ཤིན་ཧྭ་གསར་འགྱུར་ཁང་གྲོང་ཁྱེར་ཁོ་ལོན་པོ་ནས་གློག་འཕྲིན་འབྱོར་གསལ། ཉིན་ཤས་གོང“ཞི་མཐུན་འགན་འཁྲི-2024”ཡི་ལས་འགན་སྒྲུབ་མཁན་ཀྲུང་གོའི་མཚོ་དམག་གི“ཞི་བདེའི་གྲུ་ཆེན”རྟགས་ཅན་གྱི་སྨན་ཁང་གྲུ་གཟིངས་ཁོ་ལོན་པོ་གྲུ་ཁ་ནས་དལ་བུར་ཐོན་ཏེ་སི་རི་ལན་ཁར་འཚམས་འདྲི་བདེ་བླག་ངང་མཇུག་འགྲིལ་བ་དང་། དེ་ལས“ཞི་མཐུན་འགན་འཁྲི-2024”ཡི་འཚམས་འདྲིའི་ལས་འགན་དང་སྨན་བཅོས་ཞབས་ཞུའི་ལས་དོན་ཚང་མ་ལེགས་གྲུབ་བྱུང་བ་མཚོན་ཡོད། དུས་ཡུན་ཉིན་7གྱི་སྨན་བཅོས་ཞབས་ཞུའི་རིང“ཞི་བདེའི་གྲུ་ཆེན”རྟགས་ཅན་གྱི་སྨན་ཁང་གྲུ་གཟིངས་ཀྱིས་སི་རི་ལན་ཁར་རིམ་རྩིས་བརྒྱབ་ན་མི་ཐེངས་4700ལྷག་ཙམ་ལ་སྨན་བཅོས་བྱས་པ་དང་། མི་ཐེངས་2247ལ་གཞོགས་འདེགས་བརྟག་དཔྱད་བྱས་པ། གཤགས་བཅོས་ཐེངས་51བྱས་པར་སི་རི་ལན་ཁའི་སྤྱི་ཚོགས་ལས་རིགས་ཁག་གི་བསྔགས་བརྗོད་རྒྱ་ཁྱབ་ཐོབ་ཡོད། སི་རི་ལན་ཁའི་ཙུང་ལི་ཨ་མཱ་ལཱ་སུའུ་ལི་ཡ་ཡིས་གྲུ་གཟིངས་སུ་འཛེགས་ནས་ལྟ་སྐོར་བྱེད་སྐབས་ད་ཐེངས་ཀྱི་འཚམས་འདྲི་ལས་ཕྱོགས་གཉིས་པོའི་དབར་ཕན་ཚུན་ཤེས་རྟོགས་སྔར་བས་ཟབ་ཏུ་ཕྱིན་ཡོད། “ཞི་བདེའི་གྲུ་ཆེན”ཡོང་བར་ཐུགས་རྗེ་ཆེ་ཞུ་གི་ཡིན་ཞེས་བརྗོད་པ་རེད།