འབྲུ་དྲུག་སྙེ་མའི་རྦ་རླབས་འཕྱུར་བའི།
གསེར་མདོག་གི་སྟོན་ཁ།
ནས་ཞིང་གི་སྐྲ་ལོ་ཐུར་དུ་གུག་པའི།
ཡིད་འོང་གི་སྟོན་ཁ།
གྲོ་ནས་ཀྱི་བསུང་ཞིམ་གང་སར་འཐུལ་བའི།
ལོ་ལེགས་ཀྱི་སྟོན་ཁ།
གསེར་མདོག་གི་ན་བཟའ་བཞེས་པའི།
མཛེས་སྡུག་གི་ཞིང་ཐང་གྲུ་བཞི།
སྙན་ངག་ཅིག་གི་དབྱངས་འགྲོས་རེད།
སྙེ་མའི་མགོ་ལྕོག་ལྡེམ་ལྡེམ་གཡོ་བའི།
འབྲས་བུས་གཏམས་པའི་ཞིང་ཐང་གྲུ་བཞི།
སྙན་ངག་ཅིག་གི་ནང་སྙིང་རེད།
ནས་ཞིང་གི་སྐྲ་ལོ་གཅོད་པའི།
བརྔ་བསྡུ་འཕྲུལ་ཆས་ཀྱི་སྒྲ་དབྱངས་བར་ནས།
སོ་ནམ་ཞིང་པས་འཛུམ་མདངས་ཀྱི་མེ་ཏོག་གཏོར།
འབྲུ་རྡོག་རེ་རེ་སྦར་མཐིལ་དུ་ལེན་པའི།
སྐད་ཅིག་མའི་ཚོར་བའི་བར་གསེང་དེར།
ཞིང་པའི་གདོང་ནས་འཛུམ་གྱི་མེ་ཏོག་བཞད།
གསེར་མདོག་གི་སྟོན་ཁ།
ཡིད་འོང་གི་སྟོན་ཁ།
མདོར་ན།
སྟོན་ཁ་ནི་སྙན་ངག་ཅིག་གི་བརྒྱུད་རིམ་རེད།