ཤིན་ཧྭ་གསར་འགྱུར་ཁང་ལན་ཀྲོའུ་ནས་གློག་འཕྲིན་འབྱོར་གསལ། ཉེ་ཆར། གསར་འགོད་པར་ཀན་སུའུ་ཞིང་ཆེན་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་ཐིང་ནས་་ཤེས་རྟོགས་བྱུང་བར་གཞིགས་ན། འདི་ལོ་ཚུན་དུ། ཀན་སུའུ་ཡིས་ཞིང་ཆེན་རིམ་པའི་ནོར་སྲིད་ཀྱི་ཁ་གསབ་འོས་འཚམ་དང་། མཐོ་སློབ་སློབ་ཐོན་སློབ་མ་དང་མི་སྤྱོད་ཚན་པ་ཕྱོགས་གཉིས་པོས་གདམ་ག་བརྒྱུད་སློབ་གྲྭ་ཐོན་ཡང་ལས་ཞུགས་མ་ཐུབ་པའི་མཐོ་སློབ་དཀྱུས་མའི་སློབ་ཐོན་སློབ་མ་ཁྲི་གཅིག་གཞི་རིམ་དུ་ལས་ཞུགས་བྱེད་པར་ཁྲིད་སྟོན་བྱས་པ་རེད། མིག་སྔར་རྣམ་གྲངས་མི་སྣ་ཚང་མས་མི་སྤྱོད་ཚན་པ་དང་ངལ་རྩོལ་གན་རྒྱ་བཞག་ནས་ལས་གནས་སུ་ཞུགས་ཡོད་པ་རེད།

བསྡོམས་རྩིས་བརྒྱབ་པར་གཞིགས་ན། འདི་ལོར་ལས་ཞུགས་ལ་ཁྲིད་སྟོན་བྱས་པའི་སློབ་ཐོན་སློབ་མ་ཁྲི་གཅིག་ཁྲོད་དུ་དངོས་གཞིའི་ཚན་ཁག་གི་སློབ་རྒྱུས་དང་ཆེད་ཚན་སློབ་གྲྭ་ཆེན་མོའི་སློབ་རྒྱུས་ལྡན་མཁན་གྱིས་48%དང་46%སོ་སོར་བཟུང་བ་དང་། “ཆེད་ཞིབ་ཁྱད་གསར་བཞི”ཡི་ཁེ་ལས་འབྲིང་ཆུང་དང་། གཞུང་ཁོངས་ཁེ་ལས། དམངས་གཉེར་ཁེ་ལས་བཅས་ཀྱི་ནང་ལས་ཞུགས་ཐུབ་མཁན་གྱིས་69%ཡན་ཟིན་ཡོད་པ་རེད། རྫོང་རིམ་པ་དང་དེ་མན་གྱི་ལས་ཁུངས་སྣ་ཚོགས་ཁྲོད། འཕྲོད་བསྟེན་ལས་ཁུངས་དང་སློབ་གསོ་ལས་ཁུངས་སུ་ལས་ཞུགས་བྱས་པའི་མི་གྲངས་བལྟོས་བཅས་ཀྱིས་ཅུང་མང་བ་ཡོད།

རྣམ་གྲངས་ལག་བསྟར་བྱེད་པའི་དུས་འགོར། ཀན་སུའུ་ཡིས་དམངས་སྲིད་དང་། བཟོ་འཕྲིན། ཚན་རྩལ་སོགས་ལས་རིགས་སྡེ་ཚན་ཁག་གི་ལེགས་ཆ་འདོན་སྤེལ་བྱས་ཐོག་ཞིང་ཆེན་ཡོངས་ཀྱི་འཕེལ་རྒྱས་ཀྱི་འཐབ་ཇུས་དང་ཟུང་འབྲེལ་བྱས་ནས་གཞི་རིམ་སྡེ་ཚན་དང་། དམངས་གཉེར་ཁེ་ལས། ཚན་རྩལ་རྣམ་པའི་ཁེ་ལས་འབྲིང་ཆུང་སོགས་སྤུས་ལེགས་ཀྱི་ལས་གནས་སྣ་ཚོགས་མཁོ་སྤྲོད་བྱེད་མང་དུ་བཏང་ཞིང་། འོས་ཐོབ་ཞིབ་བཤེར་བྱུང་བའི་ལས་གནས་14044ཟིན་ཡོད་པ་རེད།

ཤེས་རྟོགས་བྱུང་བར་གཞིགས་ན། མཐོ་སློབ་སློབ་ཐོན་སློབ་མའི་ཁྲོམ་ར་ཅན་གྱི་ལས་ཞུགས་ཧུར་སེམས་ཆེ་རུ་གཏོང་ཆེད། ཀན་སུའུ་ཡིས་གཞོན་ནུའི་ལས་ཞུགས་ཞབས་ཞུའི་འགག་སྒྲོལ་བྱ་སྤྱོད་དང“མི་སྤྱི་ཅུས་ཀྱི་ཅུས་ཀྲང་བརྒྱ་ཡིས་ཐད་གཏོང་བྱས་ནས་ལས་གནས་འོས་སྦྱོར་བྱེད་པའི”བྱེད་སྒོ་དང་ཟུང་འབྲེལ་བྱས་ཏེ། རྣམ་གྲངས་ནང་ཞུགས་མཁན་དང་མི་སྤྱོད་ཚན་པར་དྲ་ཐོག་དང་དྲ་ཕྱི་ཟུང་འབྲེལ་གྱི་སྟབས་བདེའི་ལས་སྟེགས་བསྐྲུན་ཡོད་པ་རེད། རྣམ་གྲངས་མི་སྣ་ལས་གནས་ཐོག་ཏུ་སླེབས་རྗེས། མི་སྤྱོད་ཚན་པར་གཏན་འབེབས་ལྟར་གླ་ཕོགས་སྤྲོད་རྒྱུ་དང་འབྲེལ་སྤྱི་ཚོགས་འགན་བཅོལ་དངུལ་ཡང་འཇལ་རྒྱུའི་སྐུལ་མ་གཏོང་བ་དང་། ཞིང་ཆེན་རིམ་པའི་ནོར་སྲིད་བརྒྱུད་བསྟུད་མར་ལོ་གསུམ་ལ་མི་རེར་ཟླ་རེར་འཚོ་བའི་ཁ་གསབ་ཐོལ་པ་སྒོར་1500རེ་སྤྲོད་ཀྱི་ཡོད་པ་རེད།

ཉེ་བའི་ལོ་ཤས་རིང་། ཀན་སུའུ་ཡིས་ལས་ཞུགས་སྔོན་ཐོབ་འཐབ་ཇུས་ལག་བསྟར་ཤུགས་ཆེན་བྱས་ཤིང་། 2009ལོ་ནས་བཟུང“ལས་ཞུགས་མ་ཐུབ་པའི་མཐོ་སློབ་དཀྱུས་མའི་སློབ་ཐོན་སློབ་མ་ཁྲི་གཅིག་གཞི་རིམ་དུ་ལས་ཞུགས་བྱེད་པར་རྒྱབ་སྐྱོར་བྱ་རྒྱུ”དེ་དམངས་ལ་བྱ་བ་དངོས་སྒྲུབ་པའི་རྣམ་གྲངས་ནང་བཅུག་པ་དང་། མིག་སྔའི་བར་རིམ་རྩིས་བརྒྱབ་ན་སློབ་ཐོན་སློབ་མ་ཁྲི་16ལས་ཞུགས་ཐུབ་པར་བྱས་ཡོད་པ་རེད།

（དམ་ཆོས་མི་ཕམ་གྱིས་བསྒྱུར། བསོད་ནམས་བདེ་སྐྱིད་ཆེ་བས་ཞུས）