དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བ་དང་། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་ཆེར་གཏོང་བ། གྲོང་གསེབ་ཕྱོགས་ཡོངས་ནས་དར་རྒྱས་འགྲོ་བར་སྐུལ་འདེད་གཏོང་བ། མང་ཚོགས་ཀྱི་འཛད་སྤྱོད་གསོན་ཤུགས་འཕེལ་བར་བྱེད་པ། མང་ཚོགས་ལ་འབབ་འཕར་ཡོང་བར་སྐུལ་འདེད་གཏོང་བ་བཅས་བྱ་ཆེད། ཟླ་བརྒྱད་པ་ནས་བཟུང་། དུད་སྣ་ཤང་གིས་ཞིང་འབྲོག་ཕྱོགས་བསྡུས་ཞབས་ཞུའི་ལྟེ་གནས་ཀྱི་ནུས་པ་གང་ལེགས་བཏོན་ནས་ཕྱུགས་རིགས་བཤས་གཏོང་བའི་ལས་དོན་ལ་དམ་འཛིན་ཡག་པོ་བྱས་པ་རེད།

དུད་སྣ་ཤང་གིས《ཞིང་འབྲོག་པས་ལུག་གསོ་ཚགས་བྱས་ནས་བཤས་གཏོང་བར་བྱ་དགའ་སྤྲོད་རྒྱུའི་སྐོར་གྱི་གྲོ་མོ་རྫོང་མི་དམངས་སྲིད་གཞུང་གཞུང་ལས་ཁང་གི་སྲིད་ཇུས》ཀྱི་བརྡ་ཐོའི་བླང་བྱ་གཞིར་བཟུང་། ཆེད་དོན་ཚོགས་འདུ་འཚོགས་ནས་ཕྱུགས་རིགས་བཤས་གཏོང་བའི་ལས་དོན་བཀོད་སྒྲིག་ཞིབ་ཕྲ་བྱས་ཏེ་ཇུས་འགོད་སྔ་ཙམ་དང་། བཀོད་སྒྲིག་སྔ་ཙམ། བྱ་སྤྱོད་སྔ་ཙམ་སྤེལ་བ་བཅས་བྱས་པ་རེད། ཞིང་ལས་ལག་རྩལ་པའི་སྣེ་ཁྲིད་ནུས་པ་འདོན་སྤེལ་དང་བྱེད་པོའི་འགན་འཁྲི་དོན་འཁྱོལ་ནན་པོ་བྱས་ནས། ཕྱུགས་རིགས་བཤས་གཏོང་བའི་ལས་འགན་རིམ་པ་བཞིན་གྲོང་ཚོ་དང་མཉམ་ལས་ཁང་ལ་ཁག་བགོས་བྱེད་པ་དང་། བཤས་གཏོང་ཚད་ཁ་གསལ་བཟོ་བ། གོང་འོག་བློ་སེམས་གཅིག་སྒྲིལ་དང་ཁུར་མཉམ་ལེན་དང་དོན་སྤྱི་སྒྲུབ་ཀྱི་རྣམ་པ་བཟང་པོ་ཞིག་ཆགས་པ་བཅས་བྱས་ཏེ། “བཤས་གཏོང་དགོས་རིགས་ཚང་མ་བཤས་གཏོང་བར”སྐུལ་འདེད་ཤུགས་ཆེན་བཏང་ཐོག་རྩྭ་ཕྱུགས་དོ་སྙོམས་ཀྱིས་ཚད་ལས་བརྒལ་བའི་ཕྱུགས་རིགས་ཉུང་དུ་དང་ཞིང་འབྲོག་མང་ཚོགས་ཀྱི་ཡོང་འབབ་འཕར་གང་ཐུབ་བྱས་པ་རེད།

དུད་སྣ་ཤང་གི་འགོ་ཁྲིད་དང་ཞིང་འབྲོག་ཕྱོགས་བསྡུས་ཞབས་ཞུ་ལྟེ་གནས་ཀྱི་ལས་དོན་པས། གྲོ་མོ་རྫོང་གི་ཕྱུགས་རིགས་བཤས་གཏོང་ཚད་ཀྱི་ཁ་གསབ་སྲིད་ཇུས་གསར་ཤོས་གཙོ་གནད་དུ་བྱས་ནས་མང་ཚོགས་ཀྱི་ཚོགས་ཆེན་དང་། གྲོང་ཚོ་དང་དུད་ཚང་དུ་སྐྱོད་པ། སྐད་འཕྲིན་ཚོགས་པར་དྲིལ་བསྒྲགས་བྱེད་པ་སོགས“དྲ་ཐོག་དང་དྲ་ཕྱི་ཟུང་དུ་འབྲེལ་བའི”ཐབས་ལམ་བརྒྱུད། རྩྭ་ཕྱུགས་དོ་སྙོམས་ལ་སྐུལ་འདེད་གཏོང་བ་དང་། མང་ཚོགས་ཀྱི་ཡོང་འབབ་མང་དུ་གཏོང་བ། གེགས་འགོག་ཕྱུགས་སྲུང་བྱེད་པ་སོགས་ཀྱི་ཐད་ཕྱུགས་རིགས་བཤས་གཏོང་བའི་ལས་དོན་གྱི་གལ་ཆེའི་རང་བཞིན་དྲིལ་བསྒྲགས་རྒྱ་ཁྱབ་བྱས་ནས། ཞིང་འབྲོག་པའི་འདུ་ཤེས་དང་ཐོན་སྐྱེད་བྱེད་སྟངས་བསྒྱུར་བར་ཁྲིད་སྟོན་གྱིས་ཕྱུགས་རིགས་བཤས་གཏོང་བའི་ལས་དོན་ལ་རྒྱབ་སྐྱོར་ཧུར་ཐག་དང་དེའི་ནང་ཞུགས་ཏེ་གཅིག་སྡུད་དྲིལ་བསྒྲགས་ཐེངས་10ལྷག་ཙམ་དང་དུད་ཚང་དུ་བསྐྱོད་དེ་དྲིལ་བསྒྲགས་ཐེངས་30ལྷག་ཙམ་བྱས་པ་རེད།

2023ལོའི་ལོ་མཇུག་ཏུ་ཤང་ཡོངས་ལ་ལག་ཡོད་ནོར་ལུག་བསྡོམས་མགོ་གྲངས་29744ཟིན་པའི་ནང་ནོར་7622དང་ལུག་22122ཡོད་པ་དང་། ནོར་ལུག་བཤས་གཏོང་ལས་འགན་དམིགས་ཚད་ཀྱི་མགོ་གྲངས་13930ཟིན་ཡོད། སྲམ་གྲོང་ཚོ་བཞི་པ་ས་ཐག་རིང་བ་དང་ཆར་ཆུ་མང་བ་སོགས་ཀྱི་འགལ་རྐྱེན་སེལ་ཆེད། ཞིང་འབྲོག་ཕྱོགས་བསྡུས་ཞབས་ཞུའི་ལྟེ་གནས་ཀྱི་ལས་དོན་པས་ཕྱིའི་ཕྱུགས་རིགས་ཉོ་མཁན་རླངས་འཁོར་གྱི་ལམ་སྣེ་ཁྲིད་ཀྱི་ཡོད། ལུག་གི་རིན་གོང་བརྟན་པོ་མེད་པ་དང་ཕྱིར་ཚོང་བྱེད་དཀའ་བའི་གནད་དོན་ལ་དམིགས་ཏེ། དུད་སྣ་ཤང་གི་འགོ་ཁྲིད་ཀྱིས་གྲོང་ཁྱེར་དང་རྫོང་གི་ལས་སྒོའི་སྡེ་ཚན་དང་འབྲེལ་གཏུག་བྱས་ནས་ཐབས་ལམ་འཚོལ་བ་དང་ཆབས་ཅིག རྒུར་རུ་གྲོང་ཚོའི་དུད་སྣ་གམ་པའི་ལུག་གསོ་ཚགས་ཞིང་འབྲོག་པའི་ཆེད་ལས་མཉམ་ལས་ཁང་གི་འབྲེལ་བ་རྒྱ་ཆེ་བའི་ལེགས་ཆ་སྤྱད་དེ། མཉམ་ལས་ཁང་གཞན་དག་ལ་བཤས་གཏོང་གི“མཐའ་མའི་འགག་གནད”སེལ་རོགས་བྱས་ནས་ཟླ་8པར་ཕྱུགས་རིགས་བཤས་གཏོང་ཚད（མགོ་གྲངས）517ཟིན་པ་དང་ཟླ་9པར་ཕྱུགས་རིགས་བཤས་གཏོང་ཚད（མགོ་གྲངས）4156ཟིན་ནས་དམིགས་ཚད་ལས་འགན་46.5%ལེགས་གྲུབ་བྱུང་ཡོད།