འདི་ག་ཚགས་པར་ཁང་དུ་པེ་ཅིང་ནས་ཟླ་12ཚེས་26ཉིན་གློག་འཕྲིན་འབྱོར་གསལ། ཚེས་25ཉིན་རྒྱལ་ཁབ་བསྡོམས་རྩིས་ཅུས་ཀྱིས་ཁྱབ་བསྒྲགས་བྱས་པའི་གྲངས་གཞི་ལས་མངོན་པར། 2024ལོར་རྒྱལ་ཡོངས་སུ་སྲིང་བལ་མུའུ་ཁྲི་4257.4བཏབ་པ་དེ་ལོ་གོང་མ་ལས་མུའུ་ཁྲི་75.2མང་དུ་ཕྱིན་ནས་1.8%འཕར་བ་དང་། མུའུ་རེའི་ཐོན་འབབ་སྤྱི་རྒྱ་144.8ཟིན་པ་དེ་ལོ་གོང་མ་ལས་མུའུ་རེར་ཐོན་འབབ་སྤྱི་རྒྱ་10.4མང་དུ་ཕྱིན་ནས་7.8%འཕར་བ། ཐོན་འབབ་ཏུན་ཁྲི་616.4ཟིན་པ་དེ་ལོ་གོང་མ་ལས་ཏུན་ཁྲི་54.6མང་དུ་ཕྱིན་ནས་9.7%འཕར་ཡོད་པ་རེད།

རྒྱལ་ཡོངས་ཀྱི་སྲིང་བལ་འདེབས་ཁྱོན་ཆེ་རུ་སོང་ཞིང་། ས་ཁུལ་དུ་ཕྱེ་ནས་བལྟས་ན། ཤིན་ཅང་གི་སྲིང་བལ་འདེབས་ཁྱོན་མུའུ་ཁྲི་3671.9ཟིན་པ་དེ་ལོ་གོང་མ་ལས་མུའུ་ཁྲི་117.9མང་དུ་ཕྱིན་ནས་3.3%འཕར་ཡོད། འདི་ལོ་ཤིན་ཅང་གི་སྲིང་བལ་གྱི་དམིགས་ཚད་རིན་གོང་ཆུ་ཚད་ཅུང་མཐོ་པོ་རྒྱུན་འཁྱོངས་ཐུབ་པ་དང་། སྲིང་བལ་འདེབས་འཛུགས་ཀྱི་སྔོན་དཔག་ཡོང་འབབ་བརྟན་པ། སྲིང་བལ་འདེབས་མཁན་ཞིང་པའི་ཧུར་སེམས་ཅུང་ཆེ་བ། རྒྱ་ཁྱོན་ཅུང་མང་དུ་ཕྱིན་ཡོད། སྲིང་བལ་ཐོན་ཁུལ་གཞན་དག་ལ་ཕན་འབྲས་ཅུང་ཞན་པ་དང་འདེབས་འཛུགས་གྲུབ་ཆ་ལེགས་སྒྲིག་བྱེད་པ་སོགས་ཀྱི་རྒྱུ་རྐྱེན་གྱི་ཤུགས་རྐྱེན་ཐེབས་པས། སྲིང་བལ་གྱི་རྒྱ་ཁྱོན་སྤྱིའི་ཆ་ནས་ཅུང་ཉུང་དུ་ཕྱིན་ཡོད། དེའི་ནང་འབྲི་ཆུ་འབབ་རྒྱུད་ཀྱི་སྲིང་བལ་ཐོན་ཁུལ་གྱི་འདེབས་ཁྱོན་མུའུ་ཁྲི་302.1ཟིན་པ་དེ་ལོ་གོང་མ་ལས་མུའུ་ཁྲི་4.9ཉུང་དུ་ཕྱིན་ནས་1.6%ཆག་པ་དང་། རྨ་ཆུ་འབབ་རྒྱུད་ཀྱི་སྲིང་བལ་ཐོན་ཁུལ་གྱི་འདེབས་ཁྱོན་མུའུ་ཁྲི་246.3ཟིན་པ་དེ་ལོ་གོང་མ་ལས་མུའུ་ཁྲི་38.7ཉུང་དུ་ཕྱིན་ནས་13.6%ཆག་ཡོད་པ་རེད།

རྒྱལ་ཡོངས་ཀྱི་སྲིང་བལ་གྱི་མུའུ་རེའི་ཐོན་འབབ་མང་དུ་ཕྱིན་ཞིང་། ས་ཁུལ་དུ་ཕྱེ་ནས་བལྟས་ན། ཤིན་ཅང་དུ་སྲིང་བལ་འདེབས་འཛུགས་བྱས་པ་ནས་བཟུང་། འོད་དང་། དྲོད་ཚད། ཆུ་བཅས་འདང་ངེས་ཡོད་པས་གནམ་གཤིས་ཀྱི་སྤྱིའི་ཆ་རྐྱེན་སྲིང་བལ་སྐྱེ་འཚར་ལ་ཕན་པ་ཡོད་པས་སྐྱེ་འཚར་ལོ་གོང་མ་ལས་མངོན་གསལ་དོད་པོས་ལེགས་པ་དང་། ལྷག་པར་དུ་སྲིང་བལ་འཐུ་བའི་དུས་སུ་ཤིན་ཅང་དུ་གནམ་གཤིས་ཡག་པོ་ཡོད་པས་སྲིང་བལ་གྱི་ཐོན་འབབ་དང་སྤུས་ཚད་མཐོ་རུ་འགྲོ་རྒྱུར་ཕན་པ་ཡོད་པ་རེད། 2024ལོར་ཤིན་ཅང་གི་སྲིང་བལ་གྱི་ཐོན་འབབ་མུའུ་རེར་སྤྱི་རྒྱ་154.9ཟིན་པ་དེ་ལོ་གོང་མ་ལས་མུའུ་རེར་སྤྱི་རྒྱ་11.0མང་དུ་ཕྱིན་ནས་7.6%འཕར་ཡོད་པ་རེད།

སོན་འདེབས་རྒྱ་ཁྱོན་འཕར་བ་དང་མུའུ་རེའི་ཐོན་འབབ་མཐོ་རུ་གཏོང་བའི་ཐུན་མོང་གི་སྐུལ་ཁྲིད་འོག རྒྱལ་ཡོངས་ཀྱི་སྲིང་བལ་ཐོན་འབབ་འཕར་ཡོད། 2024ལོར་རྒྱལ་ཡོངས་ཀྱི་སྲིང་བལ་ཐོན་འབབ་ཏུན་ཁྲི་616.4ཟིན་པ་དེའི་ནང་ཤིན་ཅང་གི་སྲིང་བལ་ཐོན་འབབ་ཏུན་ཁྲི་568.6ཟིན་པ་དེ་ལོ་གོང་མ་ལས་ཏུན་ཁྲི་57.4མང་དུ་ཕྱིན་ནས་11.2%འཕར་བ། འབྲི་ཆུ་འབབ་རྒྱུད་ཀྱི་སྲིང་བལ་ཐོན་འབབ་ཏུན་ཁྲི་22.1ཟིན་པ་དེ་ལོ་གོང་མ་ལས་ཏུན་ཁྲི་0.2མང་དུ་ཕྱིན་ནས་0.8%འཕར་བ། རྨ་ཆུ་འབབ་རྒྱུད་ཀྱི་སྲིང་བལ་ཐོན་འབབ་ཏུན་ཁྲི་20.6ཟིན་པ་དེ་ལོ་གོང་མ་ལས་ཏུན་ཁྲི་3.3ཉུང་དུ་ཕྱིན་ནས་13.7%ཆག་ཡོད་པ་རེད།