དྲན་དང་བརྗེད་ངས་ཀྱི་དབར་ནས། །

མི་ལོ་ཉེར་དྲུག་ལ་ཐོན་སོང་། །

ཉེར་དྲུག་དྲན་པ་ཡི་སྣེ་མོར། །

བརྩེ་བའི་གཏམ་རྒྱུད་ཅིག་དཔྱངས་ཡོད། །

དུང་སེམས་དགུང་སྔོན་གྱི་དབྱིངས་སུ། །

བརྩེ་བའི་ཟླ་རིས་དེ་གསལ་ན། །

ལིང་ལིང་སྤྲིན་དཀར་གྱི་སྦར་མོས། །

བསྐུངས་དང་མ་བསྐུངས་ཤིག་མི་འདུག །

སྙན་ངག་མཁན་པོ་བཞིན་བཤད་ན། །

མཁས་འདོད་གྲགས་འདོད་དེ་མ་ཡིན། །

ཚངས་དབྱངས་རྒྱ་མཚོ་ལྟར་གླེང་ན། །

ཕར་དགའ་ཚུར་འཐད་དེ་ལོས་ཡིན། །

སེམས་ལ་ཨ་ལོང་ཞིག་ཡོད་ན། །

འགུགས་བྱེད་ལྕགས་ཀྱུ་དེ་ཁྱོད་རེད། །

དགུང་ལ་སྤྲིན་ཕུང་ཞིག་རྒྱུ་ན། །

གཡོ་བྱེད་བསིལ་རླུང་དེ་ཁྱོད་རེད། །

འདྲ་འདྲ་མང་པོ་ཡི་ནང་ནས། །

མི་འདྲ་ཤེས་རབ་ཀྱི་དབུ་འཕང་། །

མི་འདྲ་མང་པོ་ཡི་ནང་ནས། །

འདྲ་བ་ངར་འཛིན་གྱི་མཚན་མ། །