འདི་ག་ཚགས་པར་ཁང་དུ་ཆབ་མདོ་ནས་ཟླ་5ཚེས་18ཉིན་གློག་འཕྲིན་འབྱོར་གསལ། ཉེ་དུས་ཆབ་མདོ་གྲོང་ཁྱེར་དབང་པོ་སྐྱོན་ཅན་མཉམ་འབྲེལ་ལྷན་ཚོགས་ཀྱིས་རྒྱལ་ཡོངས་ཀྱི་དབང་པོ་སྐྱོན་ཅན་ལ་རོགས་རམ་བྱེད་པའི་ཉིན་མོའི་རིམ་སྤེལ་བྱེད་སྒོ་ཐེངས་སོ་ལྔ་པ་སྤེལ་བ་རེད།

བྱེད་སྒོ་སྤེལ་ཡུལ་དུ་ཆབ་མདོ་གྲོང་ཁྱེར་དབང་པོ་སྐྱོན་ཅན་མཉམ་འབྲེལ་ལྷན་ཚོགས་ཀྱིས་གྲོང་ཁྱེར་ཐད་གཏོགས་ཀྱི་འབྲེལ་ཡོད་སྡེ་ཚན་ཁག་གི་སྣེ་ཁྲིད་དེ་དྲིལ་བསྒྲགས་བློ་འདྲིའི་ས་ཚིགས་བཙུགས་ནས་གྲོང་མིར་དབང་པོ་སྐྱོན་ཅན་གྱི་ལས་ཞུགས་ལས་གཏོད་དང་། བདེ་ཐང་སླར་གསོའི་རོགས་སྐྱོབ། དབང་པོ་སྐྱོན་ཅན་ལ་ཕན་པ་དང་རམ་འདེགས་སོགས་ཀྱི་སྲིད་ཇུས་ཁྱབ་གདལ་བཏང་བ་དང་། ས་གནས་ས་ཐོག་ཏུ་དབང་པོ་སྐྱོན་ཅན་ལག་ཁྱེར་གཉེར་སྟངས་སྐོར་དང་དབང་པོ་སྐྱོན་ཅན་གྱི“ཁ་གསབ་ཁག་གཉིས”ཀྱི་སྲིད་ཇུས་སོགས་ལ་འགྲེལ་བཤད་བརྒྱབ་ཡོད། ད་ཐེངས་ཀྱི་བྱེད་སྒོའི་ནང་ཁྱོན་དྲིལ་བསྒྲགས་དཔྱད་ཡིག་1500ལྷག་ཙམ་དང་། རིག་གནས་གསར་གཏོད་ཐོན་རྫས་ཁག་500ལྷག་ཙམ། དབང་པོ་སྐྱོན་ཅན་གྱི་རམ་འདེགས་ཡོ་བྱད་སྣ་ཚོགས་44བཅས་སྒོར་ཁྲི་13900ཟིན་པའི་དངོས་ཟོག་སྤྲད་དེ་མང་ཚོགས་མི་ཐེངས་200ལྷག་ཙམ་ལ་སྲིད་ཇུས་ཀྱི་བློ་འདྲི་མཁོ་འདོན་བྱས་ཡོད་པ་རེད།

བྱེད་སྒོ་སྤེལ་རིང་། ཆབ་མདོ་གྲོང་ཁྱེར་དབང་པོ་སྐྱོན་ཅན་མཉམ་འབྲེལ་ལྷན་ཚོགས་ཀྱིས་ཁ་རུབ་ཆུས་ཀྱི་ཚབས་ཆེའི་དཀའ་ངལ་ཡོད་པའི་དབང་པོ་སྐྱོན་ཅན་མང་ཚོགས་ལ་ལྟ་བ་དང་འཚམས་འདྲི་བྱས་པ་མ་ཟད། དམིགས་བསལ་སློབ་གསོའི་སློབ་གྲྭའི་དབང་པོ་སྐྱོན་ཅན་གྱི་སློབ་མ་40དང་ཚབས་ཆེའི་དཀའ་ངལ་ཡོད་པའི་དབང་པོ་སྐྱོན་ཅན་10ལ་སྒོར་ཁྲི་5རི་བའི་འཚམས་འདྲིའི་དངུལ་དང་དངོས་ཟོག་སྤྲད་པ་རེད།

གཞན་ཡང་ཆབ་མདོ་གྲོང་ཁྱེར་ཐད་གཏོགས་འབྲེལ་ཡོད་ཚན་པ་ཁག་དང་རྫོང（ཆུས）དབང་པོ་སྐྱོན་ཅན་མཉམ་འབྲེལ་ལྷན་ཚོགས་ཀྱིས་ནང་དོན་ཕུན་སུམ་ཚོགས་པ་དང་རྣམ་པ་སྣ་ཚོགས་ཀྱི་དབང་པོ་སྐྱོན་ཅན་ལ་རོགས་རམ་བྱེད་པའི་བྱེད་སྒོ་མཉམ་དུ་སྤེལ་ཡོད། གྲོང་སྡོད་ལས་དོན་རུ་ཁག་གི་ནུས་པ་གང་ལེགས་བཏོན་ནས་གྲོང་ཚོའི་ཨུ་ལྷན་གཉིས་དང་གྲོང་ཚོ（སྡེ་ཁུལ）དབང་པོ་སྐྱོན་ཅན་མཐུན་ཚོགས་ཀྱི་ཆེད་བསྐོས་ཨུ་ཡོན་གྱིས་དུད་ཚང་དུ་བསྐྱོད་དེ་གཞི་རིམ་གྱི་དབང་པོ་སྐྱོན་ཅན་མང་ཚོགས་ཁྱིམ་ཚང་གི་ཐོན་སྐྱེད་དང་འཚོ་བའི་གནས་ཚུལ་ཤེས་རྟོགས་བྱས་ཏེ། དབང་པོ་སྐྱོན་ཅན་ལ་རོགས་རམ་བྱེད་པའི་སྲིད་ཇུས་དང་། དབང་པོ་སྐྱོན་ཅན་སྔོན་འགོག བདེ་ཐང་སླར་གསོའི་ཤེས་བྱ་བཅས་ཁྱབ་གདལ་བཏང་བ་མ་ཟད། ཁོང་ཚོར་འབད་བརྩོན་ལྷོད་མེད་དང་སྤྲོ་སྣང་ངང་འཚོ་བ་སྐྱེལ་དགོས་པའི་སྐུལ་ལྕག་ཀྱང་བྱས་པ་རེད།