འདི་ལོའི་ཟླ་11ཚེས་17ནས་21ཉིན་བར་ཀྲུའུ་ཞི་ཞི་ཅིན་ཕིང་རྒྱལ་ཁབ་ཉི་ཤུ་ཚོགས་པའི་འགོ་ཁྲིད་པའི་དབུ་ཚོགས་ཐེངས་བཅུ་དགུ་པར་ཞུགས་པ་དང་འབྲེལ་པར་ཙིར་ལ་རྒྱལ་དོན་འཚམས་འདྲི་གནང་བ་རེད། ང་དང་ངའི་ནང་མི་དང་། ལས་རོགས། གྲོགས་པོ་བཅས་ཀྱིས་ཀྲུའུ་ཞི་ཞི་ཅིན་ཕིང་པར་ཙིར་ལ་འཚམས་འདྲིར་ཕེབས་པར་དོ་ཁུར་བྱས་པ་མ་ཟད། ད་དུང་འབྲེལ་ཡོད་བྱེད་སྒོ་མང་པོ་ཞིག་ནང་རང་ཉིད་ཞུགས་པ་ཡིན།

ཀྲུའུ་ཞི་ཞི་ཅིན་ཕིང་དང་ཙུང་ཐུང་ལུའུ་ལཱ་རྣམ་གཉིས་དབར་སྤེལ་རེས་གནང་སྐབས་ཀྱི་སྤྲོ་སེམས་འཁོལ་བའི་རྣམ་པས་ང་ལ་སེམས་འགུལ་ཆེན་པོ་ཐེབས་བྱུང་། ཙུང་ཐུང་ལུའུ་ལཱ་ཡིས་ཁོང་གི་གཟིམ་ཤག་ཏུ་གུས་ལུགས་མཐོ་ཤོས་ཀྱི་དགའ་བསུའི་མཛད་སྒོ་གཟབ་རྒྱས་ཐེངས་དང་པོ་འཚོགས་པ་དང་འབྲེལ། པར་ཙིར་གྱི་སྒྲ་གདངས་མཐོ་བའི་གཞས་མ་བཀོད་སྒྲིག་བྱས་ནས་ས་གནས་ས་ཐོག་ཏུ་ཀྲུང་གོའི་གླུ་དབྱངས《ང་ཡི་མེས་རྒྱལ》ཞེས་པ་བཏང་བ་དང་ཀྲུའུ་ཞི་ཞི་ཅིན་ཕིང་གིས་ཐུགས་དགྱེས་ཚོར་ཆེན་པོས་གསན་པ་རེད། འཚམས་འདྲི་གནང་རིང་། ཀྲུའུ་ཞི་ཞི་ཅིན་ཕིང་གིས་པར་ཙིར་ལས་རིགས་ཁག་གི་མི་སྣའི་འབོད་སྒྲ་གསན་ནས་ཁོང་གིས་རྒྱལ་ཁབ་གཉིས་པོའི་དབར་བསམ་ཤེས་བྱེད་རེས་བྱེད་པར་སྐུལ་འདེད་གཏོང་བར་གཞོལ་བའི་ལྷག་བསམ་མཚོན་གནང་བ་དེས་ང་ལ་སེམས་འགུལ་དེ་བས་ཐེབས་བྱུང་། ངས་ཀྲུའུ་ཞི་ཞི་ཅིན་ཕིང་ནི་མཁྱེན་རྒྱ་ཡངས་པ་དང་། ཟོལ་མེད། སེམས་ཐག་ཉེ་བ་བཅས་ཀྱི་འགོ་ཁྲིད་ཅིག་ཡིན་པ་ཚོར་བྱུང་།

འཚམས་འདྲི་བྱེད་རིང་། ཀྲུའུ་ཞི་ཞི་ཅིན་ཕིང་དང་ཙུང་ཐུང་ལུའུ་ལཱ་རྣམ་གཉིས་དབར་ཕྱོགས་གཉིས་པོའི་འབྲེལ་བའི་འབྱུང་འགྱུར་འཕེལ་རྒྱས་ཐད་འཐབ་ཇུས་ཀྱི་ཐུན་མོང་ངོས་འཛིན་གསར་པ་བྱུང་ཡོད། གལ་ཆེ་ཤོས་ནི་རྒྱལ་ཁབ་གཉིས་པོའི་གཙོ་བདག་གིས་ཐུན་མོང་ཐོག་པར་ཀྲུང་གི་ཕྱོགས་གཉིས་པོའི་འབྲེལ་བ་དེ་ལག་གདང་སྦྲེལ་ནས་དེ་བས་དྲང་གཞག་གི་འཛམ་གླིང་དང་དེ་བས་རྒྱུན་མཐུད་ཐུབ་པའི་གོ་ལ་ཞིག་སྐྲུན་པའི་པར་ཀྲུང་གི་ལས་དབང་གཅིག་མཐུན་ཚོགས་པར་རིམ་སྤོར་བྱ་རྒྱུ་དང་ཆབས་ཅིག “རྒྱུད་གཅིག་ལམ་གཅིག”མཉམ་སྐྲུན་གྱི་གྲོས་འགོ་དེ་པར་ཙིར་གྱི་འཕེལ་རྒྱས་འཐབ་ཇུས་དང་འབྲེལ་མཐུད་བྱ་རྒྱུའི་ཐུགས་ཐག་བཅད་གནང་བ་རེད། ཀྲུའུ་ཞི་ཞི་ཅིན་ཕིང་གིས་གྲུབ་འབྲས་ཐོབ་པའི་ངང་འཚམས་འདྲི་གནང་རྗེས། ལས་རོགས་དང་གྲོགས་པོ་ཚོ་དང་སྤེལ་རེས་བྱེད་རིམ་བཞིན་ང་ཚོས་ད་ཐེངས་ཀྱི་འཚམས་འདྲིའི་ཤུགས་རྐྱེན་ཟབ་མོ་ཚོར་བྱུང་། ད་ཐེངས་ཀྱི་འཚམས་འདྲི་ནི་པར་ཀྲུང་གི་འབྲེལ་བའི་ལོ་རྒྱུས་ཐོག་གི་ལམ་ཚད་རྡོ་རིང་གལ་ཆེན་ཞིག་ཡིན་པ་དེ་ཐོག་ནས་རྒྱལ་ཁབ་གཉིས་པོས་ཚོང་དོན་དང་། དངུལ་རྩ། ཚན་རྩལ། རྨང་གཞིའི་སྒྲིག་བཀོད། ཁོར་ཡུག་སྲུང་སྐྱོང་སོགས་ཁྱབ་ཁོངས་སུ་མཉམ་ལས་སྔར་བས་ཟབ་ཏུ་འགྲོ་རྒྱུ་ཡིན་པ་མ་ཟད། རྒྱལ་ཁབ་གཉིས་པོའི་མཛའ་གྲོགས་ཀྱི་དཔལ་འབར་མི་རབས་ནས་མི་རབས་བར་རྒྱུན་འཛིན་ཐུབ་རྒྱུ་ཡིན་པ་མཚོན་ཡོད།

པར་ཀྲུང་མཛའ་གྲོགས་མཐུན་ཚོགས་ཀྱི་ཀྲུའུ་ཞི་ཡིན་པའི་ངས་ཐོག་མཐའ་བར་གསུམ་དུ་པར་ཀྲུང་རྒྱལ་ཁབ་གཉིས་པོའི་རིག་གནས་དང་། དཔལ་འབྱོར། སྤྱི་ཚོགས་བཅས་ཀྱི་ཁྱབ་ཁོངས་ཁག་གི་མཉམ་ལས་གཏིང་ཟབ་ལ་སྐུལ་འདེད་ཧུར་ཐག་གཏོང་གི་ཡོད། འདི་ལོའི་ཟླ་10པར་ང་རང་པེ་ཅིང་མི་དམངས་ཚོགས་ཁང་ཆེན་མོར་ཀྲུང་གོ་རྒྱལ་སྤྱིའི་མཛའ་གྲོགས་ཚོགས་ཆེན་དང་ཀྲུང་གོ་མི་དམངས་ཕྱི་ཕྱོགས་མཛའ་གྲོགས་མཐུན་ཚོགས་བཙུགས་ནས་ལོ་70འཁོར་བའི་དྲན་གསོའི་བྱེད་སྒོར་ཞུགས་པ་མ་ཟད། ས་གནས་ས་ཐོག་ཏུ་ཀྲུའུ་ཞི་ཞི་ཅིན་ཕིང་གིས་དྲན་གསོའི་བྱེད་སྒོར་ཞུགས་མཁན་ཕྱི་ཕྱོགས་ཀྱི་སྐུ་མགྲོན་དང་མཇལ་འཛོམས་གནང་སྐབས་ཀྱི་གསུང་བཤད་ཉན་པ་ཡིན། ཀྲུའུ་ཞི་ཞི་ཅིན་ཕིང་གིས་མི་དམངས་དབར་གྱི་མཛའ་གྲོགས་ནི་རྒྱལ་སྤྱིའི་འབྲེལ་བ་བརྟན་བགྲོད་རྒྱང་འཁྱོལ་གྱི་རྨང་གཞི་དང་། འཛམ་གླིང་ཞི་བདེ་དང་འཕེལ་རྒྱས་ལ་སྐུལ་འདེད་གཏོང་བའི་རྫོགས་མེད་སྒུལ་ཤུགས། མཉམ་ལས་གཉིས་ཕན་མངོན་འགྱུར་བྱེད་པའི་གཞི་རྩའི་སྔོན་འགྲོའི་ཆ་རྐྱེན་བཅས་རེད་ཅེས་གསུངས་སོང་། མི་སེམས་ལ་དྲོ་སྐྱིད་སྦྱིན་པའི་བཀའ་མོལ་དེ་དག་ལས་ངས་ཀྲུའུ་ཞི་ཞི་ཅིན་ཕིང་གི་ཁྱད་འཕཌ་བློ་གྲོས་དང་འགོ་ཁྲིད་འཇོན་ཐང་ཚོར་བྱུང་།

རང་ཉིད་ནས་ཀྲུང་གོར་འཚམས་འདྲི་ཐེངས་མང་བྱེད་མྱོང་ཡོད། ཀྲུང་གོ་མི་དམངས་ཀྱི་མཛའ་གྲོགས་སྤྲོ་སེམས་དང་། ཀྲུང་གོའི་སྔོན་ཐོན་གྱི་ཚན་རྩལ་གསར་གཏོད་གྲུབ་འབྲས། དེ་བཞིན་ལྗང་མདོག་འཕེལ་རྒྱས་ཀྱི་གྲུབ་འབྲས་བཅས་ཚང་མས་ང་ལ་བག་ཆགས་ཟབ་མོ་བཞག་བྱུང་། ཀྲུང་གོའི་གྲོགས་པོས་པར་ཙིར་གྱི་རིག་གནས་ལ་ཧ་ཅང་དགའ་པོ་བྱེད་པ་དང་རྒྱལ་ཁབ་གཉིས་པོའི་འབྲེལ་བར་གཅེས་སྤྲས་བྱེད་པ་ནི་ངས་བརྗེད་མི་སྲིད། ངས་བལྟས་ན། ཕྱོགས་གཉིས་དབར་སྤེལ་རེས་བྱ་རྒྱུ་ནི་གལ་འགངས་ཧ་ཅང་ཆེ་བ་ཞིག་རེད། དེ་ལས་རྒྱལ་ཁབ་གཉིས་པོའི་དམངས་ཚོགས་ཀྱི་མཐོང་རྒྱ་ཆེ་རུ་དང་ཕན་ཚུན་དགེ་ལེན་སྐྱོན་སེལ་ཐུབ་ནས་གཉིས་ཁེ་གཉིས་ཕན་དང་ཐུན་མོང་འཕེལ་རྒྱས་ལ་གོ་སྐབས་བསྐྲུན་ཐུབ་ངེས་རེད།