ཀྲུང་གོ་ཨར་ལས་བཟོ་སྐྲུན་ཚོགས་པ་པོ་ཚི་ཝ་ན་ཚད་ཡོད་ཀུང་སིས་སྐྲུན་འགན་འཁུར་བའི་པོ་ཚི་ཝ་ནའི་པོ་ཐའེ་ཏིའི་ཆུ་མཁོ་འདོན་རྣམ་གྲངས་ནས་འདི་ལོའི་ཟླ་9པར་དངོས་སུ་བཏང་ཡོད། ས་གནས་དེ་གའི་ཡུལ་མིར་ཀ་ལའི་ཆུ་གཙང་མ་འཐུང་རྒྱུ་བྱུང་ནས། ས་གནས་དེ་གའི་གྲོང་ཚོ་8ཀྱིས་ཡུན་རིང་ཚྭ་ཆུ་བཏུངས་པའི་ལོ་རྒྱུས་མཇུག་འགྲིལ་བ་དང་ཡུལ་མི་ཁྲི་3ཙམ་ལ་ཕན་པ་ཐོབ་ཡོད།

པོ་ཐའེ་ཏི་པོ་ཚི་ཝ་ནའི་དབུས་རྒྱུད་དུ་གནས་པ་དང་། བྱང་རྒྱུད་ཀྱི་མ་ཁ་ཏི་ཁ་ཏི་ཚྭ་འདམ་དང་བར་ཐག་སྤྱི་ལེ་100ལྷག་ཙམ་ཡོད་པ་དང་། ཤར་རྒྱུད་ཨའོ་ལ་ཕ་རྡོ་རྗེ་ཕ་ལམ་གཏེར་ཁུལ་དང་ཐག་ཉེ་པོ་ཡོད། ཡུལ་འདིར་ཚྭ་མེད་ཆུའི་ཐོན་ཁུངས་ཧ་ཅང་དཀོན་པོ་ཡོད། པོ་ཚི་ཝ་ནའི་ཆུ་མཁོ་འདོན་ཀུང་སིའི་ལས་དོན་པས་ངོ་སྤྲོད་བྱས་པར་གཞིགས་ན། ས་གནས་དེ་གའི་ས་འོག་ཆུར་ཚྭ་ལྡན་ཚད་ཚད་ལས་བརྒལ་བ་མ་ཟད་དྲི་ངན་ཡང་ཆེ་ཙམ་ཡོད། ས་ཁུལ་དེའི་ས་རྒྱ་ཆེ་བ་དང་། ཡུལ་མིའི་སྡོད་གནས་ཁ་ཐོར་ཡིན་པ། རྣམ་གྲངས་ལ་མ་དངུལ་གཏོང་འབོར་ཆེ་བ་བཅས་ཀྱི་དབང་གིས་ཉེ་བའི་ལོ་ཤས་ནང་མ་གཏོགས་ཆུ་མཁོ་འདོན་རྣམ་གྲངས་དེ་ཉིན་རེའི་གྲོས་རིམ་ནང་བཅུག་ཐུབ་མེད།

གསར་འགོད་པ་ས་ཁུལ་དེའི་མོ་ཁོ་པ་ཏ་ནེ་གྲོང་ཚོའི་ཡུལ་མི་ཐེ་པ་ལོའི་ཁྱིམ་དུ་སྐྱོད་སྐབས། གསར་དུ་བཙུགས་པའི་ཆུ་ཀ་ལ་དེ་སྒོ་རའི་ཟུར་ཞིག་ཏུ་ཁྲིད་ཅིང་། ཆུ་ཀ་ལ་གློད་མ་ཐག་དྭངས་གཙང་གི་ཆུ་རྒྱུན་མི་ཆད་པར་དོན་ཡོང་བ་མཐོང་བྱུང་། ཁོང་གིས་གདོང་བཀྲུས་རྗེས་ཐད་ཀར་ཧུབ་གང་བཏུངས་ཏེ “སྔོན་མ་ཆུ་ཚྭ་ཁུ་རེད། ཡིན་ནའང་ད་ལྟ་མངར་མོ་རེད་འདུག”ཅེས་ཁོང་གིས་དགའ་ཚོར་ཆེན་པོས་བཤད།

པོ་ཐའེ་ཏིའི་ཆུ་མཁོ་འདོན་རྣམ་གྲངས་དེ་2023ལོའི་ཟླ་གཉིས་པར་ལས་འགོ་ཚུགས་པ་དང་། ལས་ཡུན་ཟླ་བ་18ཡིན་པ། ཆུ་མཁོ་འདོན་གྱི་གཙོ་རྐང་ལས་གྲྭ་དང་ལེ་ལག་སྒྲིག་བཀོད་འཛུགས་སྐྲུན་དང་འབྲེལ་བའི་ནང་སྤྱི་ལེ་184ཡོད་པའི་ཆུ་མཁོ་འདོན་མདོང་ལམ་འཛུགས་སྐྲུན་དང་། གནོན་འཐེན་ས་ཚིགས་4འཛུགས་སྐྲུན། གོང་ཚད་མཐོ་བའི་ཆུ་གཞོང་10གསར་སྐྲུན། ཨར་འདམ་གྱི་ཆུ་གསོག་རྫིང་བུ་3འཛུགས་སྐྲུན། དེ་བཞིན་ཆུ་གཙང་སིང་བཟོ་གྲྭ་ཇུས་འགོད་དང་འཛུགས་སྐྲུན་བཅས་བྱ་རྒྱུ་ཚུད་ཡོད། གཞན་ཡང་ད་དུང་སྲིད་འཛིན་གཞུང་ལས་ཐོག་ཁང་གཉིས་དང་། ལས་མིའི་ལས་ཤག་10 དེ་བཞིན་གློག་ཤུགས་དང་། འཕྲུལ་ཆས། རྒྱང་ཚོར་སོགས་ལེ་ལག་ཚང་བའི་ལས་གྲྭ་ཡང་ཚུད་ཡོད།

རྣམ་གྲངས་ལག་བསྟར་ཅིང་ལི་དབྱང་ཝུའེ་མིང་གིས་ངོ་སྤྲོད་བྱས་པར་གཞིགས་ན། མིག་སྔར་རྣམ་གྲངས་དེའི་ཉིན་རེའི་ཆུ་གཙང་གསིང་བྱེད་ནུས་སྨི་རྒྱ་དཔངས་གྲུ་བཞི་4000ཟིན་ནས་མི་ཁྲི་3ལྷག་ཙམ་གྱི་ཆུའི་དགོས་མཁོ་སྐོང་ཐུབ་ཀྱི་ཡོད། དངོས་སུ་བེད་སྤྱོད་གཏོང་འགོ་ཚུགས་པ་ནས་བཟུང་རིམ་རྩིས་བྱས་ན་ས་ཁུལ་དེར་སྨི་རྒྱ་དཔངས་གྲུ་བཞི་ཁྲི་14ཟིན་པའི་ཆུ་གཙང་མ་མཁོ་འདོན་བྱས་ཡོད།

⇐ འདི་ནི་ལས་དོན་མི་སྣས་པོ་ཚི་ཝ་ནའི་པོ་ཐའེ་ཏིའི་ཆུ་མཁོ་འདོན་རྣམ་གྲངས་ཀྱི་ཆུ་གཙང་གསིང་བཟོ་གྲྭའི་ནང་སྒྲིག་ཆས་ལ་ཞིབ་བཤེར་བྱེད་བཞིན་པ།

⇒ འདི་ནི་པོ་ཚི་ཝ་ནའི་པོ་ཐའེ་ཏི་ས་ཁུལ་གྱི་མོ་ཁོ་པ་ཏ་ནེ་གྲོང་ཚོར་ཡུལ་མི་ཞིག་གིས་རང་ཁྱིམ་གྱི་སྒོ་རའི་ནང་པོ་ཚི་ཝ་ནའི་པོ་ཐའེ་ཏིའི་ཆུ་མཁོ་འདོན་རྣམ་གྲངས་ཀྱི་ཆུ་ཀ་ལ་སྤྱོད་བཞིན་པ།