མཛེས་མཛེས་གསེར་གྱི་འཛིན་མ་རུ། །

འདབ་དཀར་མེ་ཏོག་བཞད་དུས་དེར། །

མིག་ཟུང་གཤོག་དྲུག་གཞོན་ནུ་ཡིས། །

ཡིད་འོང་དགའ་སྟོན་ངོམ་ལ་བྲེལ། །

དྭངས་གསལ་དབྱིངས་ཀྱི་མེ་ལོང་ངོས། །

སྤྲིན་དཀར་ལང་ལོང་འཁྱུད་པ་ཡིས། །

འཇམ་མཉེན་མདངས་ལྡན་ཁ་བ་དེས། །

ནོར་འཛིན་སྒེག་མོར་ཅི་ཡང་བརྒྱན། །

ཡིད་ངོར་མཛེས་པའི་ལྕུག་ཕྲན་དང་། །

ཚང་ཚིང་ནགས་ཀྱི་ལྗོན་པ་སོགས། །

ཚ་གདུག་དྲོད་ཀྱིས་མ་བཟོད་པས། །

རབ་དཀར་རྨོག་ཞྭ་གྱོན་པར་བྲེལ། །

ཁ་བ་དགུང་སྔོན་ཉི་ཟླའི་ཆབ། །

དལ་དལ་རླུང་བུས་དེད་པ་ཡིས། །

སྤྲིན་པའི་གསེབ་ནས་ཉིལ་ལི་ལི། །

ཡངས་པའི་འཛིན་མར་ལྷབ་ལྷུབ་འཇོ། །

ཁ་བ་བཀྲ་ཤིས་རྟགས་བཟང་པོ། །

བརྗིད་ཆགས་གངས་ཀྱི་རྒྱན་དུ་རོལ། །

ནག་ནོག་མ་འདྲེས་དཀར་ཞིང་མཛེས། །

མཛེས་སྡུག་སྟོང་གི་མཆོག་ཏུ་གྱུར། །

དཔྱིད་དཔལ་བསུ་བའི་དུས་བཟང་ལ། །

དཀར་འཇམ་ཚ་རུའི་མདངས་ལྡན་པའི། །

ཁ་བ་བརླན་གྱི་བདག་ཉིད་དེས། །

རྩི་ཤིང་སྣ་ཚོགས་གཉིད་ལས་བསླངས། །