༄༅། ལས་འཕྲོ་མེད་པའི་ཆུང་འདྲིས་།

ཆུང་འདྲིས་བྱམས་པ་ཟེར་བ། །

སེམས་ལ་ཐོགས་པའི་མི་རེད། །

ལས་ཀྱིས་མཉམ་དུ་མ་འཛོམས། །

དྲན་གདུང་གཙག་གིས་གཙེས་བྱུང་། །

དགུང་གི་ཟླ་བ་ཡིན་ན། །

སྤྲིན་པ་ཡལ་བར་སྒུག་ཆོག །

སྤང་གི་སེར་ཆེན་ཡིན་ན། །

དབྱར་ཟླ་ཤར་བར་སྒུག་ཆོག །

ལས་འཕྲོ་མེད་པའི་ཆུང་འདྲིས། །

སྒུག་དང་མ་སྒུག་མེད་ཀྱང་། །

སེམས་ལ་ཐོགས་པའི་མི་དེ། །

སེམས་ནས་བསུབ་ཐབས་མི་འདུག །

ཆུང་འདྲིས་ཆུང་འདྲིས་ཟེར་བ། །

ཁ་འབྲས་མཚར་པོ་མེད་ཀྱང་། །

ཆུང་ཆུང་བྱིས་པའི་དུས་ནས། །

འདྲིས་ཤིང་འགྲོགས་པའི་མི་རེད། །

བྲིས་པའི་ཡི་གེ་ནག་ཆུང་། །

དྲི་བཞོན་རླུང་ལ་སྐུར་ཆོག །

སེམས་ལ་ཟུག་པའི་བརྩེ་བ། །

བསུབ་ཀྱང་ཟུབ་ཐབས་མི་འདུག །

ཉོས་པའི་གཟི་བྱུར་རྒྱན་ཆ། །

གོང་ཐང་རྒྱུ་ཡིས་འཇལ་ཆོག །

ལས་འཕྲོ་ཟད་པའི་མི་ལ། །

འཕྲད་ཡོང་བསམ་པ་མི་འདུག །

ཟླ་འོད་མཚོ་ལ་ཕོག་དུས། །

ཁྱོད་ཞལ་ཡིད་ལ་འཁོར་བྱུང་། །

མཚན་མོའི་རྨི་ལམ་ནང་དུ། །

ཆུང་འདྲིས་མཇལ་བ་རྨིས་བྱུང་། །

ཁུ་བྱུག་གསུང་སྙན་ཐོས་དུས། །

ཁྱོད་ཀྱི་སྙིང་གཏམ་དྲན་བྱུང་། །

སྙིང་ནས་བཤད་པའི་སྐད་ཆར། །

འགྱུར་བ་མེད་ན་དགའ་བ། །

ནེའུ་གསིང་མེ་ཏོག་ཚལ་དུ། །

རྐང་དྲུག་བུང་བ་འཁོར་འཁོར། །

ཆུང་འདྲིས་ཁྱོད་ལ་འཁོར་ཡང་། །

ལས་འཕྲོ་མེད་པས་སྐྱོ་བྱུང་། །

༄༅་། དམ་བཅའ་བྲག་རིས་མ་།

སེམས་ཀྱི་ཞིང་ཐང་གྲུ་བཞིར། །

བརྩེ་སེམས་སྙེ་མས་གང་སོང་། །

མི་ཁའི་ཁ་བ་བུ་ཡུག །

བབས་ཀྱང་སེམས་ཁྲལ་མི་འདུག །

དམ་ཚིག་སེམས་ཀྱི་རི་མོ། །

འགྱུར་མེད་རྡོ་ལ་བརྐོས་ཡོད། །

ལོ་ཟླའི་དུས་ཚིགས་འགྱུར་ཡང་། །

ཐུགས་ཁྲལ་གནང་དགོས་མི་འདུག །

དུང་བ་གཡུ་ཡི་མཚོ་མོ། །

ཡིད་ཀྱི་དབུས་སུ་འཁྱིལ་ཡོད། །

གྲང་ལྷགས་གཙག་གིས་གཙེས་རུང་། །

མཚོ་མདོག་ག་ལ་འགྱུར་བ། །

མི་ཚེའི་ལྗོན་ཤིང་ཕྲ་མོ། །

རྒས་ནས་གོག་པོར་གྱུར་ཀྱང་། །

བརྩེ་སེམས་འདབ་མའི་ཁ་དོག །

གཞན་ལ་སྨོན་དགོས་མི་འདུག །

ཡིད་ཀྱི་བྱིའུ་ཆུང་འཇོལ་མོ། །

ལྗོན་པའི་གསེབ་ལ་ཕེབས་དང་། །

ང་གཉིས་སེམས་པ་འདྲེས་ནས། །

བདེ་སྐྱིད་འཚོ་བར་རོལ་ཆོག །