུལ་སྐོར་གྱི་རྫོང་གྲགས་ཅན་གཏོད་པའི་དམིགས་ཚད་ལ་དམིགས་ཏེ། “ཆུང་ལ་མཛེས་པ་དང་། ཆུང་ལ་དྲོ་སྐྱིད་ལྡན་པ། ཆུང་ལ་ལེགས་པ”བཅས་ཀྱི་ཁྱད་ལྡན་ཞབས་ཞུའི་སྤུས་རྟགས་བཏོད་ནས་མང་ཚོགས་ཚོས་དཔལ་འབྱོར་དང་། སྤྱི་ཚོགས། རིག་གནས་བཅས་འཕེལ་རྒྱས་ཀྱི་གྲུབ་འབྲས་མཉམ་སྤྱོད་ཐུབ་པ་དང་གཞི་རིམ་གྱི་དྲིལ་བསྒྲགས་དང་བསམ་བློ་རིག་གནས་ལས་དོན་གྱི་ཕན་འབྲས་ལ་བརྟེན་ནས་བོད་ཀྱི་བརྟན་ལྷིང་དང་། འཕེལ་རྒྱས། སྐྱེ་ཁམས། མཐའ་སྟོབས་བཅས་ལ་སྟོབས་ཤུགས་སྐྱེས་སུ་འབུལ་གྱི་ཡིན”ཞེས་གཞིས་རྩེ་གྲོང་ཁྱེར་ཁང་དམར་རྫོང་ཨུད་ཀྱི་རྒྱུན་ཨུ་དང་དྲིལ་བསྒྲགས་པུའི་པུའུ་ཀྲང་པ་དོན་གྱིས་བཤད།

ལྗོངས་ཡོངས་ཀྱི་དྲིལ་བསྒྲགས་པུའུ་ཀྲང་གི་ཚོགས་འདུའི་དགོངས་དོན་སློབ་སྦྱོང་བྱས་རྗེས། ཉིང་ཁྲི་གྲོང་ཁྱེར་མཉམ་འདྲེས་སྨྱན་སྦྱོར་ལྟེ་གནས་ཀྱི་ཀྲུའུ་རེན་གཞོན་པ་ཀུའོ་ཞུའེ་ཅོན་གྱིས་སེམས་འགུལ་ཐེབས་བཞིན། མཉམ་འབྲེལ་དྲ་རྒྱའི་བསམ་གཞིག་གསར་གཏོད་ཐོག་ནས་ཏང་གི་སྨྱན་སྦྱོར་ནང་དོན་གོ་ཆོད་པ་དང་ལྟ་རིན་ཡོད་པ་བྱས་ཏེ་སྤྱི་ཡོངས་ཀྱི་འཕེལ་རྒྱས་ཁྲོད་མི་རིགས་ཁག་གི་མང་ཚོགས་གོང་བུ་གཅིག་ཏུ་སྒྲིལ་ཐུབ་པ་དང་གཞི་རིམ་སྨྱན་སྦྱོར་ལས་དོན་པའི་བརྟན་སྲུང་དང་འགན་འཁུར་ལ་བརྟེན་ནས་དུས་རབས་གསར་པའི་འགན་འཁྲི་ལག་བསྟར་བྱེད་ཀྱི་ཡིན་ཞེས་བཤད།

(པར་ངོས་གསུམ་པར་གཟིགས)(པར་ངོས་དང་པོར་མཐུད) ནག་ཆུ་གྲོང་ཨུད་དྲིལ་བསྒྲགས་པུའི་པུའུ་ཀྲང་གཞོན་པ་ཟླ་བ་རིག་འཛིན་གྱིས། ང་ཚོས་ལྗོངས་ཡོངས་ཀྱི་དྲིལ་བསྒྲགས་པུའུ་ཀྲང་གི་ཚོགས་འདུའི་དགོངས་དོན་ལག་བསྟར་དོན་འཁྱོལ་ནན་ཏན་བྱས་ཏེ། ཡང་དག་པའི་ཆབ་སྲིད་ཀྱི་ཁ་ཕྱོགས་དང་གླེང་ཕྱོགས་ཀྱི་ཁྲིད་སྟོན་ལ་སྟངས་འཛིན་ནན་པོ་བྱེད་པ་དང་། བརྗོད་དོན་གཙོ་བོ་མཆོག་ཏུ་འཛིན་པ་དང་དྲང་ནུས་སྟོབས་ཆེར་བཏང་ནས་ས་མཐོའི་འབྲོག་ལས་དང་ནུས་རྒྱུ་གཙང་མ་སོགས་ཁྱད་ལྡན་ཐོན་ལས་ཀྱི་གསར་འགྱུར་གཏོང་སྤེལ་སྔར་ལས་གཏིང་ཟབ་དང་། གཞི་རིམ་གྱི་འཐབ་ས་དང་པོའི་གསོན་ཉམས་དོད་པའི་གཏམ་རྒྱུད་ལ་དམིགས་པ། སྐྱེ་ཁམས་སྲུང་སྐྱོང་གི་དགེ་མཚན་ལྡན་པའི་ཕན་འབྲས་དེ་བས་སྔོག་འདོན་བཅས་བྱས་ཏེ། ཆབ་སྲིད་ཀྱི་འགན་འཁྲི་འཁུར་བ་དང་དམངས་འཚོའི་བདེ་རྩ་ཆེ་རུ་གཏོང་བའི་ཁྲོད་ནག་ཆུའི་ལག་ལེན་མངོན་པར་བྱེད་ཀྱི་ཡིན་ཞེས་བཤད།

ཆབ་མདོ་གྲོང་ཁྱེར་དཔལ་འབར་རྫོང་ཨུད་ཀྱི་རྒྱུན་ཨུ་དང་དྲིལ་བསྒྲགས་པུའི་པུའུ་ཀྲང་ཝང་ཝུན་ཤིང་གིས་ཁ་ཕྱོགས་གཙོ་བོ་དམ་འཛིན་བྱ་རྒྱུ་དེ་ཧ་ཅང་གལ་འགངས་ཆེ་བ་ཞིག་ཡིན། དཔལ་འབར་རྫོང་དྲིལ་བསྒྲགས་ཁོངས་གཏོགས་ཀྱིས་ཏང་གི་གསར་གཏོད་རིགས་པའི་གཞུང་ལུགས་ལ་བརྟེན་ནས་བློ་སྒྲིལ་སེམས་སྐྱེད་ཀྱིས་གཙོ་རྒྱུན་བསམ་བློའི་གླེང་ཕྱོགས་སྟོབས་ཆེར་བཏང་ཡོད། སྤྱི་ཡོངས་ལ་ཞབས་འདེགས་ཞུ་བའི་ཐད། དཔལ་འབར་རྫོང་དྲིལ་བསྒྲགས་ཁོངས་གཏོགས་ཀྱིས་ལྗོངས་ཡོངས་ཀྱི་འཕེལ་རྒྱས་ཀྱི་སྤྱི་ཡོངས་དང་མཉམ་འདྲེས་ཧུར་ཐག་བྱས་ཏེ“དོན་ཆེན་བཞི”དང“འཛུགས་གཏོད་བཞིར”དམིགས་ཏེ་ཏང་གི་གསུང་སྒྲ་བརྒྱུད་བསྒྲགས་དང་དཔལ་འབར་གྱི་གཏམ་རྒྱུད་ཡག་པོ་བརྗོད་ཀྱི་ཡིན་ཞེས་བཤད།

(པ་སངས་ཀྱིས་བསྒྱུར། པ་སངས་དང་ཚེ་ལྷས་ཞུས)