ཤིན་ཧྭ་གསར་འགྱུར་ཁང་ནན་ཉིང་ནས་ཟླ་12ཚེས་29ཉིན་གློག་འཕྲིན་འབྱོར་གསལ། ཚེས་29ཉིན། ཀོང་ཤིས་ཆིན་ཀྲོའུ་གྲོང་ཁྱེར་དུ་ཡོད་པའི་ལུང་མོན་ཟམ་ཆེན་བདེ་བླག་ངང་ཤར་གཏོང་ཐུབ་ཅིང་། རླངས་འཁོར་ཤར་གཏོང་ཐུབ་རྗེས་ཧྥང་ཁྲེང་གྲུ་ཁ་དང་ཆིན་ཀྲོའུ་གྲུ་ཁའི་བར་གྱི་འཁོར་གཏོང་ལམ་ཐག་དེ་སྔའི་ཆུ་ཚོད་1.5ནས་ད་ཆའི་སྐར་མ་25ཡས་མས་བར་ཐུང་དུ་ཕྱིན་ཡོད་པ་རེད།

ལུང་མོན་ཟམ་ཆེན་རྣམ་གྲངས་ནི《རྒྱལ་ཁབ་གཞུང་ལམ་དྲ་བའི་འཆར་འགོད（2013ལོ་ནས་2030ལོ་བར）》ཀྱི་རྒྱལ་ལམ་G228ཀྱི་ཏན་ཏུང་ནས་ཏུང་ཤིན་བར་གྱི་ཀོང་ཤིས་པིན་ཧའེ་གཞུང་ལམ་གཙོ་བོའི་གྲུབ་ཆ་གལ་ཆེན་ཞིག་ཡིན། རྣམ་གྲངས་དེ་ཆིན་ཀྲོའུ་གྲོང་ཁྱེར་ཆིན་ནན་ཆུས་ལུང་མོན་གྲུ་ཁའི་གྲོང་རྡལ་ནས་འགོ་ཚུགས་ཤིང་། ལམ་བར་ཏུ་མའོ་ཝེ་མཚོ་དང་ཕིན་ལུའུ་མིས་བཟོས་གཙང་པོའི་མཚོ་སྒོ་བརྒལ་ཏེ་ཆིན་ཀྲོའུ་གྲུ་ཁ་ཁུལ་བར་ཡིན་པ་རེད། རྣམ་གྲངས་དེའི་ལམ་ཐིག་ཧྲིལ་པོར་སྤྱི་ལེ་7.637ཡོད།

ངོ་སྤྲོད་བྱས་པར་གཞིགས་ན། ཆིན་ཀྲོའུ་གྲོང་ཁྱེར་དང་། པེ་ཧའེ་གྲོང་ཁྱེར། ཧྥང་ཁྲེང་གྲུ་ཁའི་གྲོང་ཁྱེར་བཅས་གཞི་གཅིག་ཅན་གྱི་རྨང་གཞིའི་སྒྲིག་བཀོད་གལ་ཆེན་གྱི་འདེགས་སྐྱོར་རྣམ་གྲངས་ཤིག་ཡིན་པའི་ཆ་ནས། ལུང་མོན་ཟམ་ཆེན་ཤར་གཏོང་ཐུབ་རྗེས་ཀོང་ཤིས་པིན་ཧའེ་གཞུང་ལམ་གྱི“འགག་ས”བཤངས་ནས་ཧྥང་ཁྲེང་གྲུ་ཁ་དང་ཆིན་ཀྲོའུ་གྲུ་ཁའི་བར་གྱི་འཁོར་གཏོང་དུས་ཡུན་ཐུང་དུ་འགྲོ་རྒྱུ་ཡིན་པ་མ་ཟད། ད་དུང་ཆིན་ཀྲོའུ་གྲོང་ཁྱེར་དང་། པེ་ཧའེ་གྲོང་ཁྱེར། ཧྥང་ཁྲེང་གྲུ་ཁའི་གྲོང་ཁྱེར་བཅས་གཞི་གཅིག་ཅན་དང་བྱང་རྒྱུད་མཚོ་ཁུག་དཔལ་འབྱོར་ཁུལ་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་ཐེབས་ནས། ནུབ་རྒྱུད་ཀྱི་སྐམ་མཚོའི་བགྲོད་ལམ་གསར་པ་འཛུགས་སྐྲུན་ལ་རམ་འདེགས་བྱེད་པའི་ཐད་དོན་སྙིང་གལ་ཆེན་ལྡན་ཡོད།

（དམ་ཆོས་དང་བསོད་བདེ་ཆེ་བས་སྒྱུར་ཞུས་བྱས）