རབ་གསལ་ཉི་ཟླ་ཡི་འོད་མདངས་འཕྲོས་ཤིང་། །

རབ་དཀར་ལྷུན་པོ་ཡིས་མཐའ་ནས་བསྐོར་བའི། །

རབ་མཛེས་གཡུ་མདོག་གི་རི་ལུང་ཐང་གསུམ། །

རབ་མང་སྐྱེ་འགྲོ་ཡི་འཚོ་གཞིས་དྲོན་མོ། །

མི་ཚེའི་མེ་ཏོག་གི་ཟེའུ་འབྲུ་དགོད་ཅིང་། །

མི་སེམས་བརྩེ་དུང་གི་འདབ་མ་བརྟན་པའི། །

མི་ལུས་དཔག་བསམ་གྱི་ལྗོན་བཟང་དབང་པོ། །

མི་ཡི་ལུང་པ་རུ་དལ་གྱིས་ལྡེམ་ཡོང་། །

འཚོ་བའི་ཐབ་ཚང་དུ་དྲོད་ཁོལ་འཁྱིལ་ཞིང་། །

འཚོ་ཆས་བཟའ་བཏུང་ཀུན་མ་ལུས་འཛོམས་པའི། །

འཚོ་གཞིས་ཕྱི་ནང་གཉིས་སྐྱིད་ཀྱིས་ཁེངས་པས། །

འཚོ་བའི་འདུན་པ་འདི་འགོག་ཐབས་མི་འདུག །

ལས་སྨོན་རྟེན་འབྲེལ་གྱི་ཁ་ཡིག་ཡག་ཅིང་། །

ལས་འཕྲོའི་དམ་ཚིག་གི་སྲུང་མདུད་ཐེབས་པའི། །

ལས་བཟང་མི་ལུས་ཀྱི་ཙན་དན་སྡོང་པོ། །

ལས་རླུང་འཇམ་པོ་ཡིས་དལ་གྱིས་སྒུལ་བྱུང་། །

དཀར་གཙང་ཁ་བ་ཡི་འདབ་མ་འཐོར་ཞིང་། །

དཀར་དམར་མེ་ཏོག་གི་དྲི་བསུང་འཐུལ་ས། །

དཀར་པོ་གངས་རི་ཡི་མཐའ་ནས་བསྐོར་བའི། །

དཀར་ངོགས་འཇིག་རྟེན་འདི་ཅི་འདྲའི་སྐྱིད་པ། །

འཁོར་བའི་སྤང་ལྗོངས་ཀྱི་གཞི་རྒྱ་ཡངས་ཤིང་། །

འཁོར་བའི་ཉིན་སྲིབ་ཏུ་བདེ་དྲོད་འབར་བས། །

འཁོར་བའི་མི་ཚོགས་ཀྱི་དམར་ཆུང་སེམས་པ། །

འཁོར་བའི་མཛེས་པ་འདིར་ངང་གིས་ཆཌ་སོང་། །