ཚན་རྩལ་བོད་སྐྱོར་ལག་བསྟར་གཏིང་ཟབ་བྱས་པ་དང་སྦྲགས། སྤུན་ཟླའི་ཞིང་ཆེན་དང་གྲོང་ཁྱེར་ནས་ཐོན་པའི་ཀྭ་རིགས་དང་ཤིང་ཏོག་གི་ས་བོན་ས་མཐོར་བཏབ་ནས་འབྲས་བུ་སྨིན་ཡོད། མངར་སིལ་ལྡན་པའི་སེའུ་དང་རྒུན་འབྲུམ་དང་དེ་བཞིན་ཞུ་མཁན་དང་ཁམ་བུ་སྨི་ཧོའུ་སོགས་ཉིན་རེ་བཞིན་ཇེ་མང་དུ་འགྲོ་བའི་ས་མཐོའི་ཤིང་འབྲས་ཀྱིས་མི་དམངས་མང་ཚོགས་ཀྱི“ཤིང་ཏོག་གཟེབ་མ”ཕུན་སུམ་ཚོགས་སུ་ཕྱིན་པ་མ་ཟད། དམིགས་བསལ་གྱི་དཔལ་འབྱོར་ཕན་འབྲས་ལ་བརྟེན་ནས་ཤིང་འབྲས་འདེབས་མཁན་ཞིང་པའི་ཡོང་འབབ་ཀྱང་མང་དུ་སོང་སྟེ་གྲོང་གསེབ་དར་རྒྱས་ཀྱི་རྣམ་པ་བཀྲག་མདངས་ལྡན་པ་ཞིག་མངོན།

ཉིང་ཁྲི་གྲོང་ཁྱེར་བྲག་ཡིབ་ཆུས་དགུང་ཚང་མོན་པ་མི་རིགས་ཤང་བཅུ་འཕར་གྲོང་ཚོར་སྐྱོད་སྐབས། གྲལ་སྟར་འགྲིག་པའི་དྲོད་ཁང་ཆེ་མོའི་ཐོག་རབ་ཏུ་འཕྲོས་ནས་ཉི་མའི་ཟེར་ལྷམ་མེར་མངོན། དྲོད་ཁང་ཆེ་མོའི་ནང་སྲེའུ་སྡོང་སྟེང་ལྗིད་ཏིག་ཏིག་གི་འབྲས་བུ་བཏགས་པ་དང་དེ་དག་ནི་དམར་མདངས་རབ་ཏུ་རྒྱས་ཤིང་འོད་ཆིལ་ཆིལ་དུ་འཕྲོ་བས་མིག་མདུན་གྱི་ཤིང་འབྲས་དེ་དག་ས་བབ་མཐོ་ཚད་སྨི་3000ཙམ་གྱི་ས་མཐོར་མཐོང་རྒྱུ་ཡོད་པ་མི་རྣམས་ལ་ཡིད་ཆེས་དཀའ་བ་ཞིག་འདུག “དེ་སྔོན་ང་ཚོས་ཁྱིམ་གྱི་སྒོ་རྩ་ནས་སྲེའུ་སོས་པ་འདི་འདྲ་བཟའ་ཐུབ་པ་བསམ་པའི་ཡུལ་ལའང་འཁོར་མྱོང་མེད”ཅེས་གྲོང་མི་ཟླ་བ་ཚེ་རིང་གིས་འཛུམ་དམུལ་དམུལ་ངང་གསར་འགོད་པར་བཤད།

ཉེ་བའི་ལོ་ཤས་རིང་ལྗོངས་ཡོངས་ཀྱི་ཤིང་འབྲས་འདེབས་འཛུགས་ལས་རིགས་དར་བ་དེས་བོད་ཀྱི་ཞིང་ལས་ཐོན་ལས་གྲུབ་ཆར་འགྱུར་ལྡོག་འགྲོ་རྒྱུར་སྐུལ་ཁྲིད་ཐུབ་ནས་སྲོལ་རྒྱུན་གྱི་ནས་དང་གྲོ་འདེབས་འཛུགས་བྱེད་པ་ནས་ད་ཆའི་སེའུ་དང་རྒུན་འབྲུམ་སོགས་ཁྱད་ལྡན་ཤིང་འབྲས་འདེབས་འཛུགས་བྱེད་པའི་བར་ཁྲོམ་རའི་མཁོ་སྤྲོད་ཕུན་སུམ་ཚོགས་སུ་ཕྱིན་པ་མ་ཟད། ཞིང་ལས་དེ་ནུས་ཆེ་དང་། སྤུས་ལེགས། སྐྱེ་ཁམས་བཅས་ཀྱི་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་མ་ཐེབས་ཡོད། ཉིང་ཁྲི་གྲོང་ཁྱེར་གྱིས་ཤིང་འབྲས་ཐོན་ལས་དེ་གྲོང་གསེབ་དར་རྒྱས་ཀྱི་དམ་འཛིན་བྱ་གཞི་གལ་ཆེན་ཞིག་ཏུ་བརྩིས་ནས་སྐུལ་འདེད་ཤུགས་ཆེན་བཏང་སྟེ་ཉིང་ཁྲི་དང་ཐ་ན་བོད་ཀྱི་ཐོན་ལས་ཀྱི་མིང་བྱང་གསར་པ་ཞིག་ཏུ་གཏོད་རྒྱུའི་སེམས་ཐག་བཅད་པ་རེད།

ཤིང་འབྲས་ཐོན་ལས་འཕེལ་རྒྱས་མྱུར་པོ་ཕྱིན་པ་དེས་ཤིང་འབྲས་འདེབས་མཁན་ཞིང་པར་དཔལ་འབྱོར་གྱི་ཕན་འབྲས་བཟང་པོ་ཐོན་པ་མ་ཟད། ས་གནས་དེ་གའི་ཞིང་པར་ལས་ཞུགས་ལས་གནས་ཀྱང་མཁོ་འདོན་ཐུབ་ཡོད། མང་ཚོགས་ཚོས་ཤིང་འབྲས་འདེབས་འཛུགས་ལས་རིགས་ནང་གཅིག་རྗེས་གཉིས་མཐུད་ངང་ཞུགས་ནས་དཀའ་སྤྱད་ངལ་རྩོལ་བྱས་པ་བརྒྱུད་འབབ་འཕར་ཕྱུག་འགྱུར་བྱུང་ཡོད། དེའི་རིང་། ས་གནས་ཁག་གི་སྲིད་གཞུང་གིས་ཐོན་ལས་འཁོར་འབྲེལ་འཚོལ་ཞིབ་ཧུར་ཐག་བྱས་ནས་སྣུར་སྲིང་བྱས་ཏེ་ཤིང་འབྲས་ལས་སྣོན་དང་གྲོང་གསེབ་ཡུལ་སྐོར་སོགས་སྣ་མང་ཐོན་ལས་འཕེལ་རྒྱས་བཏང་སྟེ། ཡུལ་སྐོར་བས་གྲོང་གསེབ་ཡུལ་སྐོར་བྱ་ཡུལ་ནས་ཤིང་འབྲས་སོས་པ་འཐུ་ཐུབ་པ་མ་ཟད། ས་གནས་དེ་གའི་ཤིང་འབྲས་ལས་བཟོས་པའི་ཤིང་འབྲས་ཁུ་བ་དང་། ཤིང་ཏོག་བསྣུར་མ། ཤིང་ཏོག་སྐམ་པོ་སོགས་མྱོང་རོལ་ཐུབ་པ་མ་ཟད། ད་དུང་ཐུན་མོང་མ་ཡིན་པའི་བོད་རིགས་ཀྱི་ཞིང་སྡེའི་སྤྲོ་སྣང་ཡང་མྱོང་རོལ་ཐུབ་ཀྱི་ཡོད།

རང་ལྗོངས་ཀྱི་ས་གནས་ཁག་གིས་ཐོག་མཐའ་བར་གསུམ་དུ་ལྗང་མདོག་འཕེལ་རྒྱས་ཀྱི་འདུ་ཤེས་མཐའ་འཁྱོངས་བྱས་ནས་ཤིང་འབྲས་ཐོན་ལས་འཕེལ་རྒྱས་ལ་སྐུལ་འདེད་བཏང་ཞིང་། སྐྱེ་ཁམས་འདེབས་འཛུགས་ལག་རྩལ་ཁྱབ་གདལ་བཏང་བ་དང་། རྫས་ལུད་དང་ཞིང་སྨན་སྤྱོད་ཉུང་དུ་བཏང་བ། ཆུ་ཁུངས་ཁུལ་དང་སྐྱེ་ཁམས་ཁོར་ཡུག་སྲུང་སྐྱོང་སོགས་ཀྱི་བྱ་ཐབས་སྤྱད་དེ་དཔལ་འབྱོར་ཕན་འབྲས་དང་སྐྱེ་ཁམས་ཕན་འབྲས་གཉིས་ཁེ་ཡོང་བ་བྱས་ཡོད། ས་གནས་ཁག་གི་ཞིང་ལས་རིགས་གཅིག་མཁས་ཅན་ཚོས་ཞིང་ནང་དང་མུ་ཁར་བསྐྱོད་དེ་ཤིང་འབྲས་འདེབས་མཁན་ལ་ཚན་རིག་དང་མཐུན་པའི་སྒོ་ནས་འདེབས་འཛུགས་དང་། ལུགས་མཐུན་ངང་ལུད་རྒྱག་པ། ནད་དང་འབུའི་གནོད་འཚེ་སྔོན་འགོག་དང་ཚོད་འཛིན་སོགས་བྱེད་པར་མཛུབ་ཁྲིད་བྱས་ནས་འབྲས་བུ་ཡག་པོ་ཡོང་བའི་འགན་ལེན་བྱས་ཡོད།

ད་ཆ་བོད་ཀྱི་ཤིང་འབྲས་ཐོན་ལས་སྔར་ན་མེད་པའི་མྱུར་ཚད་དང་གཞི་ཁྱོན་གྱི་ཐོག་ནས་འཕེལ་རྒྱས་འགྲོ་བཞིན་ཡོད། བོད་སྐྱོར་རྣམ་གྲངས་དེ་བས་མང་བ་དོན་ཐོག་ཏུ་འཁྱོལ་བ་དང་ཚན་རིག་དང་མཐུན་པའི་འདེབས་འཛུགས་ལག་རྩལ་ཁྱབ་གདལ་བཏང་བ་བརྒྱུད་བོད་ཀྱི་ཤིང་འབྲས་ཀྱི་སྣ་ཁ་དེ་བས་ཕུན་སུམ་ཚོགས་སུ་དང་སྤུས་ཚད་དེ་བས་ལེགས་པ་ཡོང་ངེས་ཡིན་པའི་ཡིད་ཆེས་ཡོད། སྐབས་དེར་ལྗོངས་ཡོངས་ཀྱི་ས་གནས་ཁག་ཏུ་ཁྱབ་པའི་ཤིང་འབྲས་རྟེན་གཞིའང“ཤིང་འབྲས་ལྡུམ་རའི་ཞིང་ཁམས”སུ་གྱུར་ནས་ཕྱོགས་བཞི་མཚམས་བརྒྱད་ཀྱི་ཡུལ་སྐོར་བ་དེ་གར་ཡུལ་སྐོར་དང་ས་མཐོའི་ཤིང་འབྲས་ཀྱི་བྲོ་བ་མྱོང་རྒྱུའི་ཡིད་དབང་འགུག་རྒྱུ་རེད།