ཤིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ། མཚོ་བོད་ས་མཐོར་ལུང་ཤུར་གྲོག་རོང་ཁྲི་སྟོང་མུ་འབྲེལ་ནས་ཡོད། ལོ་70ཡི་གོང“མཁའ་ལམ”གཉིས་རི་མཐོ་གཡང་གཟར་བརྒལ་ནས་ཡི་གེ“V”ཡི་བཟོ་ལྟ་ཞིག་ཆགས་ཏེ་ལྷ་སར་མཐུད་པ་དང་སྦྲགས། མིའི་རིགས་ཀྱི་ལམ་བཟོའི་ལོ་རྒྱུས་ཐོག་གི་བློ་སྟོབས་རབ་ཏུ་འཕེལ་བའི་ངོ་མཚར་ཞིག་བཏོད་ཡོད།

“ལམ་གཉིས”རྒྱུད་ཀྱི་ལས་བྱེད་པ་དང་མང་ཚོགས་ཀྱིས་མངགས་བཅོལ་ཟབ་མོ་བློ་ལ་བརྟན་པོར་བཅངས་ནས་འབད་འཐབ་ཡར་བརྩོན་དང་འབད་འབུངས་མདུན་སྐྱོད་བྱས་ཤིང་། རྒྱུན་ཆད་མེད་པར་ལེགས་སུ་འགྲོ་བའི་དམངས་འཚོ་དང་། སྤུས་ཚད་མཐོ་བའི་འཕེལ་རྒྱས་ཀྱི་འཕེལ་རིམ་ཁྲོད་མི་རིགས་ཁག་འགྲོ་འོང་དང་། སྤེལ་རེས། མཉམ་འདྲེས་བཅས་སྔར་བས་དམ་ཟབ་བྱེད་རིང་། “ལམ་གཉིས”ཀྱི་སྙིང་སྟོབས་དུས་ཡུན་རིང་པོ་སོང་ཡང་སྔར་བཞིན་གསོན་ཤུགས་འཕེལ་བཞིན་མཆིས།

ངལ་བ་ཁྱད་བསད། དཀའ་ངལ་ལ་མི་སྐྲག་པར་མུ་མཐུད་མདུན་དུ་སྐྱོད་པ།

དབུས་ལམ་རི་བོ་དང་། རྒྱུ་ལ། ཁྲོ་ལ། སེར་སྐྱེམས་ལ་སོགས་ས་བབ་མཐོ་ཚད་སྨི་3000ཡན་ཟིན་པའི་རི་བོ་14བརྒལ་བ་དང་། རྒྱལ་མོ་རྔུལ་ཆུ་དང་། འབྲི་ཆུ། རྫ་ཆུ་སོགས་དྲག་ཏུ་རྒྱུག་པའི་ཆུ་བོ་བཅུ་ལྷག་ཙམ་བསྒྲལ་རྗེས་རིང་ཚད་སྤྱི་ལེ་2412ཟིན་པའི་ཁྲོན་བོད་གཞུང་ལམ་གྱི་བྱང་ལམ་དེ་ནི་ས་བབ་མཐོ་ཚད་སྨི་300ནས་སྨི་5130བར་དུ་མཐོ་རེས་དམའ་རེས་དང་གྱེན་ཐུར་རེས་མོས་སུ་འཁོར།

མུ་དང་མུ་འབྲེལ་བའི་ཁུ་ནུ་རི་བོ་དང་གདང་ལ་འཕྲེད་དུ་བཅད་ནས་མུ་མཐའ་མི་མངོན་པའི་མྱ་ངམ་ཐང་དང་བྱང་རྩྭ་ཐང་བརྒལ་ཏེ་རིང་ཚད་སྤྱི་ལེ་1937ཡོད་པའི་མཚོ་བོད་གཞུང་ལམ་ཧྲིལ་པོའི་ཆ་སྙོམས་ས་བབ་མཐོ་ཚད་ལ་སྨི་4000ལྷག་ཙམ་ཟིན་གྱི་ཡོད།

ཀྲང་གོ་ཧྭ་ཡི་བུ་མོ་ཀྲང་ཞའོ་ཁང་གིས《གངས་ལྗོངས་ཀྱི་སྐྱོ་གླུ》ཞེས་པའི་ནང་འདི་ལྟར་བྲིས་ཡོད་དེ། ངས་མཐོང་མ་མྱོང་བའི་གཅེན་མོ་དང་། ཨ་ཕ་མཉམ་དུ“དམག་དཔུང་ལ་ཞུགས་པའི”ལོ་3ལ་སླེབས་པའི་ཞའོ་ནན་གཉིས་ཀ་ས་མཐོར་མ་སླེབས་གོང་ནས་གློ་ཚད་ཀྱིས་རྐྱེན་པས་ཚེ་སྲོག་ཤོར་སོང་། ཁྲོན་བོད་གཞུང་ལམ་དུ་དཔའ་བོ་3000ལྷག་ཙམ་གྱིས་ཤ་ཁྲག་ལ་བརྟེན་ནས་ལམ་གཞི་བཏིང་ཞིང་། ཆ་སྙོམས་སྤྱི་ལེ་རེར་ཉུང་མཐར་ཡང་ལམ་བཟོ་བ་གཅིག་གིས་རང་སྲོག་བློས་བཏང་ཡོད། ད་དུང་རྨས་སྐྱོན་ཕོག་ནས་དབང་སྐྱོན་དུ་གྱུར་པ་དང་ངལ་བས་མནར་ཏེ་ནད་ཕོག་པའི་མི་ནི་བགྲང་གིས་མི་ལང་།

ད་ཆ་ལྷ་ས་སྐྱིད་ཆུའི་འགྲམ་གྱི་ཁྲོན་བོད་དང་མཚོ་བོད་གཞུང་ལམ་གྱི་དྲན་གསོའི་རྡོ་རིང་དེ་ས་མཐོའི་ཉི་འོད་འོག་ཏུ་འགྱིང་ངེར་གནས་ཤིང་། དེའི་མདུན་ནས་མི་དང་རླངས་འཁོར་རྒྱུན་མི་ཆད་པར་ཕར་འགྲོ་ཚུར་འོང་ལ་བྲེལ།

རྣམ་པ་འདི་དང་ཡུལ་ལྗོངས་འདི་དག་མིག་ལམ་དུ་འཆར་སྐབས་ཁྲོན་བོད་གཞུང་ལམ་རྒྱུད་ཀྱི་མཐོང་ཐོས་མཐའ་དག་སེམས་ཁོང་གི་དྲག་ཏུ་འཕྱུར་བའི་སྤྲོ་བ་དང་དྲིན་ཚོར་དང་གཅིག་ཏུ་འདྲེས།

“ཁྲོན་བོད་ཀྱི་གཤིན་རྗེའི་འཕྲང་ལམ”ཁྲོ་ལ་རི་བོར། 1951ལོའི་དགུན་ཁ་འཐབ་འཛིང་པ་ཀྲང་ཧྥུའུ་ལིན་གྱིས་ལས་ཡུལ་དུ་རྫས་ཁུང་དང་རྫས་མེ་བླུགས་མིན་ལྟ་སྐབས། བྲག་རྡོ་ཆེན་པོ་ཞིག་གློ་བུར་དུ་འགྲིལ་ནས་ཁོང་གི་རྐང་པ་གཡས་པ་དང་རྐེད་པར་ཕོག རང་ཉིད་ལ་རྨས་སྐྱོན་ཚབས་ཆེན་ཕོག་པ་ཤེས་པས། ཁོང་གིས་སྨན་དོན་པར་སྨན་འཕྲོ་བརླག་མ་གཏོང་ཞིག་ཅེས་བཤད་པ་མ་ཟད། འཐབ་གྲོགས་ལ་ཁོང་གི་ཚབ་བྱས་ཏེ་ཏང་དངུལ་ཡང་བསྐྱར་ཐེངས་གཅིག་འཇལ་རོགས་ཞེས་མངགས། ཚལ་སོན་ཐུམ་ལྔ་ཁྱེར་ནས་དམག་དཔུང་ལ་ཞུགས་པའི་གཞོན་ནུ་དེས་ས་མཐོར་རེ་བའི་ས་བོན་འདེབས་མ་ཐུབ་གོང་ནས་ལོ་25ཡི་ལང་ཚོ་ཁྲོ་ལའི་ལ་གཤམ་དུ་ཕུལ།

ད་ཆ་ཀྲང་ཧྥུའུ་ལིན་གྱིས་རང་སྲོག་བློས་བཏང་བའི་ས་ཆ་ནས་བསྲིངས་པའི་གཞུང་ལམ་དེ་ནི་དཀར་མཛེས་ཀྲོའུ་ཡི་བྱང་སྣེའི་སེར་ཤུལ་རྫོང་གི་རྩྭ་ཆུ་ཁ་རྩྭ་ཐང་གི་དབུས་སུ་ཤར་གཏོང་ཐུབ། ལོ་70ལྷག་ཙམ་གྱི་གོང་རྩྭ་ཐང་གི་རྒན་རབས་པ་དང་ཡུལ་མི་སྤུན་ཟླ་ཚོས་གཞུང་ལམ་འཛུགས་སྐྲུན་ལ་རོགས་སྐྱོར་བྱ་ཆེད་འབྲི་གཡག་6000ལེགས་སྐྱེས་སུ་ཕུལ།

ད་ཆ་འབྲི་གཡག་གསོ་སྤེལ་ནི་སྔར་བཞིན་ས་གནས་དེ་གའི་མང་ཚོགས་ཀྱི་འཚོ་རྟེན་ཐོན་ལས་ཤིག་ཡིན་ཞིང་། རྒྱུན་སྡོད་མི་འབོར་ཁྲི་10ལས་མེད་པའི་རྫོང་དེའི་2023ལོའི་འབྲོག་ལས་ཀྱི་ཐོན་རྫས་རིན་ཐང་སྒོར་དུང་ཕྱུར་6.1ལས་བརྒལ།

འགག་སྒྲོལ་དཀའ་སེལ། འབད་འབུངས་ལམ་དུ་སྙིང་རུས་གཏན་འཁྱོངས་བྱེད་པ།

ལོ་70ལྷག་ཙམ་གྱི་གོང“ལམ་གཉིས”སྐྲུན་མཁན་དམག་དམངས་ཀྱིས་ལག་ཆ་ཐབས་ཆག་ལ་བརྟེན་ནས“རི་མཐོན་པོའི་མགོ་བོ་སྒུར་དུ་བཅུག ཆུ་ཆེན་པོར་ལམ་གཟུར་དུ་བཅུག་པའི”དཔའ་ཉམས་ཐོག་ནས་ལམ་དུ་ཞུགས།

“རི་བོ་ཇི་ཙམ་མཐོ་ཡང་ང་ཚོའི་རྐང་མཐིལ་ལས་མཐོ་བ་མེད། དཀའ་ངལ་ཇི་ཙམ་ཆེ་ཡང་ང་ཚོའི་ཆོད་སེམས་ལས་ཆེ་བ་མེད”ཅེས་2019ལོར་ལོ་99ལ་སླེབས་པའི་དམག་སྡེ་བཅོ་བརྒྱད་པའི་འཐབ་འཛིང་པ་རྒན་གྲས་ཝུའེ་ཁེ་ཡིས་གཟུགས་པོ་འདྲོང་གང་ཐུབ་ཀྱིས་གསར་འགོད་པར་ཡིག་འབྲུ་རེ་རེ་བཞིན་བཤད། 2023ལོར་ལོ་103ལ་སླེབས་པའི་ཁོང་ཚེ་ལས་འདས། ཤུལ་དུ་བཞག་པའི་བོད་སྐྱོད་ཉིན་ཐོའི་དེབ་མཐུག་པོའི་ཡིག་འབྲུ་རེ་རེ་ལས་ཞུམ་པ་མེད་པའི་དཔའ་སེམས་ཆེན་པོ་མངོན།

“ཉིན་སྔ་མར་བསྐྲུན་པའི་ལམ་ཉིན་གཉིས་པར་མེད་པར་གྱུར་པ་སྟེ། རི་ཉིལ། ཉིན་སྔ་མར་བསྒྲལ་བའི་ཆུ་བོ་ཉིན་གཉིས་པར་མེད་པར་གྱུར་པ་སྟེ། འགག་མཚོར་གྱུར”ཞེས་དམག་སྡེ་བཅོ་བརྒྱད་པའི་རིག་རྩལ་ཚོགས་པའི་ཀན་ཧྲི་ལི་ཅུན་ཁྲེན་གྱིས་ཁྲོན་བོད་གཞུང་ལམ་བསྐྲུན་པའི་སྐོར་ལ་ཕྱིར་དྲན་བྱེད་བཞིན་དེ་ལྟར་བརྗོད།

ད་ཆ། ལམ་བཟོ་བ་རབས་གསར་པ་ཚོས་ཀྱང་དེ་ལྟའི་དཀའ་སྡུག་མྱོང་བཞིན་ཡོད།

དགུན་ཨ་རང་ད་རང་དུ“ཁམས་ཡུལ་གྱི་གཤིན་རྗེའི་འཕྲང་ལམ”ཞེས་སུ་གྲགས་པའི་དཀར་མཛེས་ཀྲོའུ་དར་རྩེ་མདོ་གྲོང་ཁྱེར་གྱི་རྒྱུ་ལའི་ལ་གཤམ་དུ་རིང་ཚད་ལ་སྨི་8500ཡི་རྒྱུ་ལའི་ཕུག་ལམ་ཨར་སྐྲུན་བྱེད་བཞིན་ཡོད་ཅིང་། ཕུག་ལམ་དེ་ནི་ཡོམ་ཚད་ཆེ་བའི་ས་ཁོངས་སུ་གནས་པ་མ་ཟད། མིག་སྔར་ད་དུང་འབོལ་ཞིང་གས་སླ་བ་དང་བཞའ་ཚན་ཆེ་བའི“ཐཱན་རྫས་ཀྱི་རྫ་གཡམ”ས་ཆའི་ཚོད་བགམ་འཕྲད་བཞིན་ཡོད་པས། འབར་གཏོར་བྱེད་མི་རུང་ལ་འབིགས་འཕྲུལ་ཡང་སྤྱོད་མི་རུང་བར་རྐོ་འདྲུ་འཕྲུལ་འཁོར་གྱིས་རིམ་པ་བཞིན་རྐོ་རྒྱུ་ལས་ཐབས་གཞན་མེད། 2018ལོར་སྐྲུན་འགོ་ཚུགས་པ་ནས་བཟུང་ཨར་སྐྲུན་ཕྱོགས་ཀྱིས་དབྱིབས་འགྱུར་ཆེན་པོ་དང་ཆུ་སིམ་པའི་གནས་ཚུལ་ཐེངས་བཅུ་ཕྲག་ཁ་ཤས་ཐག་གཅོད་བྱས་ཡོད། ཧྲུའུ་ཏའོ་ཚོགས་པའི་རྣམ་གྲངས་ཀྱི་ཅིང་ལི་ཧོའུ་ཞའོ་ཧུང་གིས“འདི་གར་ནི་དངོས་གནས་ས་གཤིས་ངན་པའི་རྟེན་མཛོད་ཁང་ཞིག་དང་འདྲ”ཞེས་དབུགས་རིང་གཏོང་བཞིན་བཤད།

“ས་བབ་མཐོ་ཚད་སྨི་5000ཟིན་ཞིང་དྲོད་ཚད་ཀླད་ཀོར་འོག་གི་ཧྲེ་ཧྲི་ཏུའུ་30ལ་ཟིན་པ་དང་། ཆུ་འཁོལ་ཚད་ཧྲེ་ཧྲི་ཏུའུ་70ལས་མ་ཟིན་རུང་ང་ཚོའི་སེམས་ཤུགས་ཧྲེ་ཧྲི་ཏུའུ་100ཟིན་གྱི་ཡོད”ཅེས་ཀྲང་ཧྥུའུ་ལིན་གྱི་འཐབ་གྲོགས་ཏུའུ་ལིན་གྱིས་ཆ་སྙོམས་སྤྱི་ལེ་རེར་འཐབ་གྲོགས་7རང་སྲོག་ཤོར་བའི་ཁྲོ་ལའི་སྐོར་ཕྱིར་དྲན་བྱེད་བཞིན་དེ་ལྟར་བཤད།

ད་ཆ། ལམ་བཟོའི་དམག་དམངས་ཀྱི་འབད་འཐབ་སྙིང་སྟོབས་ལས་རྗེས་རབས་པ་རྣམས་ལ་སྐུལ་ལྕག་ཐེབས་བཞིན་ཡོད།

གདང་ལའི་ལ་ཁ་ནི་མཚོ་བོད་གཞུང་ལམ་གྱི་མཐོ་ཤོས་རེད། ས་བབ་མཐོ་ཚད་སྨི་5231ཟིན་པའི་གཞུང་ལམ་བདག་སྐྱོང་དང་ཤར་གཏོང་ས་ཚིགས་109པར་མི་རྣམས་ཀྱིས“གནམ་འོག་གི་ཏའོ་པན་དང་པོ”ཞེས་འབོད། དེ་གར་ལོ་རེའི་ཆ་སྙོམས་དྲོད་ཚད་ཀླད་ཀོར་འོག་གི་ཧྲེ་ཧྲི་ཏུའུ་8ཟིན་པ་དང་གྲང་ཤོས་སྐབས་ཀླད་ཀོར་འོག་གི་ཧྲེ་ཧྲི་ཏུའུ་40ལ་ཆག་པ་དང་། གསོ་རླུང་འདུས་ཚད་མཚོ་ངོས་ཀྱི་40%ཙམ་ལས་ཟིན་གྱི་མེད་པ། ལོ་གཅིག་གི་ཉིན་120ཡན་རིང་ལྷགས་པ་ཆེན་པོ་རིམ་པ་8རྒྱག་གི་ཡོད།

བདག་སྐྱོང་ལམ་དུམ་དུ་ལོ་མང་འཁྱགས་པ་ཐེབས་པའི་ཁུལ་བརྒྱུད་དགོས་པས་ལོ་ལྟར་འདམ་རྡོའི་ཆུ་རུད་དང་། གངས་རྡིབ། ལམ་ངོས་རྡིབ་པ། སྲུབ་ཀ་གས་པ་སོགས་རང་བྱུང་གི་གནོད་འཚེ་དང་གཞུང་ལམ་གྱི་སྐྱོན་ཐོན་གྱི་ཡོད། བདག་སྐྱོང་བ་པ་ཕུར་གྱིས་དྲན་གསལ་ལ་ཐེངས་ཤིག་གདང་ལར་གློ་བུར་དུ་ཁ་བ་བུ་ཡུག་འཚུབ་སྟེ་རླངས་འཁོར་བརྒྱ་ལྷག་ཙམ་གངས་ཁྲོད་དུ་ལུས་ནས་སྐྱོད་ཐབས་བྲལ། བཟོ་པ་ཚོས་མཚན་གང་བྲེལ་བརྩོན་ཆེན་པོས་འགྲོ་ལམ་ཤར་གཏོང་ཐུབ་ཐབས་བྱས། ཁོང་ཚོ་སྡོད་སར་ལོག་སྐབས་འཁྱགས་པ་ཐེབས་པའི་ལག་ཤུབས་ལག་པ་ནས་འབུད་མི་ཐུབ་པ་དང་། ལག་ཤུབས་བུད་སྐབས་ཁྲག་དམར་ཆིལ་ལེར་དོན་ཡང་ན་ཟུག་གང་ཡང་མི་ཚོར།

མི་རབས་ནས་མི་རབས་བར་གྱིས་འབད་འཐབ་དང་བརྟན་སྲུང་བྱས་ནས“མཁའ་ལམ”དེ་ནམ་ཡང་འགྱུར་བ་མེད་པའི་གཏམ་རྒྱུད་ངོ་མཚར་ཅན་ཞིག་བཏོད།

ད་ཆ། ཁྲོན་བོད་གཞུང་ལམ་བརྒྱུད་ནས་ལྷ་སའི་ཕྱོགས་སུ་སྐྱོད་སྐབས་ཕུག་ལམ་ཆེ་ཆུང་སྣ་ཚོགས་60ལྷག་ཙམ་ཐོག་མར་སྐྲུན་སྐབས་ཀྱི་ཉེན་ཁ་ཆེ་ཤོས་ཀྱི་ལམ་དུམ་ལས་གཡོལ་ཡོད། རླངས་འཁོར་གྱི་སྒེའུ་ཁུང་ཕྱི་རོལ་གྱི་ལྕགས་ལམ་ཟམ་རྟེན་རེ་རེ་མཐོང་སྐབས་མ་འོངས་པར་དེ་བས་སྟབས་བདེ་དང་བདེ་འཇགས་ངང་བོད་དུ་སྐྱོད་ཐུབ་ངེས་ཀྱི་ཡིད་ཆེས་ཇེ་བརྟན་དུ་སོང་།

གཅིག་སེམས་གཅིག་གཏད། མི་རིགས་མཐུན་སྒྲིལ་གྱི་ལེའུ་གསར་རྩོམ་པ།

“ཡངས་ཤིང་རྒྱ་ཆེ་བ་དང་། མཛེས་སྡུག འབྱོར་ཕྱུག་བཅས་ཀྱི་ས་ཆ་འདིའི་ཐོག་མི་རིགས་ཁག་གི་མི་དམངས་ཚང་མར་ཐུན་མོང་གི་ཁྱིམ་གཞིས་གཅིག་ཡོད་པ་ནི་ཀྲུང་གོ་ཡིན་པ་དང་། ཚང་མར་ཐུན་མོང་གི་ཐོབ་ཐང་ཞིག་ཡོད་པ་ནི་ཀྲུང་ཧྭ་མི་རིགས་ཡིན་པ། ཚང་མར་ཐུན་མོང་གི་མིང་ཞིག་ཡོད་པ་ནི་ཀྲུང་གོ་བ་ཡིན་པ། ཚང་མར་ཐུན་མོང་གི་ཕུགས་འདུན་ཞིག་ཡོད་པ་ནི་ཀྲུང་ཧྭ་མི་རིགས་ཀྱི་བསྐྱར་དར་རླབས་པོ་ཆེ་མངོན་འགྱུར་བྱ་རྒྱུ་དེ་ཡིན”ད་ལོའི་ཟླ་9ཚེས་27ཉིན་སྤྱི་ཁྱབ་ཧྲུའུ་ཅི་ཞི་ཅིན་ཕིང་རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གཟེངས་བསྟོད་ཚོགས་ཆེན་ལ་ཞུགས་པ་མ་ཟད། གསུང་བཤད་གལ་ཆེན་ཡང་གནང་ནས་ཀྲུང་ཧྭ་མི་རིགས་གཅིག་མཐུན་ཚོགས་པ་འཛུགས་པར་སྐུལ་འདེད་གཏོང་བའི་ཐད་མཛུབ་སྟོན་གལ་ཆེན་གནང་ཡོད།

“ལམ་གཉིས”ཀྱི་སྙིང་སྟོབས་ནི་མི་རིགས་ཁག་གི་བུ་ཕྲུག་ཚོས་ཐུན་མོང་གི་ཕུགས་འདུན་ཆེད་དུ་འབད་འཐབ་བྱས་པའི་བརྒྱུད་རིམ་ཁྲོད་བྱུང་བ་ཞིག་རེད།

“སུས་ང་ཚོར་གཞུང་ལམ་སྐྲུན་རོགས་བྱས་སམ། སུས་ང་ཚོར་ཟམ་པ་རྒྱག་རོགས་བྱས་སམ། གཉེན་ཉེ་བཅིངས་འགྲོལ་དམག་དང་མགོན་སྐྱབས་གུང་ཁྲན་ཏང་རེད། དམག་དམངས་ཁྱིམ་ཚང་གཅིག་ཡིན་པས། ང་ཚོས་གཉེན་ཉེ་ཚོར་གོས་འཁྲུ་རོགས་བྱེད” 《གོས་འཁྲུའི་གཞས》དེ་ཁྲོན་བོད་གཞུང་ལམ་ཐོག་གི་གྲོང་སྡེ་ཆུང་ངུ་འབའ་ཐང་རྫོང་ནས་བྱུང་བ་སྟེ། ལོ་70ལྷག་ཙམ་གོང་ལམ་བཟོ་བ་དམག་སྡེ་བཅོ་བརྒྱད་པའི་འཐབ་འཛིང་པར་དེ་གའི་མང་ཚོགས་ཀྱི་སྤྲོ་སེམས་འཁོལ་བའི་དགའ་བསུ་ཐོབ་པ་དང་བོད་རིགས་གཞོན་ནུ་200ལྷག་ཙམ“བཅིངས་འགྲོལ་དམག་མིའི”དཔུང་སྡེར་ཞུགས།

ད་ཆ། “ལམ་གཉིས”དེ་ཁ་བཏགས་རིང་པོ་ཞིག་དང་འདྲ་བར་མི་རིགས་ཁག་གི་སྤུན་ཟླའི་སེམས་པ་སྔར་བས་དམ་པོར་སྦྲེལ།

མཚོ་བོད་གཞུང་ལམ་འགྲམ་དུ་ས་བབ་མཐོ་ཚད་སྨི་4600ཡོད་པའི་ཁུ་ཁུ་ཤིས་རིའི་མུ་ཏིག་ཚྭ་ཆུ་ཁའི་སྲུང་སྐྱོང་ས་ཚིགས་སུ“བཀྲ་ཤིས་སྒོ་རྩིས་ཚོང་ཁང”གི་སྦྱིན་བདག་བཀྲ་ཤིས་བདེ་སྐྱིད་ནི་འགྲོ་འོང་བྱེད་མཁན་འགྲུལ་པ་ཚོའི་སེམས་ནང་སེམས་རྩ་འཁོལ་ཤོས་ཀྱི“ཨ་ཅག”ཅིག་རེད། ལོ་20ལྷག་ཙམ་གོང་ཁོ་མོ་ཁུ་ཁུ་ཤིས་རིའི་དོ་དམ་ཅུས་ཀྱི་རི་སྐོར་རུ་མིའི་འགན་འཁུར་མཁན་ཁྱོ་ག་དང་མཉམ་དུ་དེ་གར་ཡོང་། རྟག་པར་རི་སྐོར་ལ་མ་འགྲོ་གོང་རུ་མི་ཚང་མས་དེ་གར་ཞལ་གྱེས་ཞུ་བར་ཡོང་གི་ཡོད། ཚོང་ཁང་ནང་རྒྱུན་དུ་གསོ་རླུང་ལྕགས་དབྲིལ་དང་ལ་དུག་འཇོམས་པའི་སྨན་གྲ་སྒྲིག་བྱས་ཡོད། ལོ་འདི་དག་རིང་ལ་དུག་ཆེན་པོ་ཕོག་པའི་ཡུལ་སྐོར་བ་ག་ཚོད་ཀྱི་ཚེ་སྲོག་བསྐྱབས་ཡོད་མིན་ཁོང་ལ་གསལ་པོ་ཤོད་རྒྱུ་མེད།

ད་ཆ། “ལམ་གཉིས”ཀྱིས་འཕེལ་རྒྱས་ཀྱི“གསེར་ཟམ”བསྐྲུན་ནས་ས་མཐོ་འདི་ཉིད་ཐུན་མོང་འབྱོར་ཕྱུག་གི་ཕུགས་འདུན་དང་དེ་བས་ཐག་ཉེ་བར་བཏང་ཡོད།

དཀར་མཛེས་ཀྲོའུ་དར་རྩེ་མདོ་གྲོང་ཁྱེར་ལྷ་སྒང་རྩྭ་ཐང་དུ་ནམ་དུས་དྲོ་གྲང་གང་ཞིག་ཡིན་རུང་ཡུལ་སྐོར་བའི་རྒྱུན་ཆད་རྒྱུ་མེད། 2023ལོར་ལྷ་སྒང་གྲོང་ཚོའི་མཉམ་སྡེབ་དཔལ་འབྱོར་གྱི་ཡོང་འབབ་སྒོར་ཁྲི་ཆིག་སྟོང་ལས་བརྒལ་ཡོད། “པར་ལེན་མཁས་ཅན་གྱི་ཞིང་ཁམས”ཞེས་འབོད་པའི་ར་རྔ་ཁ་གྲོང་སྡེར་གྲོང་གསར་དང་པོའི་གྲོང་སྡོད་ཧྲུའུ་ཅི་དང་པོ་ཁྲེན་ཧུང་ཅན་ཉིན་མ་གནངས་འཆར་ལ་གཉེན་ཆང་འཐུང་བར་གདན་འདྲེན་གྱི་ཡོད། ཁྱིམ་ཚང་ཚང་མས་ཡུལ་སྐོར་ལ་བརྟེན་ནས་ཡོང་འབབ་གསོག་པའི་གྲོང་རྡལ་ཆུང་ངུ་དེར་བོད་རྒྱ་གཉེན་སྒྲིག་གི“མཐུན་སྒྲིལ་ཁྱིམ་ཚང”ཇེ་མང་དུ་འགྲོ་བཞིན་ཡོད་ལ་འཚོ་བའང་བདེ་ཞིང་སྐྱིད་པར་གྱུར་བཞིན་མཆིས།

ད་ལོའི་ཟླ་དང་པོ་ནས་10པའི་བར་དཀར་མཛེས་ཀྲོའུ་ཡིས་ཡུལ་སྐོར་བ་མི་ཐེངས་ཁྲི་4100ལ་སྣེ་ལེན་ཞུས་པར་ཡུལ་སྐོར་གྱི་ཕྱོགས་བསྡུས་ཡོང་འབབ་སྒོར་དུང་ཕྱུར་450བྱུང་། གངས་དཀར་རི་བོ་དང་། འདབ་པའི་ཉིན་སྟེང་། དགེ་བསྙེན་ཆུ་མིག་སོགས“མཁའ་ལམ”གྱི་མིང་བྱང་གསར་པར་འགྱུར།

（ཚེ་བརྟན་སྒྲོལ་དཀར་དང་བསྟན་འཛིན་བཟང་མོས་སྒྱུར་ཞུས་བྱས）