ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ། ཉེ་ཆར། གསར་འགོད་པར་རྒྱལ་ཡོངས་ཁྲོམ་ར་ལྟ་འདོམས་ལས་དོན་ཚོགས་འདུའི་ཐོག་ནས་ཤེས་རྟོགས་བྱུང་བར། ཁྲོམ་ར་ལྟ་འདོམས་སྤྱི་ཁྱབ་ཅུས་ཀྱིས་སང་ལོར་འཛད་སྤྱོད་ཁོར་ཡུག་ལེགས་སུ་གཏོང་བའི་ལོ་གསུམ་བྱ་སྤྱོད་ལག་ལེན་གཏིང་ཟབ་བསྟར་ནས་ཐེར་འདོན་གོང་ཞུ་ཐག་གཅོད་ཀྱི་མ་ལག་ཕྱོགས་ཡོངས་ནས་རིམ་སྤོར་བྱས་ཏེ་འཛད་སྤྱོད་ཁྱབ་ཁོངས་ཀྱི་དཀའ་གནད་ཏན་ཏིག་སེལ་རྒྱུ་ཡིན་པ་རེད།

ཁྲོམ་ར་ལྟ་འདོམས་སྤྱི་ཁྱབ་ཅུས་ཀྱི་ཅུས་ཀྲང་ལུའོ་ཝུན་གྱིས། སང་ལོར་འཛད་སྤྱོད་ཐད་གཅིག་སྡུད་ཆེ་བའི་ཁེ་ལས་དང་། ལས་རིགས། ས་ཁོངས་བཅས་ལ་དམིགས་ནས་བློས་འཁེལ་བའི་ཚོང་ཁང་དང་། བློས་འཁེལ་བའི་ཁྲོམ་ར། བློས་འཁེལ་བའི་དྲ་ཐོག་ཚོང་ཁང་། བློས་འཁེལ་བའི་བཟའ་བཏུང་། བློས་འཁེལ་བའི་མཛེས་ལྗོངས་ཁུལ་བཅས་འབོར་ཆེན་ཞིག་སྐྱེད་སྲིང་བྱ་རྒྱུ་ཡིན། ཡུལ་གཞན་དང་ཚོང་ཁང་གཞན་ནས་ཉོས་པའི་ཚོང་ཟོག་རྒྱུ་མཚན་མེད་པར་སློག་ཐབས་འཚོལ་ཞིབ་བྱ་རྒྱུ་དང་དྲ་ཕྱིའི་ཚོང་ཁང་ལ་རྒྱུ་མཚན་མེད་པར་ཚོང་ཟོག་སློག་པའི་ཁྱབ་རྒྱ་དང་སློག་ཚད་མཐོ་རུ་གཏོང་རྒྱུ་ཡིན་ཞེས་བཤད།

ཐེར་འདོན་གོང་ཞུ་ཐག་གཅོད་ཀྱི་མ་ལག་ཕྱོགས་ཡོངས་ནས་རིམ་སྤོར་བྱ་རྒྱུའི་ཐད་སང་ལོར་རྒྱལ་ཡོངས་ཀྱི་12315ལས་སྟེགས་ཕྱོགས་ཡོངས་ནས་རིམ་སྤོར་བྱས་ཏེ་འཛད་སྤྱོད་ཀྱི་ཐེར་འདོན་སྤྱི་བསྒྲགས་དེ་དྲ་ཐོག་ནས་དྲ་ཕྱིར་སྣུར་སྲིང་བྱེད་པར་སྐུལ་འདེད་བཏང་སྟེ་འཛད་སྤྱོད་རྩོད་གཞི་ཐོན་ཚད་འབྱུང་རྩ་ནས་ཉུང་དུ་འགྲོ་བར་སྐུལ་འདེད་གཏོང་རྒྱུ་རེད། དྲ་ཐོག་གི་འཛད་སྤྱོད་རྩོད་གཞིའི་ཐག་གཅོད་ལམ་སྲོལ་གྱི་སྔོན་ལ་འདུམ་འགྲིག་བྱེད་ཚད་མཐོ་རུ་བཏང་ནས་ལས་སྟེགས་ཁེ་ལས་ཀྱི་བཙོངས་རྗེས་ཐབས་ལམ་དང་འབྲེལ་བ་བྱེད་པའི་ཐད་འཚོལ་ཞིབ་བྱ་རྒྱུ་རེད།

སང་ལོར་ཁྲོམ་ར་ལྟ་འདོམས་སྡེ་ཚན་གྱིས་ད་དུང“འཛད་སྤྱོད་ལ་སྲུང་སྐྱོང”བྱེད་པའི་ཁྲིམས་སྒྱུར་གྱི་བྱ་སྤྱོད་སྤེལ་ནས་བཙོངས་རྗེས་རང་འགན་གཞན་དཀྲི་དང་། ཁས་ལེན་རྫུན་མ་བྱེད་པ། བཙན་བདག་དོན་ཚན་སོགས་ཀྱི་གནད་དོན་གཙོ་གནད་ཐོག་ཞིབ་བཤེར་ཐག་གཅོད་བྱེད་པ་དང་། སྔོན་སྤྲོད་རྣམ་པའི་འཛད་སྤྱོད་ཁྱབ་ཁོངས་སུ་ཆེད་མངགས་སྲིད་འཛིན་ཁྲིམས་སྲོལ་བཟོ་རྒྱུར་སྐུལ་འདེད་གཏོང་བ། གཅིག་གྱུར་འཛད་རྫས་ཀྱི“འགན་ལེན་གསུམ”ལམ་ལུགས་ཕྱོགས་ཡོངས་ནས་བསྡུ་སྒྲིལ་བྱས་ནས་བཟོ་བ། འཛད་སྤྱོད་ཁྱབ་ཁོངས་ཀྱི་དཔེ་སྟོན་གན་རྒྱ་བཟོ་བ་དང་། སྤུས་ཚད་ལྟ་ཞིབ་ཚད་ལེན་བྱེད་པ། ཚད་ལྡན་ལམ་ལུགས་བཟོ་བཅོས་དང་ཁས་ལེན་དཔང་འདོན་ལམ་ལུགས་འཛུགས་སྐྱོང་བཅས་ལ་ཞབས་འདེགས་ཞུ་བར་ཤུགས་སྣོན་རྒྱག་རྒྱུ་རེད།

（བསྟན་འཛིན་བཟང་མོས་བསྒྱུར། ཚེ་སྒྲོལ་དང་བསྟན་བཟང་གིས་ཞུས）