དཔྱིད་མགོའི་ཆར་པ་ཟམ་ཟིམ། །
ནོར་འཛིན་བྲང་ལ་གཏོར་དུས། །
ཤ་འཇམ་ལུས་དྲི་ཞིམ་པའི། །
ཆུང་འདྲིས་ཡིད་ལ་འཁོར་བྱུང་། །
མེ་ཏོག་སྣ་ཚོགས་བཞད་ནས། །
ནེའུ་གསིང་བཀྲག་མདངས་རྒྱས་དུས། །
ལང་ཚོའི་དཔལ་གྱིས་ཕྱུག་པའི། །
ཆུང་འདྲིས་ཡིད་ལ་འཁོར་བྱུང་། །
གསེར་སྐུར་ཉི་འོད་ཕོག་འདྲའི། །
ནོར་འཛིན་སེར་མདངས་རྒྱས་དུས། །
དཀར་དམར་གཞོན་ཤ་རྒྱས་པའི། །
ཆུང་འདྲིས་ཡིད་ལ་འཁོར་བྱུང་། །
སྟོན་རླུང་དལ་གྱིས་ལྡང་བྱུང་། །
ལོ་མ་སེར་པོར་གྱུར་སོང་། །
བརྩེ་བའི་དྲོད་ཐིག་ཅན་གྱི། །
ཆུང་འདྲིས་ཡིད་ལ་འཁོར་བྱུང་། །
དུས་བཞིའི་འགྱུར་བའི་བར་དུ། །
དྲོ་གྲང་རེས་སུ་འཁོར་དུས། །
བརྩེ་སེམས་ཆུ་གཏེར་འདྲ་བའི། །
ཆུང་འདྲིས་ཡིད་ལ་འཁོར་བྱུང་། །