“གནད་སྨིན་དབུལ་སྐྱོར་འཐབ་ཇུས་ལག་བསྟར་བྱས་པ་བརྒྱུད། ཀྲུང་གོའི་དབུལ་པོ་དུང་ཕྱུར་ཁ་ཤས་ཚང་མ་དབུལ་སྒྲོལ་ཐུབ་ནས་མིའི་རིགས་ཀྱི་འཕེལ་རྒྱས་ལོ་རྒྱུས་ཀྱི་ངོ་མཚར་བཏོད་ཡོད”ཁུ་པའི་རྒྱལ་སྤྱིའི་ཆབ་སྲིད་ཞིབ་འཇུག་ལྟེ་གནས་ཀྱི་ཀྲུང་གོའི་གནད་དོན་སྐོར་གྱི་རིགས་གཅིག་མཁས་ཅན་ཨའེ་ཏེ་ཧྭ་ཏུའོ·ལེ་ཅ་ལཱ་ཏུའོ་ཡིས་ཉེ་ཆར་འདི་ག་ཚགས་པར་གྱི་གསར་འགོད་པའི་བཅར་འདྲི་དང་ལེན་བྱེད་སྐབས“ཀྲུང་གོའི་འཕེལ་རྒྱས་ནི་འཛམ་གླིང་ཞི་བདེ་དང་ཡར་རྒྱས་ཀྱི་སྟོབས་ཤུགས་འཕེལ་ས་རེད”ཅེས་བརྗོད་པ་རེད།

2001ལོའི་ཟླ་9པར་ལེ་ཅ་ལཱ་ཏུའོ་ཀྲུང་གོར་འཚམས་འདྲི་བྱེད་པར་ཐེངས་དང་པོ་ཡོང་བ་དང་། དེ་རྗེས་ཀྱི་ལོ་ཤས་ནང་ཁོང་ཀྲུང་གོར་འཚམས་འདྲིར་ཐེངས་10ལྷག་ཙམ་ཡོང་ནས་ཁྱབ་ཁོངས་ཁག་གི་ཀྲུང་གོའི་འཕེལ་རྒྱས་དང་ཡར་རྒྱས་ཉམས་སུ་མྱངས། ལེ་ཅ་ལཱ་ཏུའོ་ཡིས“མིའི་རིགས་ཀྱི་ལོ་རྒྱུས་ཐོག་གི་ཆེས་རླབས་ཆེ་བའི་དཔལ་འབྱོར་གསར་བརྗེ”ཞེས་ཀྲུང་གོའི་ཉེ་བའི་ལོ་ཤས་རིང་གི་འཕེལ་རྒྱས་དང་འགྱུར་ལྡོག་ཞིབ་པར་བརྗོད་ཡོད། ལེ་ཅ་ལཱ་ཏུའོ་ཡིས“ཀྲུང་གོས་སྒྱུར་བཅོས་སྒོ་དབྱེ་རྒྱུན་མཐུད་ངང་གཏིང་ཟབ་ཏུ་གཏོང་བ་དང་། རྒྱལ་ཁབ་འཛུགས་སྐྲུན་ལ་ཉིན་རེ་བཞིན་རྣམ་པ་གསར་པ་ཐོན་པར་སྐུལ་འདེད་གཏོང་བ། མི་དམངས་ཀྱི་འཚོ་བའི་ཆུ་ཚད་མངོན་གསལ་དོད་པོས་མཐོ་རུ་ཕྱིན་པ་བཅས་ཚང་མས་ང་ལ་བག་ཆགས་ཟབ་མོ་བཞག་བྱུང་། མྱུར་བགྲོད་ལྕགས་ལམ་དྲ་བ་ཕྱོགས་བཞིར་བསྲིངས་པ་དང་། ནུས་རྒྱུ་གསར་པའི་རླངས་འཁོར་གྱིས་ལྗང་མདོག་འགྲོ་སྐྱོད་ལ་རམ་འདེགས་བྱེད་པ། མིས་བཟོས་རིག་ནུས་རྒྱ་ཁྱབ་ཏུ་བཀོལ་སྤྱོད་སོགས་ཀྲུང་གོས་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ལ་རྒྱུན་ཆད་མེད་པར་སྐུལ་འདེད་གཏོང་བཞིན་ཡོད་པས་ཀྲུང་གོར་ཡོང་མྱོང་བའི་ཕྱི་རྒྱལ་བ་ཚང་མ་དེའི་ཐད་ཧང་སངས་ཀྱི་ཡོད་པ་ང་ལ་ཡིད་ཆེས་ཡོད། དཔལ་འབྱོར་འཕེལ་རྒྱས་དང་ཚན་རྩལ་ཡར་རྒྱས་བྱུང་བ་དང་བསྟུན་ནས། ཀྲུང་གོས་ཁོར་ཡུག་སྲུང་སྐྱོང་ལ་སྔར་བས་མཐོང་ཆེན་བྱས་པར། སྐྱེ་ཁམས་ཤེས་དཔལ་འཛུགས་སྐྲུན་ལ་གྲུབ་འབྲས་མངོན་གསལ་དོད་པོ་ཐོབ་ཡོད། ཀྲུང་གོའི་ནམ་མཁའ་གཡའ་དག་པ་དང་། ཆུ་མོ་དྭངས་ཤིང་གཙང་བ། མཁའ་རླུང་སྔར་བས་གཙང་བ། མི་དང་རང་བྱུང་ཁམས་སྔར་བས་ཞི་མཐུན་བཅས་ཡོད། ཡར་རྒྱས་དེ་དག་ལས་མི་རྣམས་ལ་སྐུལ་མ་ཐེབས་ཀྱི་ཡོད”ཅེས་བརྗོད། ལེ་ཅ་ལཱ་ཏུའོ་ཡིས་བལྟས་ན། ཀྲུང་གོས་2030ལོའི་གོང་ཐཱན་ཚད་མཐོ་ཤོས་དང་2060ལོའི་གོང་ཐཱན་ཚད་སྙོམ་སྦྱོར་ཡོང་བར་བརྩོན་ལེན་བྱ་རྒྱུའི་ཁྱབ་བསྒྲགས་བྱས་པ་དེ་ཐོག་ནས་འགན་འཁུར་མཁན་རྒྱལ་ཁབ་ཆེན་པོའི་འགན་འཁྲི་མཚོན་གྱི་ཡོད། ཁུ་པ་དང་ཀྲུང་གོ་རྒྱལ་ཁབ་གཉིས་ཀྱི་འབྲེལ་བའི་སྐོར་གླེང་སྐབས་ལེ་ཅ་ལཱ་ཏུའོ་ཡིས་ཁུ་པ་དང་ཀྲུང་གོའི་དབར་བར་ཐག་རིང་པོ་ཆོད་ཀྱང་མཛའ་གྲོགས་འགྲོ་འོང་ལ་ལོ་རྒྱུས་ཡུན་རིང་ལྡན་ཡོད་ཅེས་བརྗོད། 2021ལོར་ཕྱོགས་གཉིས་པོས“རྒྱུད་གཅིག་ལམ་གཅིག”མཉམ་སྐྲུན་གྱི་མཉམ་ལས་འཆར་འགོད་ལ་མིང་རྟགས་བཀོད་པ་རེད། ལེ་ཅ་ལཱ་ཏུའོ་ཡིས“ལོ་10ལྷག་ཙམ་འཕེལ་རྒྱས་བཏང་བ་བརྒྱུད། ‘རྒྱུད་གཅིག་ལམ་གཅིག’མཉམ་སྐྲུན་དེ་དགའ་བསུ་ཆེན་པོ་ཐོབ་པའི་རྒྱལ་སྤྱིའི་སྤྱི་པའི་ཐོན་རྫས་དང་རྒྱལ་སྤྱིའི་མཉམ་ལས་ལས་སྟེགས་ཤིག་ཏུ་གྱུར་ནས་མཉམ་སྐྲུན་རྒྱལ་ཁབ་ལ་དངོས་དངོས་རྗེན་རྗེན་གྱི་ཕན་པ་ཐོབ་པ་མ་ཟད། ཁུ་པར་ཡང་དེའི་ཁྲོད་ནས་ཕན་པ་ཆེན་པོ་ཐོབ་ཡོད”ཅེས་བརྗོད། ཁོང་གིས“མཱ་ལི་ཨེར་ཡི་དམིགས་བསལ་འཕེལ་རྒྱས་ཁུལ་དུ་གནས་པའི་འོད་ཤུགས་གླིང་དང་ཞེ་ཀེ་ཏེ་ཨ་ཝེ་ལ་ཞིང་ཆེན་དུ་གནས་པའི་སྐྱེ་ལྡན་དངོས་པོའི་གློག་ཁང་གི་འཛུགས་སྐྲུན་ཚང་མར་ཀྲུང་གོའི་ཁེ་ལས་ཞུགས་ཡོད་པ་དང་། ད་ཆ་འཁོར་སྐྱོད་བྱེད་འགོ་ཚུགས་ནས་ཁུ་པར་ནུས་རྒྱུ་བདེ་འཇགས་དང་རྒྱུན་མཐུད་ཆོག་པའི་འཕེལ་རྒྱས་མངོན་འགྱུར་ཡོང་བར་རོགས་རམ་བྱས་ཡོད་ཅེས་བརྗོད།

（བདེ་དབང་གིས་བསྒྱུར། ཉི་དོན་གྱིས་ཞུས）