སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཀྲོའུ་གསེར་རྟ་རྫོང་གསེར་རྟ་རྩྭ་ཐང་དུ་རྐང་རྩེད་སྤོ་ལོའི་རུ་ཁག་དམིགས་བསལ་ཞིག་ཡོད། འདི་ནི་སྐར་དམར་བུད་མེད་རྐང་རྩེད་སྤོ་ལོའི་རུ་ཁག་རེད། རྐང་རྩེད་སྤོ་ལོའི་རུ་ཁག་དེ་ནི་དཀར་མཛེས་ཀྲོའུ་ཡི་བརྒྱུད་རིམ་ལྡན་པའི་སྦྱོང་བརྡར་ཐོབ་པའི་སློབ་ཆུང་བུད་མེད་རྐང་རྩེད་སྤོ་ལོའི་རུ་ཁག་ཐོག་མ་དེ་རེད། ལོ་བཞིའི་འཕེལ་རྒྱས་བརྒྱུད། སྤོ་ལོའི་རུ་ཁག་དེ་དང་ཐོག་གི་མི་བཅུ་ལྷག་ནས་ད་ལྟའི་མི་130བར་འཕེལ་རྒྱས་ཕྱིན་ཡོད་པ་རེད།

2020ལོར། གསེར་རྟ་རྫོང་གི་ལོ་དགུའི་རྒྱུན་འཇགས་ལམ་ལུགས་ཀྱི་སློབ་གྲྭས“སྐར་དམར་བུད་མེད་རྐང་རྩེད་སྤོ་ལོའི་རུ་ཁག”བཙུགས་པ་དེས“གསར་བརྗེའི་སྙིང་སྟོབས་ནམ་ཡང་མི་ཉམས་པ་དང་གསར་བརྗེའི་སྙིང་སྟོབས་མི་རབས་ནས་མི་རབས་བར་རྒྱུན་འཛིན་བྱེད་པ”མཚོན་ཡོད། སྤོ་ལོའི་རུ་ཁག་བཙུགས་པའི་སྐབས་སུ་རྨང་གཞི་ཞན་པ་དང་སྦྱོང་བརྡར་གྱི་ཆ་རྐྱེན་ཞན་པ་སོགས་ཀྱི་དཀའ་ངལ་འཕྲད་ཡོད། ཁྲེང་ཏུའུ་གྲོང་ཁྱེར་དབུན་ཅང་ཆུས་ཀྱི་གནས་གཏན་འཁེལ་གྱི་རོགས་སྐྱོར་དང་དེ་བཞིན་སྤྱི་ཚོགས་ཀྱི་གཅེས་སེམས་སྟོབས་ཤུགས་ཀྱི་རྒྱབ་སྐྱོར་འོག་སློབ་གྲྭའི་དེ་སྔའི་སྤང་ཐང་དེ་ཚད་ལྡན་གྱི་རྐང་རྩེད་སྤོ་ལོ་ཐང་དུ་བཅོས་པ་མ་ཟད། ད་དུང་རུ་མི་ཚོར་ཆེད་ལས་ཀྱི་སྦྱོང་བརྡར་གྱོན་ཆས་དང་ལྷམ། སྦྱོང་བརྡར་ཡོ་བྱད་སོགས་ཀྱང་ཉོས་པ་རེད། རུ་མི་ཚོས་རྐང་རྩེད་སྤོ་ལོར་དགའ་ཞེན་ཆེན་པོ་བཅངས་ནས་ཉིན་ལྟར་སྦྱོང་བརྡར་ལྷོད་མེད་བྱས་པས་རུ་ཁག་དེའི་སྤྱི་ཡོངས་ཀྱི་སྟོབས་ཤུགས་རྒྱུན་ཆད་མེད་པར་ཆེ་རུ་ཕྱིན་ཡོད་པ་རེད།

ཉེ་བའི་ལོ་ཤས་རིང་། རུ་མི་ཚོ་གསེར་རྟ་རྩྭ་ཐང་ནས་ཐོན་ཏེ་སྤྱི་ཕན་འགྲན་བསྡུར་དང་། སྤེལ་རེས་འགྲན་བསྡུར། ཁྲེང་ཏུའུ་རྐང་རྩེད་སྤོ་ལོའི་དབྱར་སྒར་སོགས་བྱེད་སྒོ་སྣ་ཚོགས་ལ་ཞུགས་པ་དང་། 2024ལོའི་དཀར་མཛེས་ཀྲོའུ་ཡི་སློབ་གྲྭ་འབྲིང་ཆུང་གི་སློབ་མའི་ལུས་རྩལ་འགྲན་ཚོགས་སྐབས་དྲུག་པའི་ཐོག་སྐར་དམར་བུད་མེད་རྐང་རྩེད་སྤོ་ལོའི་རུ་ཁག་ལ་སློབ་ཆུང་བུ་མོའི་ཚོགས་ཆུང་གི་ཨང་དང་པོ་ཐོབ། རྐང་རྩེད་སྤོ་ལོའི་སློབ་གསོར་ཐོབ་པའི་གྲུབ་འབྲས་ལ་བརྟེན་ནས་སློབ་གྲྭ་དེར་ཧང་ཀྲོའུ་ཨེ་ཤེ་ཡའི་ལུས་རྩལ་འགྲན་ཚོགས་སྐབས་བཅུ་དགུ་པའི་སྒྲིག་འཛུགས་ཨུ་ལྷན་གྱིས“ཨེ་ཤེ་ཡའི་ལུས་རྩལ་འགྲན་ཚོགས་ཀྱི་རྐང་རྩེད་སྤོ་ལོའི་ཕུགས་འདུན་སློབ་གྲྭའི”མཚན་སྙན་སྤྲད་པ་རེད།

རྐང་རྩེད་སྤོ་ལོས་ས་མཐོའི་བུ་མོ་ཚོར་སྒོ་མོ་ཞིག་ཕྱེ་ཡོད། རུ་མི་ཚོས་དཀའ་སྤྱད་འབད་བརྩོན་གྱིས་རྐང་རྩེད་སྤོ་ལོའི་ཕུགས་འདུན་སྒྲུབ་པ་ནི་ས་མཐོའི་སྐལ་བཟང་མེ་ཏོག་ལྟར་ཆར་རླུང་ཁྲོད་མཚར་སྡུག་རྣམ་པར་བཀྲ་བ་དང་གཉིས་སུ་མ་མཆིས།