ད་ལོ་ཚུན་དུ། 《<ཕྱོགས་ཡོངས་ནས་སྒྱུར་བཅོས་སྔར་བས་ཟབ་གཏོང་དང་ཀྲུང་གོའི་ལུགས་ཀྱི་དེང་རབས་ཅན་ལ་སྐུལ་འདེད་གཏོང་བའི་སྐོར་གྱི་ཀྲུང་གུང་ཀྲུང་དབྱང་གི་གཏན་འབེབས>ལག་བསྟར་དོན་འཁྱོལ་བྱ་རྒྱུའི་སྐོར་གྱི་ཀྲུང་གུང་བོད་རང་སྐྱོང་ལྗོངས་ཨུ་ཡོན་ལྷན་ཁང་གི་ལག་བསྟར་བསམ་འཆར》ལག་བསྟར་དོན་འཁྱོལ་དང་། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་རྩ་འཛུགས་ཀྱི་འགོ་ཁྲིད་ལ་ཤུགས་སྣོན་དང་སྤྱི་འདོམས་མཐུན་སྦྱོར་ནུས་ལྡན་བྱས་པས། ལྗོངས་ཡོངས་ཀྱི་དཔལ་འབྱོར་དུས་ཚིགས་རེ་རེ་བཞིན་བརྟན་ཐོག་ཡར་འཕེལ་གྱི་འཕེལ་ཕྱོགས་བཟང་པོ་མངོན་ཡོད། དུས་ཚིགས་དང་པོ་ནས་གསུམ་པའི་བར། རང་ལྗོངས་ཀྱི་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་དང་། གཏན་འཇགས་རྒྱུ་ནོར་ལ་མ་འཇོག་བྱེད་ཚད། གཞི་ཁྱོན་ཡན་གྱི་བཟོ་ལས་འཕར་ཐང་སོགས་དཔལ་འབྱོར་དམིགས་ཚད་ཁག་7གྱི་འཕར་ཚད་ཚང་མ་སྤྱིར་ན་རྒྱལ་ཡོངས་ཀྱི་ཨང་དང་པོར་སླེབས་ཡོད་པ་རེད། ལྗོངས་ཡོངས་ཀྱི་གོང་འོག་ཚང་མས་གདེང་ཚོད་ཡོད་པ་དང་། ཐབས་ཇུས་ཡོད་པ། བྱ་སྤྱོད་ནུས་ལྡན་ཡོད་པ་བཅས་ཀྱི་འབད་འཐབ་ཐོག་ནས། སྤུས་ཚད་མཐོ་བའི་འཕེལ་རྒྱས་ཀྱི་ལམ་བུའི་ཐོག་མིག་མཐོང་ལག་ཟིན་གྱི་བྱས་རྗེས་བཞག་སྟེ། དཔལ་འབྱོར་གྱི་སྤུས་ཚད་ལེགས་སུ་དང་གྲངས་འབོར་ལུགས་མཐུན་འཕར་བར་སྐུལ་འདེད་བཏང་ཡོད་པ་རེད།

དངོས་འཛིན་དངོས་སྒྲུབ་བྱས་ནས་རྣམ་གྲངས་ཀྱི་མ་འཇོག་དོན་འཁྱོལ་ཐུབ་པར་སྐུལ་འདེད་བཏང་བ།

ཉིན་ཤས་གོང་། ལྷ་ས་གྲོང་ཁྱེར་ཆུ་ཤུར་རྫོང་ཚ་རགས་ཤང་ས་སྨད་གྲོང་ཚོར་ཁྱོན་མ་དངུལ་སྒོར་དུང་ཕྱུར་6.2བཏང་བའི་བོད་ལྗོངས་ཧྭ་གློག་ལྷ་ས་ཆུ་ཤུར་ཚ་རགས་ཀྱི་100MWཟིན་པའི་འོད་ཤུགས་གློག་གཏོང་རྣམ་གྲངས་སྐྲུན་བཞིན་ཡོད་པ་རེད། རྣམ་གྲངས་དེས་ཡུལ་དེའི་མང་ཚོགས་ལ་འབབ་འཕར་སྒོར་ཁྲི་2811ཡོང་བར་ཐད་ཀར་སྐུལ་ཁྲིད་ཐུབ་པ་དང་། ཐོན་སྐྱེད་བྱེད་འགོ་ཚུགས་རྗེས། སྔོན་དཔག་ལྟར་ན། ལོ་ལྟར་ཁྲལ་འཇལ་ཚད་སྒོར་ཁྲི་763.67ཟིན་རྒྱུ་རེད། ལྷ་ས་གྲོང་ཁྱེར་ཆུ་ཤུར་རྫོང་འཕེལ་སྒྱུར་ཨུ་ལྷན་གྱི་ཀྲུའུ་རེན་ལིའུ་པོ་ཡིས། “རྣམ་གྲངས་དེ་ནི་བོད་རང་སྐྱོང་ལྗོངས་ཀྱི་གཙོ་གནད་རྣམ་གྲངས་ཀྱི་གྲས་ཤིག་ཡིན་ལ། རྒྱལ་ཁབ་ནུས་རྒྱུ་ཅུས་ཀྱིས་ཆོག་མཆན་སྤྲད་པའི་འོད་ཤུགས་གློག་ཁང་གི་རྣམ་གྲངས་གཙོ་བོའི་གྲས་ཤིག་ཀྱང་ཡིན”ཞེས་བཤད།

རྣམ་གྲངས་ལ་མ་འཇོག་ཡག་པོ་བྱེད་པའི་ཐད། རང་སྐྱོང་ལྗོངས་ཀྱིས་ཐོག་མཐའ་བར་གསུམ་དུ་སྔོན་ཚུད་ནས་འཐབ་ཇུས་དང་འཆར་འགོད་ཡག་པོ་བྱས་ཡོད།

ལོ་འགོ་ནས་བཟུང་། རང་ལྗོངས་ཀྱིས་ཞིང་ཆེན་རིམ་པའི་འགོ་ཁྲིད་ཀྱིས་གཙོ་གནད་རྣམ་གྲངས་འགན་འཁྲི་གཙང་ལེན་དང་། ཆེད་དོན་ཚན་ཁག་གིས་ཞབས་འདེགས་ཞུ་བ། གསལ་ཐོ་ཅན་གྱི་བཀོད་གཏོང་བྱེད་པ། གཙོ་གནད་རྣམ་གྲངས་ལ་མཉམ་དུ་ཞིབ་མཆན་འགོད་པ། “ཤར་སྐྱོད་འགན་སྲུང་བགྲོད་ལམ”སོགས་ཀྱི་ལས་ཀའི་ལམ་སྲོལ་ལ་སྐུལ་འདེད་ཤུགས་ཆེན་བཏང་བ་དང་། གཙོ་གནད་རྣམ་གྲངས་ལ“ཁེ་ལས་ཀྱིས་གསལ་ཐོ་བཟོ་བ་དང་། སྲིད་གཞུང་གིས་ས་གནས་ས་ཐོག་ཏུ་ལས་དོན་སྒྲུབ་པ། དུས་བཀག་ནང་ཚར་བ”བཅས་བྱས་ཏེ་མ་འཇོག་དོན་འཁྱོལ་ལ་དམ་འཛིན་ནན་པོ་བྱས་ཡོད། རང་སྐྱོང་ལྗོངས་དང་གྲོང་ཁྱེར་དང་ས་ཁུལ་ཁག་གིས་གཅིག་རྗེས་གཉིས་མཐུད་དུ་ཚོགས་འདུ་འཚོགས་ནས་གཙོ་གནད་རྣམ་གྲངས་འཛུགས་སྐྲུན་གྱི་འཕེལ་རིམ་བཀོད་གཏོང་དང་། བྱ་ཐབས་སྣ་ཚོགས་སྤྱད་དེ་ད་ཡོད་ཀྱི་མ་དངུལ་ཡག་པོ་སྤྱོད་པ། མ་འཇོག་འགག་སྒྲོལ་བྱ་སྤྱོད་ཀྱི་ཇུས་གཞི་དོན་འཁྱོལ་བཅས་བྱས་ནས། དངོས་དངོས་རྗེན་རྗེན་གྱི་ལས་འབོར་སྟོན་རྒྱུ་ཡོད་པ་བྱས་པ་རེད།

ཟླ་10པའི་བར། ལྗོངས་ཡོངས་ཀྱི་འགན་འཁྲི་གཙང་ལེན་རྣམ་གྲངས་ལ་མ་དངུལ་སྒོར་དུང་ཕྱུར་465.6བཏང་བ་དེས་ལོ་ཧྲིལ་པོའི་དམིགས་ཚད་ཀྱི་70%བཟུང་ཡོད།

ལོ་སྨད་དུ་རང་ལྗོངས་ཀྱི་མཁོ་སྒྲུབ་འགན་ལེན་གྱི་རྣམ་གྲངས་མང་པོ་ཞིག་གཉེར་འགོ་ཚུགས་པའི་གཏམ་བཟང་གྲགས་ཡོད། མངའ་རིས་ཀྱི་ཆུ་ཚོད་ཆན་ཝ་ཁྲི་5+ཆན་ཝ་ཁྲི་4ཡི་དྲ་གྲུབ་རྣམ་པའི་ནུས་གསོག་གློག་གཏོང་རྣམ་གྲངས་ཀྱི་དྲ་སྦྲེལ་གློག་གཏོང་དང་། གཞིས་རྩེའི་ཆན་ཧྥུའུ་220ཡོད་པའི་རྡོ་གླིང་གློག་སྒྱུར་ས་ཚིགས་ཀྱི་གློག་ཚན་སྒྱུར་ཆས་ལས་གྲྭ་སྤྱོད་འགོ་ཚུགས་པ་ལ་སོགས། དེ་དག་ནི་གསར་འབྱེད་མ་འཇོག་བྱས་པའི་གསེར་རྙེད་ཆུས་ཀྱི་རྟ་སྒ་ཕུ་རང་ཚུགས་དྲ་གྲུབ་རྣམ་པའི་ནུས་གསོག་གློག་ཁང་དང་འདྲ་བར། ཚང་མ་ད་ལོ་ལས་འགོ་བཙུགས་ནས་བསྐྲུན་ཟིན་པའི་རྣམ་གྲངས་ཤ་སྟག་རེད།

འགན་འཁྲི་གཙང་ལེན་རྣམ་གྲངས་དང་མཁོ་སྒྲུབ་འགན་ལེན་རྣམ་གྲངས་ཀྱི་དཔེ་སྟོན་སྣེ་ཁྲིད་འོག རང་ལྗོངས་སུ“རྣམ་གྲངས་ལ་དམ་འཛིན་དང་། མ་འཇོག་ལ་སྐུལ་འདེད། འཕར་བརྟན་པ”བཅས་ཀྱི་རྣམ་པ་ཟབ་མོ་མངོན་བཞིན་ཡོད།

སྲིད་ཇུས་ཀྱི་རྒྱབ་སྐྱོར་འོག་ཐབས་མང་མཉམ་སྤྱོད་ཀྱིས་འཛད་སྤྱོད་བྱེད་ཤུགས་ཆེ་རུ་བཏང་བ།

ད་ལོ་རང་ལྗོངས་ཀྱིས་སྲིད་ཇུས་ཁྲིད་སྟོན་དུ་བྱེད་པ་དང་གསར་གཏོད་སྒུལ་ཤུགས་སུ་བྱས་ཏེ། “འཛད་སྤྱོད་སྐུལ་སྤེལ་ལོའི”ལས་ཀའི་ཇུས་གཞི་དང་འཛད་སྤྱོད་ལ་སྐུལ་འདེད་གཏོང་བའི“དོན་ཚན་བརྒྱད”སོགས་འཛད་སྤྱོད་ལ་སྐུལ་འདེད་གཏོང་བའི་སྲིད་ཇུས་བྱ་ཐབས་རབ་དང་རིམ་པ་སྔ་རྗེས་སུ་བཏོན་ནས། འཛད་སྤྱོད་ཀྱི་ཐབས་ལམ་སྣ་ཚོགས་འཚོལ་ཞིབ་ཧུར་ཐག་བྱས་ཐོག ཐབས་མང་མཉམ་སྤྱོད་ཀྱིས་འཛད་སྤྱོད་ཁྲོམ་རར་གསོན་ཤུགས་གསར་པ་འཕེལ་བར་བྱས་ཡོད།

ལོ་སྨད་དུ་རྒྱལ་ཁབ་ཀྱི“གསར་པ་གཉིས”དང“གལ་ཆེན་གཉིས”ཀྱི་སྲིད་ཇུས་ཀྱི་རྒྱབ་སྐྱོར་འོག བོད་ལ་སྒོར་དུང་ཕྱུར་5ཟིན་པའི་དུས་ཡུན་ཆེས་རིང་བའི་དམིགས་བསལ་རྒྱལ་བུན་མ་དངུལ་གྱི་རྒྱབ་སྐྱོར་ཐོབ་ཡོད་པ་རེད། མ་དངུལ་འདི་གཙོ་བོ་བེད་མེད་རླངས་འཁོར་གསར་བརྗེས་དང་། འཛད་སྤྱོད་པ་སྒེར་གྱི་རླངས་འཁོར་གསར་བརྗེས། ཁྱིམ་སྤྱོད་གློག་ཆས་ཐོན་རྫས་དང་གློག་སྒུལ་སྦག་སྦག་རྙིང་པ་གསར་བརྗེས་སོགས་ཀྱི་ཁྱབ་ཁོངས་སུ་སྤྱད་ཡོད།

ལྷ་ས་ནས་གཞིས་རྩེ་བར་དང་ཉིང་ཁྲི་ནས་ལྷོ་ཁ་བར། གྲོང་ཁྱེར་དང་ས་ཁུལ་ཁག་དང་ཁེ་ལས་ཁག་གིས་འཛད་སྤྱོད་འཛིན་ཤོག་སྤྲོད་པ་དང་། བྲིན་ཚོང་བྱེད་སྒོ་སྤེལ་བ། འཛད་སྤྱོད་ཁོར་ཡུག་ལེགས་སུ་གཏོང་བ་སོགས་ཀྱི་བྱེད་ཐབས་བརྒྱུད། འཛད་སྤྱོད་པའི་ཡིད་དབང་བཀུག་སྟེ་ནང་མཁོ་རྒྱ་ཆེར་གཏོང་བ་དང་འཛད་སྤྱོད་ཁྲོམ་ར་དར་རྒྱས་ཡོང་བར་རྨང་གཞི་བཟང་པོ་བཏིང་ཡོད་པ་རེད། དུས་ཚིགས་དང་པོ་ནས་གསུམ་པའི་བར། ལྗོངས་ཡོངས་ཀྱི་སྤྱི་ཚོགས་འཛད་རྫས་སིལ་ཚོང་བསྡོམས་འབོར་དུས་མཚུངས་ལས་6.2%འཕར་ནས་རྒྱལ་ཡོངས་ཀྱི་ཨང་དང་པོར་སླེབས་པ་དང་། འཛད་སྤྱོད་ཁྲོམ་ར་རྒྱུན་མཐུད་ལེགས་སུ་འགྲོ་བཞིན་ཡོད་པ་རེད།

སྲིད་ཇུས་ཀྱི་སྐུལ་འདེད་ཤུགས་ཆེན་འོག ལྗོངས་ཡོངས་ཀྱི་མི་རིགས་ཁག་གི་མང་ཚོགས་ཀྱི་ཉོ་སྒྲུབ་ཀྱི་འདུན་པ་མངོན་གསལ་དོད་པོས་ཆེ་རུ་ཕྱིན་ཡོད། ཉིང་ཁྲིའི་གྲོང་མི་ཏོན་ཆི་ཧའོ་ཡིས། “རླངས་འཁོར་གསར་པ་ཉོས་ན་ཁ་གསབ་སྒོར་ཁྲི་2ཡོད་པ་མ་ཟད། རླངས་འཁོར་རྙིང་པ་བེད་མེད་དུ་བཏང་བར་ཡང་ཁ་གསབ་སྒོར་1000རག་བྱུང་། དངོས་འབྲེལ་གྱོང་མི་འདུག”ཅེས་བཤད་པ་དང་། ཁོང་གིས་ངས“རྙིང་པ་གསར་བརྗེས”ཀྱི་བྱེད་ཐབས་བརྒྱུད། སྒོར་ཁྲི་20ལྷག་ཙམ་རི་བའི་ནུས་རྒྱུ་གསར་པའི་རླངས་འཁོར་ཞིག་ཉོས་པ་ཡིན་ཞེས་བཤད། ལྷ་ས་ལན་ཙེ་གློག་ཆས་ཚོང་ཁང་དུ་ཡོད་པའི་མང་ཚོགས་དབང་ཕྱུག་གིས། “རྙིང་པ་གསར་བརྗེས་ཀྱི་ཁ་གསབ་ཡོད་པས། ཁྱིམ་སྤྱོད་གློག་ཆས་གོང་ཁེ་པོ་འདུག ངས་གོས་འཁྲུད་འཕྲུལ་ཆས་དེ་བས་ཡག་པ་ཞིག་ཉོ་རྩིས་ཡོད”ཅེས་བཤད།

སྒྱུར་བཅོས་གཏིང་ཟབ་ཏུ་བཏང་སྟེ་ཚོང་གཉེར་ཁོར་ཡུག་རྒྱུན་མཐུད་ལེགས་སུ་བཏང་བ།

ད་ལོ་ཚུན་དུ། རང་ལྗོངས་ཀྱིས་ཞིང་ལས་དང་གྲོང་གསེབ་སོགས་གཙོ་གནད་ཁྱབ་ཁོངས་ཀྱི་སྒྱུར་བཅོས་རྒྱུན་མཐུད་གཏིང་ཟབ་ཏུ་བཏང་སྟེ། ནུས་ཤུགས་ཡོད་རྒུས་གཞུང་ཁོངས་ཁེ་ལས་ཀྱིས“བསམ་ཇུས་གཅིག”གི་འཐབ་ཇུས་རང་བཞིན་གྱི་བསྐྱར་སྒྲིག་དང་ཆེད་ལས་ཀྱི་བསྡུ་སྒྲིལ་བྱེད་པར་སྐུལ་འདེད་བཏང་བ་དང་། ལྗོངས་ཡོངས་ཀྱི་གློག་རིན་ལམ་སྲོལ་དང་དམངས་སྤྱོད་མཁའ་འགྲུལ་གྱི་འགྲུལ་པའི་སྤ་སེའི་རིན་གོང་གི་སྒྱུར་བཅོས་ལ་སྐུལ་འདེད་བཏང་སྟེ། སྙིང་རུས་གཏན་འཁྱོངས་དང་ལས་དོན་སྒྲུབ་མཁས་པོ་བྱས་ནས། སྒྱུར་བཅོས་ནི་ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་སྔོན་སྤེལ་ཁུལ་འཛུགས་གཏོད་ཀྱི་རྩ་བའི་སྒུལ་ཤུགས་ཤིག་ལ་བརྩིས་ཡོད།

ཚོང་གཉེར་ཁོར་ཡུག་ལེགས་སུ་གཏོང་བ་ནི་རང་ལྗོངས་ཀྱི་ཞབས་ཞུའི་ཁྱབ་ཁོངས་སྒྱུར་བཅོས་ཀྱི་ད་ལོའི་ལས་འགན་གཙོ་བོ་ཞིག་ཡིན་ཞིང་། རང་ལྗོངས་ཀྱིས་སྔ་རྗེས་སུ《བོད་རང་སྐྱོང་ལྗོངས་ཀྱིས་ལྷོ་ནུབ་ཞིང་ཆེན་ལྔའི་སྲིད་དོན་ཞབས་ཞུ“ཞིང་བརྒལ་ཀུན་སྒྲུབ”ཐུབ་པའི་ལས་དོན་ལ་སྐུལ་འདེད་གཏོང་བའི་ལག་བསྟར་ཇུས་གཞི》དང《2024ལོའི་ཚོང་གཉེར་ཁོར་ཡུག་ལེགས་སུ་གཏོང་བའི་ལས་ཀའི་གཙོ་གནད》སོགས་བཏོན་ཏེ། ཚོང་གཉེར་ཁོར་ཡུག་ལེགས་སུ་གཏོང་བའི་ལས་འགན་གྱི་དཔྱད་ཞིབ་ལམ་སྲོལ་བཟོས་ནས། “ཡིད་རྟོན་སྲིད་གཞུང་འཛུགས་སྐྱོང་ལོའི”ཆེད་དམིགས་བྱེད་སྒོ་སྤེལ་བ་དང་། ཉིང་ཁྲི་གྲོང་ཁྱེར་དུ་རང་སྐྱོང་ལྗོངས་རིམ་པའི་སྲིད་འཛིན་ཁྲིམས་བསྟར་ཁྱབ་གདལ་གཏོང་བའི་ལམ་ལུགས་ཁག་གསུམ་དང་། ཁྲིམས་སྐྱོང་ཅན་གྱི་ཚོང་གཉེར་ཁོར་ཡུག་ལེགས་སྒྱུར་གྱི་ཚད་ལྡན་མ་དཔེ་གཙོ་གནད་ཐོག་བཏོད་ནས། དངོས་སྒྲུབ་དང་བརྩེ་སེམས་ཟབ་མོས་ཁེ་ལས་ལ་ཕན་པའི་བྱ་བ་མང་པོ་བསྒྲུབས་ཡོད།

དགུན་དུས་བོད་དུ་གྲང་ངར་ཆེ་ནའང་ས་མཐོའི་གང་ས་ནས“གདོང་མཆོང”དང“འགག་སྒྲོལ”གྱི་ཚ་རླབས་འཕྱུར་བའི་རྣམ་པ་ཞིག་མངོན་ཞིང་། མི་རིགས་ཁག་གི་ལས་བྱེད་པ་དང་མང་ཚོགས་ཀྱིས་གཅིག་སེམས་གཅིག་སྦྲེལ་དང་། ཇུས་ཤུགས་མཉམ་འདོན། ངར་ཤུགས་གཅིག་སྒྲིལ། ལས་དོན་སྒྲུབ་པ་བཅས་བྱས་ཏེ། བོད་སྤུས་ཚད་མཐོ་བའི་འཕེལ་རྒྱས་ཕྱོགས་སུ་བསྐྱོད་པའི་འཐབ་ཇུས་ཀྱི་གོ་སྐབས་དང་ལེགས་ཆར་དམ་འཛིན་གྱིས་ཀྲུང་གོའི་ལུགས་ཀྱི་དེང་རབས་ཅན་གྱི་བོད་ཀྱི་ལག་ལེན་གྱི་ངོ་མཚར་ཆེ་བའི་ལེའུ་ཧུར་ཐག་རྩོམ་བཞིན་ཡོད།

（བསྟན་བློ་དང་། སྐལ་མཆོག དངོས་སྦྱོང་སློབ་མ་བསྟན་འཛིན་དོན་གྲུབ་བཅས་ཀྱིས་སྒྱུར་ཞུས་བྱས）