འདི་ག་ཚགས་པར་ཁང་དུ་ནག་ཆུ་ནས་གློག་འཕྲིན་འབྱོར་གསལ། ཉེ་ཆར། དུས་ཡུན་ཉིན་ལྔ་ཡི་བོད་ལྗོངས་ནག་ཆུ་གྲོང་ཁྱེར་གྱི་དུས་རབས་གསར་པའི་ཤེས་དཔལ་ལག་ལེན་གྱི“གྲོང་གསེབ་དར་རྒྱས། ནག་ཆུ་མདུན་སྐྱོད”ཀྱི་གྲུབ་འབྲས་འགྲེམས་སྟོན་སྐབས་གསུམ་པ་དང་འབྲོག་ཟོག་ཚོང་འདུས་སྐབས་བཅུ་བདུན་པ་ནག་ཆུ་གེ་སར་རྟ་རྒྱུག་ཐང་དུ་མཇུག་འགྲིལ་བ་རེད། ཚོང་འདུས་དེ་ཉེ་བའི་ལོ་ཤས་རིང་གི“གྲོང་གསེབ་དར་རྒྱས། ནག་ཆུ་མདུན་སྐྱོད”ཀྱི་གྲུབ་འབྲས་དང་དགུན་དུས་ཀྱི་འབྲོག་ཟོག་འགྲེམས་ཚོང་ཟུང་འབྲེལ་གྱི་རྣམ་པའི་ཐོག་ནས་གཉེར་བ་རེད། སྲིད་གཞུང་གིས་ལས་སྟེགས་བསྐྲུན་པ་དང་ཚོང་དོན་གཉེར་བའི་བྱ་ཐབས་ཀྱི་ཐོག་ནས་ཚོང་འདུས་ལ་ཁྱོན་འགྲེམས་གནས་1300ལྷག་ཙམ་བཙུགས་པ་དང་། གྲོང་ཁྱེར་ཡོངས་ཀྱི་རྫོང（ཆུས）11ནས་ཁྱེར་བའི་ས་གནས་ཀྱི་སྤུས་ལེགས་འབྲོག་ཟོག་300ལྷག་ཙམ་ད་ཐེངས་ཀྱི་ཚོང་འདུས་ལ་ཞུགས་པ་རེད། བསྡོམས་རྩིས་རགས་ཙམ་བརྒྱབ་པར་གཞིགས་ན། ཉིན་ལྔ་ཡི་ཚོང་འདུས་རིང་འཛད་སྤྱོད་པ་མི་ཐེངས་ཁྲི་2.4ལྷག་ཙམ་ལ་སྣེ་ལེན་ཞུས་པ་དང་། ས་གནས་ས་ཐོག་ཏུ་ཕྱིར་ཚོང་དང་གན་འཇོག་དངུལ་འབོར་སྒོར་དུང་ཕྱུར་3.3ལྷག་ཙམ་ཟིན་ཡོད་པ་རེད།

དུས་ཡུན་ཉིན་ལྔའི་རིང་ཚོང་འདུས་ཀྱི་ས་ཡུལ་དངོས་སུ་མི་ཚོགས་ཀྱིས་ཁེངས་ཤིང་། ཉོ་སྒྲུབ་ཚོང་པ་དང་། བརྒྱུད་ཚོང་བ། དེ་བཞིན་འཛད་སྤྱོད་པ་བཅས་མང་པོ་ཉོ་སྒྲུབ་དང་ངོ་འཕྲད་གྲོས་མོལ་མཉམ་ལས་བྱེད་པར་ཡོང་བའི་ཡིད་དབང་འཕྲོག་ཡོད། གསེར་རྙེད་ཆུས་ཉི་མ་ཤང་ནས་ཡིན་པའི་ནོར་འཛིན་གྱིས“ཕ་ཡུལ་གྱི་མངོན་མིན་རིག་གནས་ཤུལ་བཞག་ཡིན་པའི་ཐོན་རྫས་ཁྱེར་ནས་ད་ལོའི་ཚོང་འདུས་ལ་ཞུགས་རྒྱུ་བྱུང་བར་ཧ་ཅང་དགའ་པོ་བྱུང་། ཉིན་ལྔའི་ཕྱིར་ཚོང་དངུལ་འབོར་སྒོར་ཁྲི་10ལྷག་ཙམ་ཟིན་པ་མ་ཟད། ཚོང་ཡག་པོ་བྱུང་བ་དེས་ང་ཚོའི་སྲོལ་རྒྱུན་གྱི་ལག་ཤེས་བཟོ་རྩལ་པར་ཁས་ལེན་དང་སྐུལ་ལྕག་གང་ལེགས་བྱས་པ་མཚོན་ཐུབ”ཅེས་བརྗོད།

སྒྲུབ་གཉེར་ཚན་པ་ཡིན་པའི་གསེར་རྙེད་ཆུས་ཀྱིས་ཆེད་མངགས་དྲ་ཐོག་ཚོང་པ་10སྒྲིག་འཛུགས་བྱས་ཏེ། སློབ་ཐོན་སློབ་ཆེན་སློབ་མའི་ཐད་གཏོང་ཚོགས་པ་བཙུགས་ནས་མང་ཚོགས་ལ་འབྲོག་ཟོག་ཚོང་རོགས་བྱས་ཤིང་། བསྟུད་མར་ཐད་གཏོང་ཐེངས་4བྱས་པ་དང་། ལྟ་མཁན་ཁྲི་30ལྷག་ཙམ་ཟིན་ཡོད།

“འབྲོག་དུད་དང་། མཉམ་ལས་ཁང་། ཐད་གཏོང་ཁང་བཅས་ཟུང་དུ་འབྲེལ་བའི”དྲ་ཐོག་ཚོང་དོན་གྱི་བྱ་ཐབས་བརྒྱུད། ནག་ཆུའི་གྲོང་གསེབ་ཀྱི་དཔལ་འབྱོར་འཕེལ་རྒྱས་གསར་པ་ཡོང་བར་སྐུལ་འདེད་བཏང་ཡོད་པ་རེད།

（པ་ཚེས་བསྒྱུར། པ་ཚེ་དང་ཚེ་ལྷས་ཞུས）