“2023ལོར་ཀྲུང་གོའི་དཔལ་འབྱོར་5.2%འཕར་བ་དང་། 2024ལོར་སྔོན་དཔག་བྱས་ན་ལོ་ཧྲིལ་པོར་དཔལ་འབྱོར་5%ཙམ་འཕར་རྒྱུ་རེད། གྲངས་གཞི་དེ་དག་ལས་ཀྲུང་གོའི་དཔལ་འབྱོར་འཕར་ཚད་བརྟན་ཐོག་ཡར་འཕེལ་བྱུང་ནས་རྒྱལ་སྒྲོལ་ཁེ་ལས་མང་པོ་ཞིག་གིས་ཀྲུང་གོའི་འཕེལ་རྒྱས་ཀྱི་མདུན་ལྗོངས་ལ་ཡིད་ཆེས་བརྟན་པོ་བྱེད་པ་གསལ་བཤད་ཐུབ་ཀྱི་ཡོད” ཉིན་ཤས་གོང་། མའེ་ཁེན་ཞི་ཀྲུང་གོའི་ཁུལ་གྱི་ཀྲུའུ་ཞི་ཉི་དབྱི་ལིས་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས། ཚན་རྩལ་གསར་གཏོད་ཀྱི་སྣེ་ཁྲིད་ནུས་པ་དང་། གཞི་ཁྱོན་ཧ་ཅང་ཆེ་བའི་ཁྲོམ་རའི་ལེགས་ཆ། ཀྲུང་གོའི་ཁེ་ལས་རྒྱལ་སྤྱི་ཅན་དུ་འཕེལ་རྒྱས་འགྲོ་བའི་འཕེལ་ཕྱོགས་སོགས་ཀྱི་ཐད་ནས་དབྱེ་ཞིབ་བྱས་ཏེ། དུས་ཡུན་རིང་པོར་ཀྲུང་གོའི་དཔལ་འབྱོར་འཕེལ་རྒྱས་ཀྱི་མདུན་ལྗོངས་ལ་ལྟ་སྟངས་ཡག་པོ་འཛིན་གྱི་ཡོད་ཅེས་བརྗོད་པ་རེད།

“གོ་ལ་ཧྲིལ་པོའི་ཁྲོམ་ར་དང་བསྡུར་ན། རྒྱལ་སྒྲོལ་ཁེ་ལས་མང་པོ་ཞིག་གིས་ཀྲུང་གོའི་ཁྲོམ་ར་ཆེན་པོ་དང་གསར་གཏོད་ནུས་པ་དེ་ས་གནས་གཞན་དུ་ཚབ་བྱེད་མཁན་རྙེད་ཐབས་བྲལ་བ་ཤེས་རྟོགས་བྱུང་ཡོད” ཉི་དབྱི་ལི་ཡིས་ཀྲུང་གོའི་ཐོན་ལས་འཁོར་འབྲེལ་དང་མཁོ་སྤྲོད་འཁོར་འབྲེལ་གྱི་ལས་ཆོད་དང་། མ་གནས་ཀྱི་ལེགས་ཆ། གཞི་ཁྱོན་བཅས་འགྲན་ཟླ་བྲལ་བ་དང་ཀྲུང་གོའི་ལས་སྒོས་རྟག་ཏུ་རྒྱལ་སྒྲོལ་ཁེ་ལས་ཀྱི་གོ་ལ་ཧྲིལ་པོའི་ལས་སྒོའི་ཐོབ་སྐལ་གྱི་15%ནས་40%མི་འདྲ་བའི་བར་བཟུང་གི་ཡོད། ཀྲུང་གོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་དུས་མཚམས་སུ་སླེབས་པ་དང་བསྟུན་ནས་རྒྱལ་སྒྲོལ་ཁེ་ལས་མི་ཉུང་བ་ཞིག་གིས་བཀོད་སྒྲིག་གསར་པ་བྱེད་འགོ་བཙུགས་ཏེ“ཐོན་རྫས་གསར་གཏོད་དང་ཐབས་ལམ་ཕྱོགས་སྒྱུར་སོགས་ལས་སྒོ་ལེགས་སྒྲིག་ཧུར་ཐག་བྱས་ནས་ཀྲུང་གོའི་སྤུས་ཚད་མཐོ་བའི་འཕེལ་རྒྱས་ཁྲོད་གོ་སྐབས་དམ་འཛིན་བྱེད་ཀྱི་ཡོད”ཅེས་བརྗོད་པ་རེད།

སུའེ་ཙེར་ཏ་ཝ་སི་འཛམ་གླིང་དཔལ་འབྱོར་གླེང་སྟེགས་ཀྱི་2024ལོའི་ལོ་ཚོགས་ནང་ཞུགས་རིང་། ཉི་དབྱི་ལི་དང་རྒྱལ་སྒྲོལ་ཁེ་ལས་ཀྱི་དབུ་བཞུགས་ལག་བསྟར་དཔོན་མང་པོ་ཞིག་གིས་ཀྲུང་གོའི་དཔལ་འབྱོར་གྱི་མདུན་ལྗོངས་དང་དེ་བཞིན་རྒྱལ་སྒྲོལ་ཀུང་སིའི་འཕེལ་རྒྱས་ཀྱི་བར་མཐོངས་ལ་ངོ་ཐུག་གདོང་འཕྲད་ཀྱིས་གྲོས་བསྡུར་བྱས་ཡོད། ཁོང་གིས་ཚོགས་འདུར་ཞུགས་པའི་མྱོང་ཚོར་མཉམ་སྤྱོད་བྱེད་སྐབས། དབུ་བཞུགས་ལག་བསྟར་དཔོན་ཁག་གཅིག་གིས་ཀྲུང་གོའི་གསར་གཏོད་ནུས་པ་གོ་ལ་ཧྲིལ་པོའི་སྔོན་ཐོན་ཆུ་ཚད་དུ་སླེབས་པ་ཁས་ལེན་བྱས་ཡོད་ཅེས་བརྗོད་པ་རེད།

ཉི་དབྱི་ལིས་བལྟས་ན་ཀྲུང་གོའི་དཔལ་འབྱོར་འཕེལ་རྒྱས་ལ་ལེགས་ཆ་མང་པོ་ལྡན་ཡོད་པ་སྟེ། གཞི་ཁྱོན་ཆེ་བའི་ཁྲོམ་ར་ཕུད་ད་དུང་ཀྲུང་གོའི་ཁེ་ལས་ཀྱིས་ལག་རྩལ་མཐོ་བའི་བཟོ་སྐྲུན་ལས་རིགས་དང་ལྗང་མདོག་ཐོན་ལས་བཀོད་སྒྲིག་ལོ་མང་བྱས་པར་སྔོན་ཐོན་གྱི་ལེགས་ཆ་ལྡན་ཡོད། དེ་དང་ཆབས་ཅིག་ཀྲུང་གོའི་ཁེ་ལས་རྒྱལ་སྤྱི་ཅན་དུ་འཕེལ་རྒྱས་འགྲོ་བའི་གོམ་སྟབས་མགྱོགས་སུ་འགྲོ་བཞིན་ཡོད།

མི་རིང་བའི་གོང་། མའེ་ཁེན་ཞི་རུ་འཚོགས་པའི་ཀྲུང་གོའི་ཁེ་ལས་ཕྱི་རྒྱལ་ལ་ཏིང་མེ་གླིང་དུ་སྐྱོད་པའི་བརྗོད་དོན་གཙོ་བོའི་གྲལ་སྒོར་ཚོགས་འདུ་ཞིག་གི་ཐོག་ཉི་དབྱི་ལི་ཡིས། ཀྲུང་གོའི་ཁེ་ལས་ཁྲི་1ལྷག་ཙམ་ལ་ཏིང་མེ་གླིང་དུ་བཀོད་སྒྲིག་བྱས་ཡོད་པ་མ་ཟད། ད་དུང་ཁེ་ལས་མང་པོ་ཞིག་གིས་ལ་ཏིང་མེ་གླིང་དུ་ཁྲོམ་རར་རྟོག་ཞིབ་དང་ལས་སྒོ་རྒྱ་སྐྱེད་གཏོང་རྒྱུའི་གྲ་སྒྲིག་བྱེད་བཞིན་ཡོད་པ་ཧ་ལས་དགོས་པའི་སྒོ་ནས་ཤེས་རྟོགས་བྱུང་བ་རེད། “ཀྲུང་གོའི་ཁེ་ལས་སྔར་ལས་མང་བས་ཨེ་ཤེ་ཡ་ཤར་ལྷོ་དང་། ལ་ཏིང་མེ་གླིང་། དབུས་ཤར་ས་ཁུལ་སོགས་སུ་བཟོ་གྲྭ་འཛུགས་བཞིན་ཡོད” ཉི་དབྱི་ལི་ཡིས། སྣ་མང་ཅན་གྱི་བཀོད་སྒྲིག་དེས་ཀྲུང་གོའི་བཟོ་སྐྲུན་ལས་རིགས་འཕེལ་རྒྱས་ཀྱི་བར་མཐོངས་རྒྱ་ཆེར་ཕྱིན་པ་དང་ཀྲུང་གོ་རང་ངོས་ཀྱི་དཔལ་འབྱོར་འཕེལ་རྒྱས་ལ་སྐུལ་འདེད་བཏང་བ་མ་ཟད། གོ་ལ་ཧྲིལ་པོའི་དཔལ་འབྱོར་དང་རྒྱུན་མཐུད་ཆོག་པའི་འཕེལ་རྒྱས་ལའང་ལེགས་སྐྱེས་ཕུལ་ཡོད་ཅེས་བརྗོད་པ་རེད།

（པ་སངས་སྒྲོན་ལགས་ཀྱིས་བསྒྱུར། བདེ་སྐྱིད་ཀྱིས་ཞུས）