འདི་ག་ཚགས་པར་ཁང་དུ་པེ་ཅིང་ནས་ཟླ་1ཚེས་27ཉིན་གློག་འཕྲིན་འབྱོར་གསལ། ཟླ་1ཚེས་27ཉིན། “རྒྱུད་གཅིག་ལམ་གཅིག”རྒྱལ་སྤྱིའི་མཉམ་ལས་མཐོ་རིམ་གླེང་སྟེགས་བློ་འདྲི་ཨུ་ལྷན་གྱིས་བརྙན་ལམ་ཚོགས་འདུ་འཚོགས་པ་དང་འབྲེལ་འགོ་བརྗོད་དུ《“རྒྱུད་གཅིག་ལམ་གཅིག”མཉམ་སྐྲུན་གྲོས་འགོ——སྤུས་ཚད་མཐོ་བའི་རྒྱལ་སྤྱིའི་དཔལ་འབྱོར་མཉམ་ལས》ཞེས་པའི་ཞིབ་འཇུག་སྙན་ཞུ་ཁྱབ་བསྒྲགས་བྱས་པ་རེད།
བློ་འདྲི་ཨུ་ལྷན་སྐོང་ཚོགས་བྱེད་མཁན་དང་ཕྱི་འབྲེལ་པུའི་པུའུ་ཀྲང་གཞོན་པ་མ་ཁྲའོ་ཤུས་ཀྱིས་ཚོགས་འདུའི་ཐོག་ཤིས་ཚིག་གནང་སྟེ། ལོ་བརྒྱའི་ནང་འཕྲད་མ་མྱོང་བའི་འགྱུར་ལྡོག་ཆེན་པོའི་འཕེལ་རིམ་མགྱོགས་སུ་ཕྱིན་པ་དང་། དམག་འཁྲུག་རྗེས་ཀྱི་རྒྱལ་སྤྱིའི་མ་ལག་དང་རྒྱལ་སྤྱིའི་སྒྲིག་ལམ་ལ་འགྲན་སློང་དྲག་པོ་འཕྲད་པ། ཕྱོགས་མང་ཚོང་དོན་སྒྲིག་སྲོལ་ལ་གནོད་སྐྱོན་ཚབས་ཆེན་ཕོག་པའི་རྒྱབ་ལྗོངས་ཆེན་པོའི་འོག “རྒྱུད་གཅིག་ལམ་གཅིག”མཉམ་སྐྲུན་རྒྱལ་ཁབ་ཀྱིས་ཕན་ཚུན་སྦྲེལ་མཐུད་དང་ཐུན་མོང་འཕེལ་རྒྱས་ལ་གཞོལ་བ་དང་གཉིས་ཁེ་གཉིས་ཕན་གྱི་རྒྱལ་སྤྱིའི་མཉམ་ལས་བྱས་ཏེ། མཐུན་སྒྲིལ་དང་། མཉམ་ལས། གཉིས་ཁེ་བཅས་ཀྱི་དགེ་མཚན་ལྡན་པའི་བརྡ་རྟགས་བཏང་ནས་འཛམ་གླིང་ལ་བརྟན་ལྷིང་རང་བཞིན་དང་དྲང་ནུས་སྦྱིན་ཏེ་ལོ་རྒྱུས་ཡར་ཐོན་ལ་སྐུལ་འདེད་གཏོང་བའི་སྟོབས་ཤུགས་གལ་ཆེན་ཞིག་ཏུ་གྱུར་ཡོད། “རྒྱུད་གཅིག་ལམ་གཅིག”མཉམ་སྐྲུན་བྱེད་པ་ནི་ཀྲུང་གོས་བཏོན་པ་དང་འཛམ་གླིང་ལ་གཏོགས་པའི་རྒྱལ་སྤྱིའི་སྤྱི་པའི་ཐོན་རྫས་ཤིག་རེད་ལ། མིའི་རིགས་ཀྱི་ལས་དབང་གཅིག་མཐུན་ཚོགས་པ་འཛུགས་པའི་ལག་ལེན་གྱི་ལས་སྟེགས་ཤིག་ཀྱང་རེད། ཀྲུང་གོ་ཕྱོགས་ཀྱིས་ཕྱོགས་ཁག་དང་རོགས་ཟླའི་འབྲེལ་བ་མུ་མཐུད་གཏིང་ཟབ་ཏུ་བཏང་སྟེ། “རྒྱུད་གཅིག་ལམ་གཅིག”དེ་དར་རྒྱས་ཀྱི་ལམ་དང་། མཉམ་ལས་ཀྱི་ལམ། གོ་སྐབས་ཀྱི་ལམ་བཅས་སུ་འགྱུར་བར་བྱས་ནས་འཛམ་གླིང་དཔལ་འབྱོར་བརྟན་པོ་འཕར་བ་དང་རྒྱལ་སྤྱིའི་དཔལ་འབྱོར་ཚོང་དོན་མཉམ་ལས་འཕེལ་རྒྱས་ཡག་པོ་ཡོང་བར་ལེགས་སྐྱེས་དེ་བས་ཆེ་བ་འབུལ་རྒྱུ་ཡིན་ཞེས་བརྗོད་པ་རེད།
བློ་འདྲི་ཨུ་ལྷན་གྱི་ཨུ་ཡོན་ཚོས“རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོས་འཛམ་གླིང་གི་དཔལ་འབྱོར་འཕར་རྒྱུར་སྐུལ་འདེད་གཏོང་བ་རདང་རྒྱུན་མཐུད་ཆོག་པའི་འཕེལ་རྒྱས་ལ་སྐུལ་འདེད་གཏོང་བར་ནུས་པ་གལ་ཆེན་ཐོན་པ་དང་། མིག་སྔའི་རྒྱལ་སྤྱིའི་དུས་བབ་འོག་རྒྱལ་ཁབ་ཁག་དབར་ཕན་ཚུན་ཡིད་ཆེས་བྱེད་ཤུགས་ཆེ་རུ་གཏོང་བ་དང་རྒྱལ་སྤྱིའི་མཉམ་ལས་ལ་སྐུལ་འདེད་གཏོང་བར་ལེགས་སྐྱེས་གལ་ཆེན་ཕུལ་ཡོད་ཅེས་བརྗོད་པ་མ་ཟད། གྲོས་འགོའི་ནང་ཞུགས་མཁན་ཕྱོགས་ཀྱིས་ཕན་ཚུན་སྦྲེལ་མཐུད་དང་། རྒྱལ་སྤྱིའི་ཚོང་དོན། མི་ཐབས་རིག་ནུས། གྲངས་འཛིན་དཔལ་འབྱོར་སོགས་ཁྱབ་ཁོངས་ཀྱི་མཉམ་ལས་ལ་ཤུགས་སྣོན་རྒྱག་རྒྱུའི་བསམ་འཆར་ཡང་བཏོན་པ་རེད།