འདི་ག་ཚགས་པར་ཁང་དུ་པེ་ཅིང་ནས་ཟླ་1ཚེས་26ཉིན་གློག་འཕྲིན་འབྱོར་གསལ། ཟླ་1ཚེས་26ཉིན་གྱི་མཚན་མོའི་ཆུ་ཚོད་བཅུ་གཉིས་པ་ནས་བཟུང་། རྒྱལ་ཡོངས་ལྕགས་ལམ་གྱིས་མེ་འཁོར་འཁོར་སྐྱོད་ཀྱི་ལམ་ཐིག་གསར་པ་ལག་ལེན་བསྟར་བ་རེད། གསར་འགོད་པར་སྤྱི་བདེ་པུའུ་ལྕགས་ལམ་སྤྱི་བདེ་ཅུས་ནས་ཤེས་རྟོགས་བྱུང་བར། རྒྱལ་ཡོངས་ལྕགས་ལམ་སྤྱི་བདེ་ལས་ཁུངས་ཀྱིས་བྱ་ཐབས་ཞིབ་ཚགས་སུ་བཏང་བ་དང་སྐོར་ཞིབ་ལ་ཤུགས་བརྒྱབ་ནས“ལམ་ཐིག་གསར་པར”འཁོར་སྐྱོད་བདེ་འཇགས་ཡོང་བར་བྱས་པ་རེད།
ས་གནས་ཁག་གི་ལྕགས་ལམ་སྤྱི་བདེ་ལས་ཁུངས་ཀྱིས་ལྕགས་ལམ་ཁེ་ལས་དང་འབྲེལ་གཏུག་བྱ་རྒྱུར་ཤུགས་སྣོན་བརྒྱབ་ནས་མེ་འཁོར་གཏོང་བའི་གནས་ཚུལ་དུས་ཐོག་ཏུ་ཁོང་དུ་ཆུད་པར་བྱས་ཐོག དོན་དངོས་དང་ཟུང་འབྲེལ་གྱིས“ལམ་ཐིག་གསར་པ”འཁོར་སྐྱོད་བྱས་རྗེས་འགྲུལ་པ་མང་ཤོས་དང་མེ་འཁོར་འབབ་ཚུགས་སུ་འགྲུལ་པ་མང་ཤོས་སྐབས་ཀྱི་གནས་ཚུལ་ལ་དབྱེ་ཞིབ་བྱས་ནས། ཉེན་ཁའི་མངོན་མེད་རྐྱེན་ངན་ལ་ཞིབ་འཇུག་ངང་བརྡར་ཤ་གཅོད་པ་དང་། མེ་འཁོར་འབབ་ཚུགས་དང་ས་གནས་ཀྱི་སྤྱི་བདེ་དང་འགྲིམ་འགྲུལ་སོགས་ཚན་པའི་དབར་གྱི་འབྲེལ་བར་ཤུགས་སྣོན་རྒྱག་པ། མཉམ་འབྲེལ་གྱི་འཕྲལ་སྡོམ་ཐག་གཅོད་ལམ་སྲོལ་འཐུས་སྒོ་ཚང་དུ་གཏོང་བ་བཅས་བྱས་ཡོད། ཉེན་རྟོག་པ་བཀོད་གཏོང་ལུགས་མཐུན་དང་འབབ་ཚུགས་ཁུལ་དྲ་མིག་ཅན་དུ་འཛུགས་སྐྲུན་ལ་ཤུགས་བརྒྱབ་ནས་གཙོ་གནད་འབབ་ཚུགས་དང་། གཙོ་གནད་ས་ཁོངས། གཙོ་གནད་དུས་ཚོད་བཅས་ལ་སྐོར་གཡེང་ཞིབ་བཤེར་བྱེད་ཤུགས་ཆེ་རུ་བཏང་ཡོད། དེའི་རིང་པེ་ཅིང་ལྕགས་ལམ་སྤྱི་བདེ་ཁྲུའུ་ཡིས་མི་འཐེན་ནས་པེ་ཅིང་འབབ་ཚུགས་དང་པེ་ཅིང་འབབ་ཚུགས་ནུབ་མ་སོགས་འགྲུལ་སྐྱེལ་འབབ་ཚུགས་ཆེ་གྲས་6ཏུ་བསྐྱོད་དེ། “ལམ་ཐིག་གསར་པར”ཁ་གཏད་གཅོག་ཐབས་དོན་འཁྱོལ་བྱེད་པར་ལྟ་སྐུལ་མཛུབ་ཁྲིད་བྱས་པ་རེད། ཐའེ་ཡོན་ལྕགས་ལམ་སྤྱི་བདེ་ཁྲུའུ་ཡིས་ཚོགས་ཆུང་4སྒྲིག་འཛུགས་བྱས་ཏེ་དོ་དམ་བྱེད་ཁོངས་ཀྱི་འགྲུལ་སྐྱེལ་མེ་འཁོར་འབབ་ཚུགས་43གྱི་མེ་འཁོར་ཁ་འགོག་པ་དང་ཟོག་འདྲེན་མེ་འཁོར་གཏོང་བའི་འགྱུར་ལྡོག་གནས་ཚུལ་ལ་བརྟག་ཞིབ་ནན་ཏན་བྱས་ནས“འབབ་ཚུགས་རེར་བདེ་སྲུང་ཇུས་གཞི་རེ”ལག་ལེན་བསྟར་ཡོད། ལན་ཀྲོའུ་དང་། པའོ་ཐོའུ། དབྱིན་ཁྲོན་སོགས་ལྕགས་ལམ་སྤྱི་བདེ་ཁྲུའུ་ཡིས་ས་གནས་ས་ཐོག་ཏུ་ལྟ་ཞིབ་ཚོད་འཛིན་དང་བརྙན་ལམ་ནས་སྐོར་ཞིབ་བྱས་པ་བརྒྱུད། གཉེར་སྐྱོང་བྱས་མ་ཐག་གི་གསར་དུ་བསྐྲུན་པའི་ལམ་ཐིག་དང་མེ་འཁོར་འབབ་ཚུགས་ཀྱི་འགྲུལ་པ་མང་ཉུང་གི་གནས་ཚུལ་ལ་དམ་པོར་དམིགས་ནས་འགྲུལ་པ་མང་ཤོས་སྐབས་ཀྱི་གནས་ཚུལ་ལ་དུས་ཐོག་ཏུ་ཁ་གཏད་ནུས་ལྡན་བཅག་ཡོད། ནན་ཅིང་ལྕགས་ལམ་སྤྱི་བདེ་ཁྲུའུ་ཁྲང་ཀྲོའུ་ས་ཚིགས་མངགས་གཏོང་ཁང་གིས་དོ་དམ་བྱེད་ཁོངས་ཀྱི་ཁྲང་ཀྲོའུ་དང་། ཁྲང་ཀྲོའུ་བྱང་རྒྱུད། ཆི་ཧྲུའུ་ཡན་བཅས་འགྲུལ་སྐྱེལ་འབབ་ཚུགས་3གྱི་ཉེན་རྟོག་པ་བཀོད་སྒྲིག་བྱས་ནས“ལམ་ཐིག་གསར་རྙིང”དང་བདེ་འཇགས་ལྡན་པའི་ངང་སྦྲེལ་མཐུད་ཐུབ་པའི་འགན་ལེན་བྱས་པ་རེད། （སྐལ་མཆོག་གིས་བསྒྱུར། པ་སངས་ཚེ་རིང་གིས་ཞུས）