ཤིན་ཧྭ་གསར་འགྱུར་ཁང་པེ་ཅིང་ནས་ཟླ་12ཚེས་25ཉིན་གློག་འཕྲིན་འབྱོར་གསལ། ཚེས་25ཉིན་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཨུ་ཡོན་ཕྱི་འབྲེལ་པུའི་པུའུ་ཀྲང་ཝང་དབྱིས་པེ་ཅིང་དུ་རི་པིན་གྱི་ཕྱི་འབྲེལ་བློན་ཆེན་ཡན་ཝུའུ་དབྱི་དང་ལྷན་དུ་ཀྲུང་གོ་དང་རི་པིན་གྱི་མཐོ་རིམ་མི་ཆོས་རིག་གནས་སྤེལ་རེས་དང་གྲོས་མོལ་ལམ་སྲོལ་གྱི་ཚོགས་འདུ་ཐེངས་གཉིས་པར་ཞུགས་པ་རེད། ཚོགས་འདུའི་ཐོག་ཐུན་མོང་ངོས་འཛིན་གལ་ཆེན་ཁག་10བྱུང་བ་གཤམ་གསལ་ཏེ།

གཅིག་ནས་གཞོན་ནུ་ལོ་ཆུང་དབར་གྱི་སྤེལ་རེས་དང་འཚམས་འདྲིར་སྐུལ་འདེད་ཤུགས་ཆེན་བཏང་སྟེ། རྒྱལ་ཁབ་གཉིས་པོའི་དབར་གྱི་སློབ་སྦྱོང་ཡུལ་སྐོར་ལ་སྐུལ་ལྕག་དང་རྒྱབ་སྐྱོར་བྱེད་རྒྱུ་དང་།

གཉིས་ནས་སློབ་གསོའི་ཁྱབ་ཁོངས་ཀྱི་མཉམ་ལས་གཏིང་ཟབ་ཏུ་བཏང་སྟེ། ཕྱི་སྦྱོང་སློབ་མ་ཕན་ཚུན་མངགས་གཏོང་བྱེད་པར་ཤུགས་སྣོན་རྒྱག་རྒྱུ་དང་ཆབས་ཅིག རྒྱལ་ཁབ་གཉིས་པོའི་སློབ་གྲྭ་འབྲིང་ཆུང་དབར་གཅེན་གཅུང་སློབ་གྲྭའི་འབྲེལ་བ་འཛུགས་པ་དང་མཐོ་རིམ་སློབ་གྲྭས་སློབ་གྲྭའི་དབར་མཉམ་ལས་བྱེད་པར་རྒྱབ་སྐྱོར་བྱེད་རྒྱུ།

གསུམ་ནས་ཡུལ་སྐོར་ལས་རིགས་ཀྱི་མཉམ་ལས་ལ་རྒྱབ་སྐྱོར་གྱིས་སྟབས་བདེ་ཅན་གྱི་བྱེད་ཐབས་དེ་བས་མང་པོ་བཏོན་ཏེ། རྒྱལ་ཁབ་གཉིས་པོའི་ཡུལ་སྐོར་བ་ཕན་ཚུན་འཚམས་འདྲིར་ཡོང་རྒྱུར་སྐུལ་འདེད་གཏོང་རྒྱུ།

བཞི་ནས་མཛའ་མཐུན་གྲོང་ཁྱེར་གྱི་འབྲེལ་ཟམ་དེ་བས་མང་པོ་བསྐྲུན་ནས་ཀྲུང་རིའི་ཧྲེང་ཀྲང་དང་ཀྲེ་ཧྲིའི་གླེང་སྟེགས་དང་། ཀྲུང་རི་ཧན་གསུམ་གྱི་རིག་གནས་སྤེལ་རེས་ལོ། ཨེ་ཤེ་ཡ་ཤར་མའི་རིག་གནས་གྲོང་སོགས་ལམ་སྲོལ་དང་ལས་སྟེགས་ཧུར་ཐག་སྤྱད་དེ། རྒྱལ་ཁབ་གཉིས་པོའི་ས་གནས་དང་དམངས་ཁྲོད་ཀྱི་མཛའ་མཐུན་འགྲོ་འོང་རྒྱ་ཆེར་གཏོང་རྒྱུ།

ལྔ་ནས་ལུས་རྩལ་སྤེལ་རེས་མཉམ་ལས་ལ་ཤུགས་སྣོན་བརྒྱབ་སྟེ། 2025ལོའི་ཧའར་པིན་གྱི་ཨེ་ཤེ་ཡའི་དགུན་དུས་ལུས་རྩལ་འགྲན་ཚོགས་དང་2026ལོའི་ཨའེ་ཀྲི-མིང་ཀུའུ་ཝུའི་ཨེ་ཤེ་ཡའི་ལུས་རྩལ་འགྲན་ཚོགས་སོགས་ལུས་རྩལ་འགྲན་བསྡུར་གལ་ཆེན་ཡག་པོ་གཉེར་རྒྱུར་ཕན་ཚུན་རྒྱབ་སྐྱོར་བྱེད་རྒྱུ།

དྲུག་ནས་གློག་བརྙན་བརྙན་འཕྲིན་དང་། རོལ་དབྱངས། དཔེ་སྐྲུན། འགུལ་བརྙན། རོལ་རྩེད་སོགས་རིག་གནས་རོལ་རྩེད་ཐོན་ལས་ཐད་མུ་མཐུད་མཉམ་ལས་བྱེད་པར་རྒྱབ་སྐྱོར་དང་། ཆུ་ཚད་མཐོ་བའི་སྒྱུ་རྩལ་ཚོགས་པ་སྤེལ་རེས་དང་འཚམས་འདྲི་བྱེད་པར་མངགས་གཏོང་། རྒྱལ་ཁབ་གཉིས་ཀྱི་གསུང་རབ་བཀའ་རྩོམ་ཕན་ཚུན་བསྒྱུར་ནས་པར་སྐྲུན་བྱེད་པར་རྒྱབ་སྐྱོར་བྱེད་རྒྱུ།

བདུན་ནས་སྨྱན་སྦྱོར་དང་རིག་མཛོད་ཀྱི་སྤེལ་རེས་མཉམ་ལས་ལ་ཤུགས་སྣོན་བརྒྱབ་སྟེ། ཕྱོགས་གཉིས་པོའི་འབྲེལ་བའི་ཁྲོད་དུ་དགེ་མཚན་ལྡན་པའི་ནུས་པ་བཏོན་ནས་དམངས་འདོད་དང་གླེང་ཕྱོགས་ཀྱི་ཁོར་ཡུག་ལེགས་སུ་གཏོང་རྒྱུར་ཤུགས་རྒྱག་རྒྱུ་དང་ཕྱོགས་གཉིས་པོས་སྨྱན་སྦྱོར་གསར་པའི་སྤེལ་རེས་མཉམ་ལས་ལ་རྒྱབ་སྐྱོར་བྱས་ཏེ། རྒྱལ་ཁབ་གཉིས་པོའི་དྲང་ནུས་ཡོད་པའི་དྲ་རྒྱ་གསར་པ་བཏོད་ནས་ཕན་ཚུན་སྤེལ་རེས་ལ་སྐུལ་འདེད་གཏོང་རྒྱུ།

བརྒྱད་ནས་བུད་མེད་ཚོགས་པའི་སྤེལ་རེས་བྱེད་སྒོ་སྤེལ་ནས་ཕོ་མོ་ཐུན་མོང་འཕེལ་རྒྱས་དང་ཉམས་མྱོང་མཉམ་སྤྱོད་ལ་སྐུལ་སྤེལ་གཏོང་རྒྱུ་དང་ཀྲུང་གོ་ཕྱོགས་ཀྱིས་རི་པིན་ཕྱོགས་པེ་ཅིང་འཛམ་གླིང་བུད་མེད་ཚོགས་ཆེན་གཉེར་ནས་ལོ་30འཁོར་བར་དྲན་གསོ་ཞུ་བའི་གོ་ལ་ཧྲིལ་པོའི་བུད་མེད་དབུ་ཚོགས་ལ་གདན་འདྲེན་བྱེད་རྒྱུ།

དགུ་ནས་2025ལོའི་ཏ་པན·ཀོན་ཤིས་འཛམ་གླིང་དངོས་མང་སྟོན་ཚོགས་དེ་རྒྱལ་ཁབ་གཉིས་པོའི་མི་དམངས་ཀྱི་སྤེལ་རེས་དང་མཛའ་གྲོགས་ཀྱི་སྟེགས་བུར་བསྐྲུན་རྒྱུ་དང་། དེ་བཞིན་ཀྲུང་གོ་ཕྱོགས་ཀྱིས་རི་པིན་ཕྱོགས་ཀྱིས་སྟོན་ཚོགས་གཉེར་རྒྱུར་རྒྱབ་སྐྱོར་བྱེད་རྒྱུ་དང་རི་པིན་ཕྱོགས་ཀྱིས་ཀྲུང་གོ་ཕྱོགས་འགྲེམས་ཚོགས་སུ་ཞུགས་པར་དགའ་བསུ་ཞུ་རྒྱུ་དང་འབྲེལ། ཀྲུང་གོའི་འགྲེམས་ཁང་གྲབས་འཛུགས་གཉེར་སྐྱོང་སོགས་ལ་གཞོགས་འདེགས་བྱེད་རྒྱུ།

བཅུ་ནས་དུས་ཚོད་འོས་འཚམ་ལ་རི་པིན་དུ་ཀྲུང་གོ་དང་རི་པིན་གྱི་མཐོ་རིམ་མི་ཆོས་རིག་གནས་སྤེལ་རེས་དང་གྲོས་མོལ་ལམ་སྲོལ་གྱི་ཚོགས་འདུ་ཐེངས་གསུམ་པ་འཚོག་རྒྱུ་བཅས་རེད།

（སྤེན་པ་ཚེ་རིང་གིས་བསྒྱུར་ཅིང་ཞུས）