“འཛམ་གླིང་ཡང་རྩེ”རུ“མཁའ་ལམ”སྐྲུན་པར་དཀའ་ངལ་ཇི་ཙམ་ཡོད་དམ།

མཚོ་བོད་གཞུང་ལམ་ལམ་ཐིག་ཧྲིལ་པོའི་ཆ་སྙོམས་ས་བབ་མཐོ་ཚད་སྨི་4000ཡན་ཟིན་པ་དང་། ཁྲོན་བོད་གཞུང་ལམ་ལམ་ཐིག་ཧྲིལ་པོར“ས་གཤིས་གནོད་འཚེའི་རྟེན་མཛོད་ཁང”ཞེས་བརྗོད་ཅིང་། དྲོད་ཚད་དམའ་བ་དང་གསོ་རླུང་དཀོན་པའི་དུས་སུ་མིའི་རིགས་ལ་འགྲན་སློང་ཆེན་པོ་འཕྲད་ཀྱི་ཡོད། བཙན་འགག་མང་པོ་གཏོར་བ་དང་། དྲག་ཏུ་འབབ་པའི་ཆུ་བོ་མང་པོ་བརྒལ་བ། མུ་མཐའ་མེད་པའི་གྲམ་ཐང་བརྒྱུད་པ། ཁུན་ལུན་རི་བོ་དང་གདང་ལ་བརྒྱབ་པ་བཅས་མི་3000ལྷག་ཙམ་གྱིས་རང་སྲོག་བློས་གཏོང་བྱས་པའི་ཡིད་སྐྱོ་ཞིང་བརྗིད་ཉམས་ལྡན་པའི་རྒྱལ་ཁའི་གླུ་དབྱངས་བརྩམས་ཡོད།

2024ལོའི་ཟླ་12ཚེས་25ཉིན་ནི་ཁྲོན་བོད་དང་མཚོ་བོད་གཞུང་ལམ་དུ་རླངས་འཁོར་ཤར་གཏོང་ཐུབ་ནས་ལོ་70འཁོར་བའི་ཉིན་མོ་རེད།

ལོ་70ལྷག་ཙམ་གྱི་གོང་ལ་ལམ་བཟོ་བ་ཁྲི་10ལྷག་ཙམ་གྱིས་ལྕགས་ཀྱི་ཐོ་བ་དང་ལྕགས་ཧྲེང་སྤྱད་དེ་གཡང་གཟར་དུ་ལམ་དྲུས་པ་དང་གངས་ལྗོངས་ས་མཐོར་རི་བོ་གཤགས་པ་དང་ཟམ་པ་བསྐྲུན། མཐར་ཁྲོན་བོད་དང་མཚོ་བོད་གཞུང་ལམ་གཉིས་པོ“V”དབྱིབས་ཧ་ཅང་ཆེན་པོ་ཞིག་ཆགས་ཏེ“འཛམ་གླིང་ཡང་རྩེའི”འཕེལ་རྒྱས་ཀྱི་ངོ་མཚར་བཏོད་ཡོད།

“ལམ་གཉིས”འགོ་འཛུགས་སར་བྱས་པའི“འཛམ་གླིང་ཡང་རྩེའི”སྟེང་གི་ལམ་དྲ་ཚགས་དམ་ཞིང་འགྲིམ་འགྲུལ་དེ་བས་ཤར་བགྲོད་ཐུབ།

དེ་སྔའི་བྱེ་རྡོའི་ལམ་ནས་ད་ལྟའི་སྣུམ་ནག་ལམ་བར། བོད་དུ་སྐྱོད་པའི་འགྲོ་ལམ་ཇེ་ལེགས་སུ་འགྲོ་བཞིན་ཡོད། མཚོ་བོད་གཞུང་ལམ་དུ་ཡུན་རིང་དངོས་ཟོག་སྐྱེལ་འདྲེན་ལ་གཞོལ་བའི་ཁ་ལོ་བ་མཱ་ཧྥུའུ་ཅུན་གྱིས“སྔོན་ཆད་གཟའ་འཁོར་གཅིག་ཙམ་འགོར་བའི་ལམ་ཐག་དེ། ད་ཆ་ཉིན་གཉིས་ནང་སླེབས་ཐུབ”ཅེས་བཤད།

གཞུང་ལམ་སྔོན་ལ་བཟོས་པ་དང་ལྕགས་ལམ་དང་མཁའ་ལམ་རིམ་བཞིན་ཤར་གཏོང་ཐུབ་ནས། དེང་རབས་ཀྱི་ཕྱོགས་བསྡུས་འགྲིམ་འགྲུལ་སྐྱེལ་འདྲེན་དྲ་བ་ཞིག་མགྱོགས་མྱུར་ཆགས་ཡོད།

ལོ་70ཡི་གོང་གོར་མོ་ནི་གྲམ་ཐང་ཞིག་རེད།

ལམ་བཟོ་བའི་དཔུང་ཁག་ཆེན་པོའི་སྣེ་ཁྲིད་དེ་མཚོ་བོད་གཞུང་ལམ་སྐྲུན་མཁན་དམག་དཔོན་མུའུ་ཧྲེང་ཀྲུང་གིས་ལྕགས་ཁེམ་ས་ལ་བཙུགས་ནས་སྐད་གསང་མཐོན་པོས“ང་ཚོའི་གུར་གང་དུ་བརྒྱབ་ན། དེ་གར་གོར་མོ་ཡིན”ཞེས་ཚང་མར་བཤད།

ད་ཆ་ལམ་སྐྲུན་རིང་གསར་དུ་ཆགས་པའི་གོར་མོར་ཕྱོགས་བཞི་མཚམས་བརྒྱད་ནས་ཡོང་བའི་མགྲོན་པོ་འདུས་ཤིང་། ཚང་མས་ནུས་ཤུགས་ཡོད་རྒུས་མཚོ་སྔོན་ཞིང་ཆེན་གྱི་ལྟེ་བའི་གྲོང་ཁྱེར་གཉིས་པ་འཛུགས་སྐྲུན་བྱེད་བཞིན་ཡོད། 1953ལོར་གོར་མོར་མི་ཁྲི་0.11ལས་མེད་པ་དང་། 2023ལོའི་ལོ་མཇུག་ཏུ་གནས་འདིར་མི་འབོར་ཁྲི་22.53ཟིན་ཡོད།

ལམ་བཟོ་རིང་རྒྱ་རིགས་དང་། བོད་རིགས། ཧུད་རིགས་སོགས་མི་རིགས་མང་པོ་འདུས་པའི་ལམ་བཟོ་བའི་དམག་དམངས་ཁྲི་10ལྷག་ཙམ་གྱིས་དེ་སྔ་སྲོག་ཉེན་ལ་མ་འཛེམས་པར་དཀའ་ངལ་སྣ་ཚོགས་ཁྱད་དུ་བསད།

ད་ཆའི་ཁྲོན་བོད་གཞུང་ལམ་དང་མཚོ་བོད་གཞུང་ལམ་གྱི་ལམ་རྒྱུད་དུ་མི་རིགས་ཁག་གི་མང་ཚོགས་ཀྱིས་ཞབས་ཞུའི་ས་ཚིགས་མང་པོ་བསྐྲུན་པ་དང་གཉེར་སྐྱོང་བྱས་ཏེ་འགྲོ་འོང་བྱེད་མཁན་རྣམས་ལ་ཞབས་འདེགས་ཞུ་བཞིན་ཡོད། མཚོ་བོད་གཞུང་ལམ་ལམ་རྒྱུད་ཀྱི་ས་བབ་མཐོ་ཚད་སྨི་4600ཡོད་པའི“བཀྲ་ཤིས་སྒོ་རྩིས་ཚོང་ཁང”དུ་ལོ་ལྟར་གསོ་རླུང་ལྕགས་དམ་དང་ལ་དུག་སེལ་བའི་སྨན་རྫས་གྲ་སྒྲིག་བྱས་ནས་མི་མང་པོ་ཞིག་ལ་རོགས་སྐྱོབ་བྱས་ཡོད། སྦྱིན་བདག་བཀྲ་ཤིས་བདེ་སྐྱིད་ལ་ཚང་མས་མཛའ་བརྩེའི་ངང“སེམས་རྩ་འཁོལ་བའི་ཨ་ཅག་ལགས”ཞེས་འབོད་ཀྱི་ཡོད།

“ལམ་གཉིས”རྨང་གཞིར་བྱས་པའི“ལམ་གཉིས”ཀྱི་སྙིང་སྟོབས་རྩ་བ་ཚུགས་པ་དང་རྒྱུན་འཛིན་དང་དར་སྤེལ་གཏོང་བ།

ས་བབ་མཐོ་ཚད་སྨི་4000ལས་བརྒལ་བའི་ཐང་སྡེར་དུ་སྐྱོད་པའི་མཚོ་བོད་མེ་འཁོར་ལམ་སྐྱོང་ས་ཚིགས་བརྒྱུད་སྐབས་ལམ་སྐྱོང་རུ་མིས་དེར་ཕྱོགས་ནས་གུས་འདུད་ཞུ་གི་ཡོད།

གོམས་གཤིས་དེ་ལོ་20ཙམ་རྒྱུན་འཁྱོངས་བྱས་ཡོད། ས་ཆ་དེར“ལམ་གཉིས”ཀྱིས“འཛམ་གླིང་ཡང་རྩེའི”འཕེལ་རྒྱས་ཀྱི་ངོ་མཚར་བདེན་དཔང་དང་གསར་གཏོད་བྱེད་བཞིན་ཡོད་ལ། མི་རྣམས་ཀྱི་བསྔགས་བརྗོད་ཀྱང་དང་ལེན་བྱེད་བཞིན་ཡོད།

མཚོ་བོད་གཞུང་ལམ་གྱི་ས་ཚིགས་མཐོ་ཤོས་ཏེ་གདང་ལའི་རྩེ་མོར་ས་བབ་མཐོ་ཚད་སྨི་5231ཟིན་པ་དང་ལོ་རེའི་ཆ་སྙོམས་དྲོད་ཚད་ཀླད་ཀོར་འོག་གི་ཧྲེ་ཧྲི་ཏུའུ་10ཡས་མས་ཟིན་ཞིང་། ལོ་གཅིག་ནང་ཉིན་120ལྷག་ཙམ་རིང་ལྷགས་པ་ཆེན་པོ་རིམ་པ་8ཡས་མས་རྒྱག་གི་ཡོད།

ལམ་སྐྱོང་ལས་བཟོ་ཁྱུ་དང་ཁྱུས་ཐོག་མཐའ་བར་གསུམ་དུ་ལམ་བུ་རྒྱུན་གཏན་ཤར་གཏོང་ཐུབ་པའི་འགན་ལེན་བྱེད་ཀྱི་ཡོད་པས་ཁོང་ཚོར“གནམ་འོག་གི་ལམ་སྐྱོང་ས་ཚིགས་དང་པོ”ཞེས་འབོད་ཀྱི་ཡོད།

དེ་ཙམ་མ་ཟད། ད་དུང“འཚོ་གནས་དཀའ་ཁུལ”སྐོར་སྲུང་བྱེད་མཁན་ཁུ་ཁུ་ཤིས་རིའི་སྐོར་ཞིབ་རུ་མི་དང་། སི་ཁྲོན་ནུབ་རྒྱུད་ཀྱི་གངས་རིའི་སྟེང་གཞུང་ལམ་སྲུང་སྐྱོབ་བྱེད་པའི་ལམ་སྐྱོང་བཟོ་པ་ལ་སོགས་ཡོད།

ལོ་70སོང་ཡང“ལམ་གཉིས”ཀྱི་སྙིང་སྟོབས་མ་ཉམས་པར་མུ་མཐུད་མ་འོངས་པའི་ཕྱོགས་སུ་གོང་འཕེལ་འགྲོ་བཞིན་ཡོད།

（ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ）

（ལྷག་ཚེ་དང་བུ་ཁྲིད་ཀྱིས་སྒྱུར་ཞུས་བྱས）