ཕ་མཐའ་ཡས་པའི་ཨ་སྔོན་མཐོན་མཐིང་ངོར། །

འོ་འཐུང་སྲོག་ཆགས་འཕུར་ནུས་གཅིག་ཤོས་མཁན། །

བྱ་གཤོག་བྱི་སོ་མངའ་བའི་ཕ་ཝང་ཀྱེ། །

ལན་གཅིག་བདག་གི་ཕྱོགས་ལ་སྙན་གསོན་དང་། །

འོ་འཐུང་ཁྲོད་ནས་འཕུར་ནུས་གཅིག་པུ་ཞེས། །

མཚན་བཟང་ཀུན་ལ་གྲགས་པ་ངོ་མཚར་ཡང་། །

བྱ་གཤོག་བྱི་སོ་སྟོན་པའི་རྣམ་ཐར་དེས། །

གྲགས་པ་ཉམས་པར་བྱེད་པ་ཨེ་ཤེས་ལགས། །

བྱ་ཡི་གཟན་འབྲུ་བགོ་བཤའ་བགོ་བའི་ཚེ། །

ང་ལ་མ་བྱུང་ཟེར་ཞིང་སྨྲེ་སྔགས་འདོན། །

བྱི་བའི་གཟན་ཆག་ཆ་ཤས་དབྱེ་བའི་དུས། །

ང་ལ་བགོ་རོགས་སྨྲས་ཤིང་ཀུ་ཅོ་བྱེད། །

བྱ་བྱི་གཉིས་ཀའི་ཐོབ་ཆ་ཐོབ་པ་ན། །

སུ་ལའང་ལགས་སོ་ཞུ་བའི་གཏོང་ཕོད་མངའ། །

གཉིས་ཀའི་ཐོབ་ཆ་གང་ཡང་མ་ཐོབ་ཚེ། །

གཉེན་ལའང་དགྲ་རུ་ལྟ་བའི་གདུག་རྩུབ་མཆིས། །

ཐོབ་ཆ་གཅིག་ཐོབ་གཅིག་ཤོས་མ་ཐོབ་དུས། །

སྤྲོད་མཁན་དེ་ལ་དྲིན་འཇལ་བསམ་པས་སྟོངས། །

མི་སྤྲོད་མཁན་ལ་འཁོན་འཛིན་ཆེར་འཛིན་ཏེ། །

ནམ་ཞིག་དུག་རྫས་སྤྱད་ནས་གཞོམ་པར་འདོད། །

འོན་ཏེ་བྱ་ཁྲལ་བསྡུ་དུས་བྱི་སོ་སྟོན། །

བྱི་ཁྲལ་བསྡུས་ཚེ་བྱ་གཤོག་ལེགས་བསྟན་ནས། །

བྱ་བྱིའི་ཁྲལ་ལས་ཐར་བར་རྩོམ་པ་པོ། །

བསམ་ངན་ཕ་ཝང་སྲིད་འདིར་མང་དོན་ཅི། །

བྱ་ཚོགས་བྱི་ཚོགས་དཔུང་གདང་ཤིག་ཤིག་ཏུ། །

རི་གཟར་རྦབ་རྡོ་འདྲ་བར་ཤོར་བའི་ཚེ། །

རང་ལུས་དུག་རྫས་མང་པོས་བྱུགས་པ་ན། །

ཀུན་ཀྱང་ཁྱོད་ལ་འཐབ་པའི་དཔུང་པ་ལྷོད། །

ཁ་ཅིག་དེ་ལྟའི་བསམ་ངན་མ་ཚོར་བས། །

ཁྱོད་ཉིད་ཉལ་བའི་དུས་སུ་བསད་བྱས་ཤིང་། །

ཤ་རྣམས་བཙོས་ཏེ་བཟའ་བར་གྱུར་པ་ན། །

ཁྱོད་ཀྱི་རྗེས་སུ་འབྲང་བའི་སྐལ་ལྡན་གྱུར། །

འདི་འདྲའི་བྱ་བྱེད་ངན་ཞིང་རྟུལ་ཕོད་མཁན། །

སྙན་གྲགས་བ་དན་མཁའ་ལ་གཡོས་གྱུར་ཀྱང་། །

ཀུན་གྱིས་འཛེམ་བྱའི་གནས་ལས་བཀུར་འོས་སུ། །

རུང་བ་སུ་ཡིས་འཛིན་ནམ་ཕ་ཝང་ལགས། །

གཡོ་སྒྱུ་ཁྲམ་གསུམ་མཁས་པའི་ཕ་ཝང་རྣམས། །

གྲོགས་སུ་བསྟེན་པའི་བྱ་སྤྱོད་དེ་འདྲ་བ། །

འཇིག་རྟེན་ཁམས་སུ་འབྱམས་པར་གྱུར་ཚེ་ན། །

རང་གཞན་ཕུང་བའི་སྦྱོར་བ་ལས་གཞན་ཅི། །

དེ་ཕྱིར་བསམ་སྦྱོར་ངན་པས་ཡོངས་གཏམས་ཤིང་། །

གཡོ་ཟོལ་ཆེ་བའི་དུག་ཁུར་ཕ་ཝང་རྣམས། །

རྒྱལ་ཁབ་ཁྲིམས་དང་འཇིག་རྟེན་མི་ཆོས་ཀྱིས། །

གཞུང་དྲང་བཟང་པོའི་ལམ་ལ་འགོད་རེ་རན། །