ཉེ་ཆར། ཀྲུང་གོ་མི་དམངས་ཕྱི་ཕྱོགས་མཛའ་གྲོགས་མཐུན་ཚོགས་དང་། ཨོ་སི་ཁྲུ་ལི་ཡ་དང་ཀྲུང་གོའི་མཛའ་གྲོགས་སྤེལ་རེས་མཐུན་ཚོགས། ཀོང་ཏུང་ཞིང་ཆེན་མི་དམངས་སྲིད་གཞུང་། འཛམ་གླིང་གཙོ་འཛིན་མནའ་འབྲེལ་བཅས་ཀྱིས་མཉམ་དུ་གཙོ་གཉེར་བྱས་པའི“2024ལོའི་ཚུང་ཏུའུ་རྒྱལ་སྤྱིའི་གླེང་སྟེགས” སི་ཕེན་གྱི་རྒྱལ་ས་མ་ཏེ་རིར་འཚོགས་ཤིང་། སྐབས་འདིའི་གླེང་སྟེགས་ཀྱིས་ཕྱི་རྒྱལ་གྱི་དེ་སྔའི་སྲིད་ཕྱོགས་མི་སྣ་གལ་ཆེན་དང་། རྒྱལ་སྤྱིའི་རྩ་འཛུགས་ཀྱི་དེ་སྔའི་འགན་འཁུར་བ་40 ལྷག་ཙམ་དང་། རྒྱལ་ཁབ་ཕྱི་ནང་གི་རིགས་གཅིག་མཁས་ཅན་དང་མཁས་དབང་དང་། དེ་བཞིན་བཟོ་ཚོང་ལས་རིགས་ཀྱི་མི་སྣ་90ལྷག་ཙམ་གྱི་ཡིད་དབང་བཀུག་ཡོད། ཚོགས་ཞུགས་སྐུ་མགྲོན་གྱིས“གོ་ལ་ཧྲིལ་པོའི་འཐབ་ཇུས་བརྟན་པོ”དང་། “འཕེལ་རྒྱས་ཀྱི་མ་དངུལ་གྲབས་གསོག—ཕྱོགས་ཡོངས་ནས་རྒྱུན་མཐུད་ཆོག་པའི་འཕེལ་རྒྱས་དམིགས་ཚད་དོན་འཁྱོལ” “གོ་ལ་ཧྲིལ་པོའི་མཉམ་ལས་ལ་སྐུལ་འདེད་བཏང་སྟེ། མིའི་རིགས་ཀྱི་ལས་དབང་གཅིག་མཐུན་ཚོགས་པ་གཏོད་པ”“གོ་ལ་ཧྲིལ་པོའི་བདེ་འཇགས་ལ་འཕྲད་པའི་སྲོལ་རྒྱུན་དང་སྲོལ་རྒྱུན་མིན་པའི་འགྲན་སློང”“འཛམ་གླིང་གི་དཔལ་འབྱོར་ལ་འཕྲད་པའི་འགྲན་སློང་ལ་ཁ་གཏད་གཅོག་པ”སོགས་ཀྱི་གྲོས་གཞིར་གྲོས་བསྡུར་གཏིང་ཟབ་བྱས་ནས་ཕན་ཡོད་ཀྱི་གྲོས་འགོ་བཏོན་པས་ཐུན་མོང་གི་ངོས་འཛིན་གཅིག་མཐུན་རྒྱ་ཁྱབ་ཡོང་བ་བྱས་ནས་དེ་བས་མཛེས་སྡུག་ལྡན་པའི་འབྱུང་འགྱུར་གཏོད་ཆེད་སྟོབས་ཤུགས་གཅིག་ཏུ་བསྒྲིལ་ཡོད།
ཀྲུང་གོ་ནས་སི་ཕེན་བར་དང་། ཀོང་ཀྲོའུ་ནས་མ་ཏེ་རི་བར། 2014ལོར་ཚུང་ཏུའུ་རྒྱལ་སྤྱིའི་གླེང་སྟེགས་བཏོད་པ་ནས་ད་བར་ཀྲུང་གོའི་ཀོང་ཏུང་དུ་སྐབས་བརྒྱད་གཉེར་ཞིང་། 2024ལོ་ནི་གླེང་སྟེགས་དེ་ཕྱི་རྒྱལ་དུ་གཉེར་ཐེངས་ཐོག་མ་དེ་ཡིན་པ་དང་། སྐབས་འདིའི་གླེང་སྟེགས་ཀྱི་བརྗོད་དོན་གཙོ་བོ་ནི། “ཐུན་མོང་ཐོག་བྱ་སྤྱོད་སྤེལ། ཐུན་མོང་ཐོག་འབྱུང་འགྱུར་གཏོད”ཅེས་པ་དེ་ཡིན། གྲོས་བསྡུར་ཆེན་པོ་དང་མཉམ་གཤིབ་གླེང་སྟེགས་སོགས་ཀྱི་བྱེད་སྒོ་གལ་ཆེན་ཐེངས་10ལྷག་ཙམ་གཉེར་ཞིང་། ཚོགས་ཞུགས་སྐུ་མགྲོན་ཚོས་རྒྱལ་སྤྱིའི་སྤྱི་ཚོགས་ཀྱིས་སྤེལ་རེས་རྒྱ་ཁྱབ་དང་ངོས་འཛིན་གཅིག་མཐུན་ཡོང་བ་བྱས་ནས་མཉམ་དུ་བྱ་སྤྱོད་སྤེལ་ཏེ་གོ་ལ་ཧྲིལ་པོའི་འགྲན་སློང་ལ་ཁ་གཏད་གཅོག་རྒྱུ་ནི་ཁ་ཚ་དགོས་གཏུགས་ཡིན་པའི་ངོས་འཛིན་བྱས་ཡོད།
ཁོ་སི་ཐ་རི་ཁའི་ཙུང་ཐུང་ཟུར་པ་ཁཱ་ལོ་སི·ཨར་ཝ་ལཱ་ཏུའོ་ཡིས། འདི་ལོའི་ཚུང་ཏུའུ་རྒྱལ་སྤྱིའི་གླེང་སྟེགས་ཀྱི་གྲོས་གཞི་དེ་མིག་སྔའི་འཛམ་གླིང་གི་དགོས་མཁོ་དང་ཧ་ཅང་མཐུན་ཡོད། མི་ཐབས་རིག་ནུས་དང་། གནམ་གཤིས་འགྱུར་ལྡོག་ལ་ཁ་གཏད་གཅོག་པ། དེ་བཞིན་འཛམ་གླིང་ཞི་བདེ་ཡོང་བ་སོགས་ཀྱི་གྲོས་གཞི་གལ་ཆེན་ཐད་རྒྱལ་ཁབ་ཁག་གིས་སྔར་བས་ལག་གདང་སྦྲེལ་ནས་མཉམ་ལས་བྱེད་དགོས་ཞེས་བརྗོད།
སི་ཕེན་གྱི་ཕྱི་འབྲེལ་རྒྱལ་དོན་དྲུང་ཡིག་ཏིའེ་ཀོ·མ་ཏིང་ནེ་སི·པེ་ལི་ཨོ་ཡིས། ཚུང་ཏུའུ་རྒྱལ་སྤྱིའི་གླེང་སྟེགས་གཉེར་བ་ནས་བཟུང་། དེ་ནི་སྔ་བར་ཕྱི་གསུམ་དུ་རྒྱལ་ཁབ་ཁག་གིས་བསྟུན་མཁས་ངང་གྲོས་མོལ་དང་། གོ་ལ་ཧྲིལ་པོའི་འགྲན་སློང་ལ་ཁ་གཏད་གཅོག་རྒྱུར་སྐུལ་འདེད་གཏོང་བའི་ལས་སྟེགས་གལ་ཆེན་ཞིག་རེད། ཡོ་རོབ་མནའ་འབྲེལ་དང་ཀྲུང་གོ་ཕན་ཚུན་ཚོང་དོན་རོགས་ཟླ་གལ་ཆེན་ཡིན་པས། 2024ལོ་ནས་བཟུང་ཕྱོགས་གཉིས་པོའི་ཉིན་རེའི་ཆ་སྙོམས་ཚོང་དོན་དངུལ་འབོར་ཡོ་སྒོར་དུང་ཕྱུར་20ལྷག་ཙམ་ཟིན་ཡོད། ཡོ་རོབ་དང་ཀྲུང་གོའི་དབར་གྱི་མཉམ་ལས་ཟབ་ཏུ་སོང་བ་དེས་འཛམ་གླིང་གི་དཔལ་འབྱོར་བརྟན་པོའི་ངང་འཕེལ་རྒྱས་འགྲོ་བར་ཤིན་ཏུ་གལ་འགངས་ཆེ་བའི་ནུས་པ་བཏོན་ཡོད་ཅེས་བརྗོད།
(འདི་ག་ཚགས་པར་ཁང་དུ་གྲོང་ཁྱེར་མ་ཏེ་རི་ནས་འབྱོར་བའི་གློག་འཕྲིན)
(པ་སངས་ཚེ་རིང་གིས་བསྒྱུར། ཚེ་དབང་ལྷ་མོ་དང་པ་ཚེས་ཞུས)