གསར་དར་ཐོན་ལས་དང་འབྱུང་འགྱུར་ཐོན་ལས་སྐྱེད་སྲིང་དང་སྟོབས་ཆེར་གཏོང་དགོས།

གསར་དར་ཀ་རྟེན་ཐོན་ལས་གཏོད་རྒྱུར་ཤུགས་རྒྱག་དགོས། ཐོན་ལས་གསར་གཏོད་ལས་གྲྭ་ལག་བསྟར་བྱེད་པ་དང་། གསར་གཏོད་སྒྲིག་བཀོད་འཛུགས་སྐྲུན་དང་། ལག་རྩལ་ཞིབ་འཇུག་གསར་སྤེལ། ཐོན་རྫས་རབས་བརྗེ་རིམ་སྤོར་བཅས་ལ་གཞི་གཅིག་ཏུ་སྐུལ་འདེད་གཏོང་དགོས། ནུས་ཁུངས་གསར་པ་དང་། རྒྱུ་ཆ་གསར་པ། མཁའ་འགྲུལ་མཁའ་སྐྱོད། དམའ་དབྱིངས་དཔལ་འབྱོར་སོགས་འཐབ་ཇུས་རང་བཞིན་གྱི་གསར་དར་ཐོན་ལས་ཁྱུ་ཚོགས་འཕེལ་རྒྱས་གང་མགྱོགས་གཏོང་དགོས། ཐོན་ལས་སྐྱེ་ཁམས་འཐུས་ཚང་དུ་གཏོང་བ་དང་། ལག་རྩལ་གསར་པ་དང་། ཐོན་རྫས་གསར་པ། གནས་ལྗོངས་གསར་པ་བཅས་གཞི་ཁྱོན་ཆེན་པོས་བཀོལ་སྤྱོད་བྱེད་པའི་དཔེ་སྟོན་བྱ་སྤྱོད་ལག་བསྟར་བྱེད་པ་དང་། གསར་དར་ཐོན་ལས་གཞི་ཁྱོན་ཅན་དུ་འཕེལ་རྒྱས་གང་མགྱོགས་གཏོང་དགོས།

ཞབས་ཞུའི་ལས་རིགས་འཕེལ་རྒྱས་སྤུས་ལེགས་ནུས་ཆེ་ཡོང་བར་སྐུལ་སྤེལ་གཏོང་དགོས།

ཞབས་ཞུའི་ལས་རིགས་ཀྱི་ནུས་པ་རྒྱ་སྐྱེད་དང་སྤུས་ཚད་མཐོར་འདེགས་བྱ་སྤྱོད་ལག་བསྟར་བྱེད་པ་དང་། ཞབས་ཞུའི་ལས་རིགས་ཀྱི་སྒོ་མོ་འབྱེད་རྒྱ་ཆེ་རུ་གཏོང་དགོས། ལྟ་སྐུལ་དོ་དམ་སྒྱུར་བཅོས་ཟབ་སྤེལ་བྱེད་པ་དང་། རྒྱབ་སྐྱོར་སྲིད་ཇུས་མ་ལག་འཐུས་ཚང་དུ་གཏོང་བ་དང་། གཉེར་སྐྱོང་བྱེད་པོ་སྤུས་ལེགས་རྒྱ་སྐྱེད་གཏོང་དགོས། ཁྱབ་ཁོངས་དབྱེ་ནས་ཐོན་སྐྱེད་རང་བཞིན་གྱི་ཞབས་ཞུའི་ལས་རིགས་དག་ཆེད་ལས་ཅན་དང་རིན་ཐང་མུ་ཕྲེང་གི་མཐོ་རིམ་ཕྱོགས་སུ་སྣུར་སྲིང་བྱ་རྒྱུར་སྐུལ་འདེད་བཏང་སྟེ། འཚོ་བའི་རང་བཞིན་གྱི་ཞབས་ཞུའི་ལས་རིཌ་སྤུས་ཚད་མཐོ་བ་དང་། སྣ་མང་ཅན། སྟབས་བདེ་ཅན་བཅས་སུ་འཕེལ་རྒྱས་འགྲོ་བར་སྐུལ་སྤེལ་གཏོང་དགོས། དེང་རབས་ཞབས་ཞུའི་ལས་རིཌ་དེ་སྔོན་ཐོན་བཟོ་སྐྲུན་ལས་རིགས་དང་དེང་རབས་ཞིང་ལས་དང་མཉམ་འདྲེས་སྒོས་འཕེལ་རྒྱས་འགྲོ་བའི་ཆུ་ཚད་མཐོ་རུ་གཏོང་བ་དང་། ཞབས་ཞུའི་ལས་རིཌ་གྲངས་རིག་ཅན་དུ་འགྱུར་བར་སྐུལ་འདེད་གཏོང་དགོས། ཞབས་ཞུའི་ཚད་གཞི་དང་སྤུས་ཚད་དང་སྤུས་རྟགས་བཅས་འཛུགས་སྐྲུན་བྱེད་པར་ཤུགས་རྒྱག་དགོས། ཞབས་ཞུའི་ལས་རིགས་ཀྱི་བསྡོམས་རྩིས་ལྟ་ཞིབ་ཚད་ལེན་མ་ལག་ཆ་ཚང་དུ་གཏོང་དགོས།

དེང་རབས་ཅན་གྱི་རྨང་གཞིའི་སྒྲིག་བཀོད་མ་ལག་འཛུགས་དགོས།

རྨང་གཞིའི་སྒྲིག་བཀོད་གཅིག་འདོམས་ཀྱིས་འཆར་འགོད་བྱེད་ཤུགས་ཆེ་རུ་གཏོང་བ་དང་། བཀོད་པའི་གྲུབ་ཚུལ་ལེགས་སྒྱུར་བྱེད་པ། འདུས་གྲུབ་མཉམ་འདྲེས་ཡོང་བར་སྐུལ་སྤེལ་གཏོང་བ། བདེ་འཇགས་ཀྱི་ལྡེམ་གཤིས་དང་གཉེར་སྐྱོང་གི་རྒྱུན་མཐུད་རང་བཞིན་ཆེ་རུ་གཏོང་བ་བཅས་བྱེད་དགོས། རྨང་གཞིའི་སྒྲིག་བཀོད་དཔེ་གསར་སྔོན་བརྒལ་འོས་འཚམ་གྱིས་འཛུགས་སྐྲུན་བྱས་ཏེ། ཆ་འཕྲིན་དང་འཕྲིན་གཏོང་དྲ་རྒྱ་དང་། རྒྱལ་ཡོངས་གཞི་གཅིག་ཅན་གྱི་རྩི་ནུས་དྲ་རྒྱ། ཚན་རྩལ་གྱི་རྨང་གཞིའི་སྒྲིག་བཀོད་གནད་ཆེན་སོགས་འཛུགས་སྐྲུན་དང་ལེགས་བསྡུས་ཞིབ་གཉེར་དང་ནུས་ཆེའི་བེད་སྤྱོད་བྱེད་པར་སྐུལ་འདེད་གཏོང་དགོས། སྲོལ་རྒྱུན་གྱི་རྨང་གཞིའི་སྒྲིག་བཀོད་གསར་སྒྱུར་དང་རིག་གྲངས་ཅན་དུ་སྒྱུར་བཀོད་བྱེད་པར་སྐུལ་འདེད་གཏོང་དགོས། དེང་རབས་ཅན་གྱི་ཕྱོགས་བསྡུས་འགྲིམ་འགྲུལ་སྐྱེལ་འདྲེན་མ་ལག་འཐུས་ཚང་དུ་བཏང་སྟེ། ས་ཁོངས་བརྒལ་ནས་གཅིག་འདོམས་ཀྱིས་བཀོད་སྒྲིག་དང་། བྱེད་སྟངས་བརྒལ་ནས་གཞི་གཅིག་ཏུ་སྦྲེལ་བར་ཤུགས་རྒྱག་དགོས་པ་དང་། ཉམས་ཞན་ས་ཁུལ་དུ་ཁེབས་པ་དང་ཤར་བགྲོད་ཐུབ་པའི་འགན་སྲུང་བྱེད་ཤུགས་ཆེ་རུ་གཏོང་དགོས། སྣ་མང་ཅན་དང་ལྡེམ་གཤིས་ཆེ་བའི་རྒྱལ་སྤྱིའི་སྐྱེལ་འདྲེན་རྒྱུ་ལམ་མ་ལག་ཆ་ཚང་དུ་གཏོང་དགོས། ནུས་ཁུངས་རྒྱུ་ལམ་རྐང་འཛིན་གྱི་བཀོད་པ་ལེགས་སྒྱུར་བྱེད་པ་དང་། ནུས་ཁུངས་དཔེ་གསར་གྱི་རྨང་གཞིའི་སྒྲིག་བཀོད་འཛུགས་སྐྲུན་བྱེད་ཤུགས་ཆེ་རུ་གཏོང་དགོས། དེང་རབས་ཅན་གྱི་ཆུ་དྲ་འཛུགས་སྐྲུན་མགྱོགས་སུ་གཏོང་བ་དང་། ཆུ་ལོག་དང་ཞོད་སྐྱོན་གྱི་གནོད་འཚེ་འགོག་སྲུང་དང་། ཆུའི་ཐོན་ཁུངས་གཅིག་འདོམས་ཀྱིས་བཀོད་སྒྲིག གྲོང་ཁྱེར་དང་གྲོང་གསེབ་ཀྱི་ཆུ་འདོན་སྤྲོད་འགན་སྲུང་བྱེད་ནུས་བཅས་ཆེ་རུ་གཏོང་དགོས། གྲོང་ཁྱེར་གྱི་དལ་བྲེལ་གཉིས་སྤྱོད་ཀྱི་སྤྱི་པའི་རྨང་གཞིའི་སྒྲིག་བཀོད་འཛུགས་སྐྲུན་བྱེད་པར་སྐུལ་འདེད་གཏོང་དགོས།

འཛད་སྤྱོད་ཤུགས་ཆེར་གཏོང་དགོས།

འཛད་སྤྱོད་ཤུགས་ཆེར་གཏོང་བའི་ཆེད་དམིགས་བྱ་སྤྱོད་ལག་བསྟར་གཏིང་ཟབ་བྱེད་དགོས། ལས་ཞུགས་ལ་སྐུལ་སྤེལ་དང་། ཡོང་འབབ་འཕར་སྣོན། སྔོན་དཔག་བརྟན་པོ་བཅས་གཅིག་གྱུར་འཆར་འགོད་བྱེད་པ་དང་། སྤྱི་པའི་ཞབས་ཞུའི་གཏོང་སྒོས་ནོར་སྲིད་གཏོང་སྒོའི་ནང་ཟིན་པའི་བསྡུར་ཚད་ལུགས་དང་མཐུན་པར་མཐོ་རུ་གཏོང་བ་དང་། སྡོད་དམངས་ཀྱི་འཛད་སྤྱོད་ནུས་པ་ཆེ་རུ་གཏོང་དགོས། འཛད་སྤྱོད་ཐོན་རྫས་དང་ཞབས་ཞུ་སྤུས་ལེགས་འདོན་སྤྲོད་བྱེད་རྒྱ་ཆེ་རུ་གཏོང་དགོས། ཞུགས་འཐུས་ལྷུག་གཏོང་དང་ལས་རྣམ་མཉམ་འདྲེས་གཙོ་གནད་དུ་བཟུང་ནས་ཞབས་ཞུའི་འཛད་སྤྱོད་རྒྱ་སྐྱེད་གཏོང་བ་དང་། སྤུས་རྟགས་སྣེ་ཁྲིད་དང་། ཚད་གཞི་རིམ་སྤོར། ལག་རྩལ་གསར་པ་ཉེར་སྤྱོད་བཅས་བྱེད་ཤུགས་ཆེ་རུ་གཏོང་བ། ཚོང་ཟོག་འཛད་སྤྱོད་རྒྱ་སྐྱེད་རིམ་སྤོར་ཡོང་བར་སྐུལ་འདེད་གཏོང་བ་བཅས་བྱས་ཏེ། སྐུལ་ཁྲིད་བྱེད་རྒྱ་ཆེ་ཞིང་མངོན་པར་གསལ་ཚད་མཐོ་བའི་འཛད་སྤྱོད་གནས་ལྗོངས་གསར་པ་ཁག་ཅིག་གཏོད་དགོས། རྒྱལ་སྤྱིའི་འཛད་སྤྱོད་ལྟེ་གནས་ཀྱི་གྲོང་ཁྱེར་སྐྱེད་སྲིང་དང་། ཁོངས་འཛུལ་འཛད་སྤྱོད་རྒྱ་སྐྱེད་གཏོང་དགོས། ཐད་ཀར་འཛད་སྤྱོད་པར་ཕན་པའི་ཀུན་ཕན་སྲིད་ཇུས་ལག་བསྟར་བྱེད་ཤུགས་ཆེ་རུ་གཏོང་བ་དང་། སྲིད་གཞུང་གི་མ་དངུལ་དམངས་འཚོ་འགན་སྲུང་ཐད་ལ་སྤྱོད་པའི་གཏོང་སྒོ་མང་དུ་གཏོང་དགོས། འཛད་སྤྱོད་ལ་སྐུལ་སྤེལ་གཏོང་བའི་ལམ་ལུགས་དང་ལམ་སྲོལ་འཐུས་ཚང་དུ་གཏོང་བ་དང་། རླངས་འཁོར་དང་སྡོད་ཁང་སོགས་འཛད་སྤྱོད་ཐད་ལུགས་དང་མི་མཐུན་པའི་ཚོད་འཛིན་རང་བཞིན་གྱི་བྱེད་ཐབས་གཙང་བཤེར། འཛད་སྤྱོད་ཀྱི་ལས་རྣམ་གསར་པ་དང་། དཔེ་དབྱིབས་གསར་པ། གནས་ལྗོངས་གསར་པ་བཅས་དང་འཚམ་པའི་དོ་དམ་བྱེད་ཐབས་འཛུགས་པ་དང་ཆ་ཚང་དུ་གཏོང་བ། ཕོགས་ལྡན་འཚང་གཡོལ་གྱི་གུང་སེང་གཏོང་བ་དོན་འཁྱོལ་བཅས་བྱེད་དགོས། འཛད་སྤྱོད་པའི་ཁེ་དབང་སྲུང་སྐྱོབ་བྱེད་ཤུགས་ཆེ་རུ་གཏོང་དགོས།