དྲིན་ཕ་མའི་ཞལ་ནས་འདི་སྐད་ཐོས། །
ཆུ་གཙང་པོ་གཉིས་ལ་སྲུང་སྐྱོང་དགོས། །
ཆུ་གཙང་པོ་གཉིས་པོ་བསྐམས་སོང་ན། །
ངེད་སྐྱེ་དངོས་སེམས་ཅན་ཇི་ལྟར་འཚོ། །
དྲིན་ཕ་མའི་ཞལ་ནས་འདི་སྐད་ཐོས། །
རྩྭ་རྩི་ཤིང་གཉིས་ལ་བདག་སྐྱོང་དགོས། །
རྩྭ་རྩི་ཤིང་གཉིས་པོ་བཅད་དྲགས་ན། །
ལ་ལུང་པ་ཐལ་རླུང་དྲག་པོས་ཁེངས། །
དྲིན་ཕ་མའི་ཞལ་ནས་འདི་སྐད་ཐོས། །
ཟོག་སེམས་ཅན་ང་ཚོའི་ཕ་མ་རེད། །
བྱམས་སྙིང་རྗེས་ལེགས་པར་སྐྱོང་བ་ལས། །
དངུལ་སྒོར་མོར་ཚད་མེད་མ་བརྗེས་གསུངས། །
དྲིན་ཕ་མའི་ཞལ་ནས་འདི་སྐད་ཐོས། །
ནང་ཕུ་ནུ་ཕན་ཚུན་མ་འཁྲུགས་པར། །
འདང་བརྩེ་བ་ཟབ་མོས་སྐྱོང་ནུས་ན། །
ཕྱི་དགྲ་བོའི་འཚེ་བས་མི་ཐུབ་གསུངས། །
དྲིན་ཕ་མའི་ཞལ་ནས་འདི་སྐད་ཐོས། །
ཁྲེལ་ངོ་ཚའི་གཡང་ལུགས་རྒྱུན་དུ་གྱོན། །
ལས་རྒྱུ་འབྲས་མེ་ལོང་གཙུག་ཏུ་བསྟེན། །
དུས་ནམ་ཡང་སེམས་ལ་བྱི་དོར་བྱོས། །
དྲིན་ཕ་མའི་ཞལ་ནས་འདི་སྐད་ཐོས། །
སྐད་ཡི་གེ་ཤེས་བྱའི་བང་མཛོད་ཀྱི། །
སྒོ་འབྱེད་པའི་ལྡེ་མིག་ལྟ་བུ་ཡིན། །
སེམས་རྣམ་གཡེང་མེད་པར་སྦྱོངས་ཤིག་གསུངས། །