གསར་འགོད་པ། ཉི་མ་ཚེ་རིང་། ཚེ་བརྟན་རྡོ་རྗེ། བསོད་ནམས་མཚོ་མོ། སྒྲོལ་དཀར།

2004ལོར། ཕ་ཡུལ་ནག་ཆུ་ཨ་མདོ་རྫོང་རྩྭ་རིང་གྲོང་རྡལ་ནས་ཡིན་པའི་བདེ་སྐྱིད་གཡང་འཛོམས་ཧྭ་ཏུང་དགེ་འོས་སློབ་ཆེན་ནས་ཐོན་རྗེས་ལྷ་ས་དགེ་འོས་སློབ་ཆེན（དེ་སྔའི་ལྷ་ས་དགེ་འོས་མཐོ་རིམ་ཆེད་ཚན་སློབ་གྲྭ）དུ་དགེ་རྒན་གྱི་ལས་ལ་གཞོལ་ཞིང་། སློབ་མ་བསྐྱངས་ནས་ད་བར་ལོ་ངོ་21ཙམ་སོང་། མིག་སྔར་ཁོང་གིས་སློབ་ཚན་འཁྲིད་ཞོར་དུ་རྒྱ་ཡིག་སློབ་དཔྱོད་ཁང་གི་ཀྲུའུ་རེན་གྱི་འགན་གཅིག་ལྕོགས་འཁུར་བཞིན་ཡོད།

གསར་འགོད་པས་ཁོང་ལ་ཐོག་མར་དགེ་རྒན་གྱི་ལས་ལ་འཇུག་དོན་གང་ཡིན་ཞེས་འདྲི་སྐབས། ཁོང་གིས“ང་དགེ་རྒན་བྱེད་པའི་ལས་འབྲེལ་དེ་སྔ་མོ་ཞིག་ནས་འགོ་ཚུགས་པའི་སྣང་བ་ཞིག་འདུག ང་རང་ཆུང་དུས་རྩྭ་རིང་གྲོང་རྡལ་སློབ་ཆུང་དུ་སྤོ་བོ་རྨོ་བོ་གཉིས་དང་མཉམ་དུ་འཚོ་བ་བསྐྱལ་ནས་བསྡད་པ་ཡིན་པས། དེ་གར་སློབ་གྲྭའི་ཅོང་སྒྲ་དང་སློབ་མའི་དཔེ་ཀློག་གི་སྒྲ་སྙན་པོ་རྒྱུན་ཆད་རྒྱུ་མེད་པར་ཐོས་རྒྱུ་ཡོད། སྒྲ་དབྱངས་སྙན་པོ་དེ་དག་ངའི་དྲན་པའི་ངོས་སུ་ད་ལྟའང་གསལ་ལེར་འཆར་ཐུབ་ལ། བྱིས་དུས་ཀྱི་འཚོ་བའི་ཁྲོད་ཆ་རྒྱུས་ཆེ་ཤོས་ཡིན་པའི་དབྱངས་རྟ་ཞིག་ཏུ་འགྱུར། ངའི་སྤོ་བོ་ལགས་སློབ་ཆུང་དེ་གའི་དགེ་རྒན་རེད། རྒྱུན་དུ་སྤོ་བོ་ལགས་ཀྱིས་ང་ལ་ཁ་ཏ་བསླབ་བྱ་མང་པོ་གནང་གི་ཡོད། ང་ལ་མཚོན་ན་སྤོ་བོ་ལགས་ཁོང་ངའི་མི་ཚེའི་ལམ་བུའི་ཁྲོད་ཀྱི་ལམ་སྟོན་སྒྲོན་མེ་གལ་ཆེན་ཞིག་ཡིན། སྐབས་དེ་ནས་བཟུང་ངའི་སེམས་ནང་མ་འོངས་པར་དགེ་རྒན་ཞིག་བྱ་རྒྱུའི་བློ་ཐག་རྦད་དེ་བཅད། དེར་བརྟེན་མཐོ་རྒྱུགས་སྐབས་སུ་ཐེ་ཚོམ་སྤུ་ཙམ་ཡང་མེད་པར་ཧྭ་ཏུང་དགེ་འོས་སློབ་ཆེན་གྱི་དགེ་འོས་ཆེད་ལས་བདམས་པ་ཡིན”ཞེས་བཤད།

མཐོ་འབྲིང་སྐབས་སུ་ཁོང་གིས་འཕྲལ་སེལ་སླ་བཅོས་ཀྱི་བསམ་པ་ཡོངས་སུ་སྤངས་ནས་འབད་འབུངས་ལྷོད་མེད་ཀྱིས་སློབ་སྦྱོང་བྱས་སྟབས། རེ་བའི་ལས་ལ་འབྲས་བཟང་སྨིན་ནས་བདེ་བླག་ངང་ཧྭ་ཏུང་དགེ་འོས་སློབ་ཆེན་དུ་ཚུད་དེ་དགེ་འོས་ཆེད་ལས་སྦྱོང་བའི་སྐལ་བ་བཟང་པོ་ཐོབ། ཁོང་གི་སེམས་ནང་སྔ་ས་ནས་དགེ་རྒན་བྱེད་འདོད་ཡོད་པས་དགེ་འོས་དང་འབྲེལ་བའི་སློབ་ཚན་ཁག་ལ་ཧ་ཅང་དགའ། དགེ་རྒན་གྱིས་བསྐུལ་བའི་ལས་ཀར་ཆུ་བོ་འབབ་འབབ་ཅེས་པའི་ཟེར་སྒྲོས་ལྟར་འཁོན་ཐོགས་སྤུ་ཙམ་ཡང་མེད་པར་ལམ་སེང་བསྒྲུབས་པས། ལོ་ངོ་བཞིའི་རིང་དགེ་རྒན་གྱིས་ཐོག་མཐའ་བར་གསུམ་དུ་ཁོང་གི་སློབ་སྦྱོང་གི་རྣམ་པར་གདེང་འཇོག་མཐོ་པོ་བྱེད་ཀྱི་ཡོད་པ་དང་། སློབ་གྲྭ་ཐོན་ཁར་ཁོང་ལ“ལྕགས་ཅི་བཟོ་མགར་བའི་ལག་པ་རེད། ཟོག་ཅི་བྱེད་བདག་པོའི་ལག་པ་རེད”ཅེས་པའི་ཟེར་སྒྲོས་ལྟར་སློབ་མའི་མ་འོངས་དེ་དགེ་རྒན་དང་འབྲེལ་བ་དམ་ཟབ་ཡོད་པས། རང་ཡུལ་དུ་ལོག་ནས་སློབ་མ་སྐྱོང་མཁན་གྱི་དགེ་རྒན་བཟང་པོ་ཞིག་བྱེད་དགོས་ཚུལ་སློབ་གསོ་རྒྱག་གི་ཡོད་པ་རེད།

སློབ་གསོའི་བྱ་གཞག་ཁྲོད་སློབ་མ་ནི་དགེ་རྒན་གྱི་སྒུལ་ཤུགས་ཆེ་ཤོས་དེ་ཡིན་པ་སྨོས་མེད་ལགས། དགེ་འོས་སློབ་གྲྭའི་རྒན་རབས་པ་ཚོས་ཀྱང་ལས་ཀར་ཞུགས་མ་ཐག་པའི་བདེ་སྐྱིད་གཡང་འཛོམས་ལ་སློབ་མ་རྣམས་ནི་རེ་བའི་ས་བོན་ཞིག་ཡིན་པས། མ་འོངས་པའི་ལོ་ཟླའི་ནང་འབྲས་བུའི་ཁུར་གྱིས་དུད་པའི་ལོ་འབྲས་སྨིན་པའི་རེ་བ་ཆེན་པོ་ཡོད། རང་གིས་དུས་དང་རྣམ་པ་ཀུན་ཏུ་ཁོ་ཚོའི་སློབ་སྦྱོང་དང་འཚོ་བར་དོ་སྣང་བྱས་ནས་བདེ་མ་ཐང་མའི་ངང་འཚར་ལོངས་ཡོང་བར་འགན་ལེན་བྱེད་དགོས་ཞེས་ཡང་ཡང་བརྗོད་ཀྱི་ཡོད་པ་རེད།

ཁོང་གིས་ལོ་ངོ་21ཉིན་གཅིག་ལྟར་སེམས་རྣལ་ལ་ཕབ་ནས་སློབ་མ་རྣམས་ལ་སློབ་ཁྲིད་བྱེད་ཅིང་། སློབ་ཚན་མེད་པའི་སྐབས་སུ་འབྲེལ་ཡོད་ཀྱི་དཔེ་དེབ་མང་པོ་བཀླགས་ནས་རང་ཉིད་ཀྱི་བསམ་པའི་རྒྱགས་ཕྱེ་ཕུན་སུམ་ཇེ་ཚོགས་སུ་གཏོང་གི་ཡོད། ཁབ་རྒྱུས་མགར་བ་དང་། ཆུ་རྒྱུས་མཉན་པ་ཟབ་ཅེས་པ་ལྟར། ཁོང་ལ་ལོ་མང་རིང་དགེ་རྒན་བྱས་པའི་ཉམས་མྱོང་ཡོད་པས་སློབ་གསོའི་འགྲོ་ལུགས་ལ་རྒྱུས་མངའ་ཆེན་པོ་ཡོད་ཀྱང་། མི་ཚེའི་བགྲོད་ལམ་ཁྲོད་དུ་སློབ་ཆེན་སློབ་མའི་ལང་ཚོའི་དུས་ཚོད་བསྐྱར་ལོག་བྱེད་ཐབས་གཏན་ནས་མེད་པར་བསམས་ནས། ཁོང་གིས་རྒྱུན་པར་སློབ་མ་ཚོའི་རྩ་ཆེན་གྱི་དུས་ཚོད་ནང་ད་དུང་མུ་མཐུད་ག་རེ་སྦྱངས་ན་འཚམ་པ་ཡོད་མེད་སྐོར་བསམ་བློ་མང་པོ་གཏོང་གི་ཡོད། ཁོང་ལས་ཞུགས་བྱས་པ་ནས་ད་ལྟའི་བར་སློབ་མ་མང་པོ་བསྐྱངས་ཡོད་པ་དང་། སློབ་མ་འགའ་རེ་ཐོག་མར་རང་ཉིད་ཀྱིས་བདམས་པའི་ཆེད་ལས་ལ་དགའ་པོ་དེ་ཙམ་མེད་ཀྱང་། བརྩེ་བས་ཕྱུག་པའི་དགེ་རྒན་ཁོང་དང་འབྲེལ་འདྲིས་བྱས་རྗེས་རིམ་གྱིས་ཆེད་ལས་དེར་དགའ་ཞེན་སླེབས་ནས་རིག་པའི་གནས་ལ་བརྩོན་པ་ཆུ་བོའི་རྒྱུན་བཞིན་བསྟེན་གྱི་ཡོད་པ་རེད། ཁོང་འགྲོགས་བདེ་ལ་གཤིབ་བདེ་བས། སློབ་མཐར་ཕྱིན་རྗེས་དགེ་རྒན་གྱི་ལས་ཀ་བྱེད་བཞིན་ཡོད་པའི་ཁོང་གི་སློབ་མ་མང་པོས་ཁོང་ལ་འཚེར་སྣང་མེད་པའི་ངང་འབྲེལ་བ་བྱེད་པ་དང་། རྒྱུན་དུ“རྒན་ལགས་ཁྱེད་ཀྱིས་བསླབས་པའི་སློབ་ཁྲིད་ཐབས་ལམ་མང་པོ་ཞིག་ད་ལྟ་ང་རང་གིས་ཀྱང་སློབ་མ་ཚོར་བསླབས་དང་སློབ་མུས་ཡིན་ལ་ཕན་འབྲས་ཀྱང་ཆེན་པོ་འདུག”ཅེས་བརྗོད་ཀྱི་ཡོད། 2020ལོར་སློབ་ཐོན་བྱུང་བའི་ཁོང་གི་སློབ་མས་ཁོང་ལ《བརྩེ་བའི་བདེ་སྐྱིད་གཡང་འཛོམས》ཞེས་པའི་གཞས་ཤིག་བྲིས་ནས་དགེ་རྒན་ཁོང་ལ་བཅངས་པའི་བརྩེ་སེམས་ཟབ་མོ་མཚོན་པར་བྱས།

རྒན་ལགས་ཁོང་གི་སློབ་མ་མང་པོ་ཞིག་དགེ་རྒན་གྱི་ལས་གནས་ལ་ཞུགས་རྗེས་རང་འཁྲིའི་ལས་ལ་འབད་པ་ལྷུར་ལེན་བྱས་པས་འབྲས་བུའང་བཟང་པོ་ཐོབ་ཡོད། ཁོང་གི་སློབ་མ་ཝང་ཐེན་ཐེན་ལྟ་བུར་མཚོན་ན། ལྷ་ས་དགེ་འོས་སློབ་ཆེན་གྱི་སློབ་གྲྭའི་ཕུལ་བྱུང་མཆེད་གྲོགས་ཡིན་པ་དང་། སློབ་མ་དེ་2019ལོར་སློབ་མཐར་ཕྱིན་རྗེས་ཆབ་མདོ་གྲོང་ཁྱེར་འཇོ་མདའ་རྫོང་དཔལ་ཤང་སློབ་ཆུང་དུ་དགེ་རྒན་བྱེད་བཞིན་ཡོད་པ་དང་། རྒྱུན་དུ་ཧུར་ཐག་འབད་ཐག་གིས་གྲོང་གསེབ་ཀྱི་སློབ་གསོའི་བྱ་གཞག་ལ་སྟོབས་ཤུགས་སྐྱེས་སུ་ཕུལ་དང་འབུལ་བཞིན་ཡོད་པས། 2022ལོར་རྒྱལ་ཡོངས་མཐོ་སློབ་སློབ་ཐོན་སློབ་མའི་གཞི་རིམ་ལས་ཞུགས་ཀྱི་ཕུལ་བྱུང་བྱ་དགའ་ཐོབ།

བགྲང་བྱ་30ཡི་བོད་སྐྱོར་ཁྲོད་བོད་ཀྱི་སློབ་གསོའི་བྱ་གཞག་ལ་འགྱུར་ལྡོག་ཆེན་པོ་བྱུང་ཞིང“ཚོགས་སྒྲིག་རྣམ་པའི”སློབ་གསོའི་བོད་སྐྱོར་ལམ་སྲོལ་གྱིས་གངས་ལྗོངས་ས་མཐོའི་སློབ་གསོའི་བྱ་གཞག་མུ་མཐུད་གོང་དུ་འཕེལ་བར་རྨང་གཞི་བརྟན་པོ་བཏིང་ཡོད། བདེ་སྐྱིད་གཡང་འཛོམས་ཀྱིས་སློབ་གསོའི་བོད་སྐྱོར་གྱི་གོ་སྐབས་བཟང་པོ་སྤྱད་ནས་བོད་སྐྱོར་དགེ་རྒན་དང་ལྷན་དུ《བོད་ཀྱི་སློབ་སྐྱོར་གཏམ་རྒྱུད》ཅེས་པའི་དཔེ་དེབ་གཅིག་རྩོམ་སྒྲིག་བྱས་ནས་དཔེ་སྐྲུན་འགྲེམས་སྤེལ་བྱས་པར། སྤྱི་ཚོགས་ཐོག་འགྲེམས་སྤེལ་བྱས་མ་ཐག་སློབ་གསོའི་སྡེ་ཁག་ཁྲོད་དགའ་བསུ་ཆེན་པོ་ཐོབ་ཡོད་པ་རེད།

བདེ་སྐྱིད་གཡང་འཛོམས་ཀྱིས་སློབ་མར་སློབ་ཁྲིད་བྱེད་པ་ཕུད་སྤྱི་ཚོགས་ཀྱི་འགན་འཁྲི་ལག་ལེན་བསྟར་བའི་ཁྲོད་རང་ཉིད་ཀྱི་རིན་ཐང་མངོན་འགྱུར་བྱེད་ཀྱི་ཡོད་དེ། ཁོང་གིས་གཟའ་མཇུག་དུས་ཚོད་ཐེངས་མང་བློས་གཏོང་བྱས་ཏེ། རང་ཉིད་ཀྱི་ཆེད་ལས་ཀྱི་དགེ་མཚན་དང་མི་སྒེར་གྱི་དགའ་ཕྱོགས་ལ་གཞིགས་ནས་ཀརྨ་དགོན་གསར་སྡེ་ཁུལ་སོགས་ཀྱི་བྱིས་པ་ཚོར་བྱིས་སྒྲུང་མང་པོ་ཤོད་པ་དང་། དཔེ་ཀློག་མཛུབ་ཁྲིད་ཀྱི་བྱེད་སྒོ་སྤེལ་ནས་བྱིས་པའི་དཔེ་ཀློག་ཁྱབ་གདལ་གཏོང་གི་ཡོད།