ལན་བུ་རྒྱ་ལྕང་ལོ་མར། །

མེ་ཏོག་ཕྲ་རྒྱན་བཏབ་ཡོད། །

པད་མའི་ཞལ་ཁྱིམ་ངོས་སུ། །

འཛུམ་དཀར་རི་མོ་བཀྲ་བྱུང་། །

ལང་ཚོའི་གཞོན་ཤ་མཛེས་པོར། །

ཁྲེལ་གཞུང་ཉི་ཟླ་རང་འཁོར། །

མ་ལོ་སྙིང་ལ་ཉེ་བོ། །

ཕ་ཁྱིམ་ནང་གི་གཅེས་ལོ། །

དར་མའི་ལང་ཚོ་སྨིན་དུས། །

མ་འདོད་མནའ་མར་བསྐྱལ་སོང་། །

ཕྱི་མིག་ཡུལ་ལ་ཐོགས་ནས། །

མིག་ཆུས་མཁུར་ཚོས་སྦངས་སོང་། །

ས་མཐའི་ཉིན་ཞག་རིང་མོར། །

སེམས་པ་ཡུལ་ལ་ཤོར་སོང་། །

དར་རྒུད་ལས་འཕྲོའི་ཁྲོད་དུ། །

མ་ཡི་ལང་ཚོ་རྒས་སོང་། །

ཁྱིམ་གཞིས་གཡང་ར་གྲུ་བཞིར། །

རིགས་ཀྱི་བུ་ཕྲུག་བཙས་སོང་། །

གནག་སྣུམ་སྐྲ་ཡི་ལན་བུར། །

ཁ་བའི་འདབ་མ་བབས་སོང་། །

རི་ཀླུང་ལྷས་འདབས་ཁྲོད་དུ། །

མི་ཚེའི་གཏམ་རྒྱུད་བྲིས་སོང་། །

ཨ་མ་བྱམས་སེམས་བདག་མོ། །

བུ་ངའི་སེམས་ཀྱི་ཉི་མ། །