ཤིན་ཧྭ་གསར་འགྱུར་ཁང་ཨའོ་མོན་ནས་གློག་འཕྲིན་འབྱོར་གསལ། ཚེས་19ཉིན་གྱི་ཕྱི་དྲོར། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་གིས་ཨའོ་མོན་དུ་ཨའོ་མོན་དམིགས་བསལ་སྲིད་འཛིན་ཁུལ་གྱི་སྲིད་འཛིན་དང་། ཁྲིམས་འཛུགས། ཁྲིམས་འཛིན་བཅས་ལས་ཁུངས་ཀྱི་འགན་འཁུར་བར་མཇལ་འཕྲད་གནང་བ་རེད།
ཞི་ཅིན་ཕིང་གིས་གསུངས་དོན། ལོ་5ཡི་རིང་སྲིད་འཛིན་དཔོན་ཧོ་དབྱི་ཁྲེང་གི་སྣེ་ཁྲིད་འོག་ཨའོ་མོན་གྱི་སྲིད་འཛིན་དང་། ཁྲིམས་འཛུགས། ཁྲིམས་འཛིན་བཅས་ལས་ཁུངས་ཀྱིས“རྒྱལ་ཁབ་གཅིག་ལ་ལམ་ལུགས་གཉིས”ཀྱི་མཛད་ཕྱོགས་ཕྱོགས་ཡོངས་དང་། གནད་ལ་འཁེལ་བ། བློ་བརྟན་འགྱུར་མེད་བཅས་ཀྱི་སྒོ་ནས་ལག་ལེན་བསྟར་བ་དང་། རྩ་ཁྲིམས་དང་གཞི་རྩའི་བཅའ་ཁྲིམས་ལ་ནན་པོར་གཞིགས་ནས་སྲིད་ཇུས་ལག་ལེན་བསྟར་བ། འཁྲི་འགན་རང་འཁུར་དང་དངོས་སྒྲུབ་བྱས་རྗེས་ཡོད་པ་བཅས་བྱས་ཏེ་ཨའོ་མོན་གྱི་དར་རྒྱས་དང་། བརྟན་ལྷིང་། འཕེལ་རྒྱས་བཅས་ཀྱི་ཆེད་ལས་དོན་འབོར་ཆེན་བསྒྲུབས་པ་དང་ཐོབ་པའི་གྲུབ་འབྲས་ནི་བསྟོད་རིན་ཡོད་པ་དང་མིག་མཐོང་ལག་ཟིན་ཐུབ་པ་ཞིག་རེད། ཀྲུང་དབྱང་སྲིད་གཞུང་གིས་སྐབས་འདིའི་དམིགས་བསལ་སྲིད་འཛིན་ཁུལ་སྲིད་གཞུང་གི་ལས་དོན་ལ་ཁས་ལེན་གང་ལེགས་དང་ཚད་མཐོའི་གདེང་འཇོག་བྱེད་ཀྱི་ཡོད།
ཞི་ཅིན་ཕིང་གིས་ནན་བཤད་གནང་དོན། དམིགས་བསལ་སྲིད་འཛིན་ཁུལ་སྲིད་གཞུང་སྐབས་རིམ་བྱུང་གིས་སྤྱི་ཚོགས་ལས་རིགས་ཁག་ལ་མཐུན་སྒྲིལ་དང་རྒྱུན་མཐུད་འབད་འཐབ་བྱས་པས། ཨའོ་མོན་ལ་མཆོང་སྐྱོད་ལྟ་བུའི་འཕེལ་རྒྱས་བྱུང་བ་དང“རྒྱལ་ཁབ་གཅིག་ལ་ལམ་ལུགས་གཉིས”ཨའོ་མོན་དུ་ལག་ལེན་བསྟར་བར་གྲུབ་འབྲས་ཧ་ཅང་ཆེན་པོ་ཐོབ་ཡོད། བྱ་གཞག་ནི་མི་རབས་ནས་མི་རབས་བར་གྱིས་འབད་འཐབ་བྱས་ནས་བྱུང་བ་ཞིག་རེད། སླད་ཕྱིན་ཚང་མས་ལས་གནས་གང་འདྲ་ཞིག་ཏུ་ཡོད་རུང་གསར་དུ་བསྐོ་གཞག་བྱས་པའི་སྲིད་འཛིན་དཔོན་དང་སྐབས་གསར་པའི་དམིགས་བསལ་སྲིད་འཛིན་ཁུལ་སྲིད་གཞུང་གིས་ཁྲིམས་ལྟར་སྲིད་ཇུས་ལག་ལེན་བསྟར་བར་ནུས་ཤུགས་ཡོད་རྒུས་རྒྱབ་སྐྱོར་བྱས་ཏེ། ཨའོ་མོན་གྱི་འཕེལ་རྒྱས་ལ་མུ་མཐུད་རམ་འདེགས་དང་དེ་བས་མཛེས་སྡུག་ལྡན་པའི་ཨའོ་མོན་སྐྲུན་ཆེད་སྟོབས་ཤུགས་ལེགས་སྐྱེས་འབུལ་དགོས།
དེ་ཉིན་ཕྱི་དྲོར་ཞི་ཅིན་ཕིང་གིས་ད་དུང་ཨའོ་མོན་དམིགས་བསལ་སྲིད་འཛིན་ཁུལ་གྱི་སྒྲིག་ཁྲིམས་དཔུང་སྡེའི་འཐུས་མིར་མཇལ་འཕྲད་ཀྱང་གནང་བ་རེད།