འདི་ག་ཚགས་པར་ཁང་དུ་པེ་ཅིང་ནས་ཟླ་12ཚེས་25ཉིན་གློག་འཕྲིན་འབྱོར་གསལ། གསར་འགོད་པར་2025ལོའི་པེ་ཅིང་དང་། ཐེན་ཅིན། ཧོ་པེ་བཅས་ཀྱིས་དཔྱིད་གསར་དུས་ཆེན་བསུ་བའི་རིག་གནས་ཡུལ་སྐོར་གྱི་བྱེད་སྒོའི་གསར་འགྱུར་ཡོངས་བསྒྲགས་ཚོགས་འདུ་ནས་ཤེས་རྟོགས་བྱུང་བར། 2025ལོའི་གནམ་ལོ་གསར་ཚེས་དང་དཔྱིད་གསར་དུས་ཆེན་འཆར་ཉེར་ཡོད་པའི་སྐབས་སུ། ས་གནས་གསུམ་གྱི་རིག་གནས་མཐུན་སྦྱོར་འཕེལ་རྒྱས་ལ་སྐུལ་འདེད་གཏོང་བ་དང་མི་དམངས་མང་ཚོགས་ཀྱི་དུས་ཆེན་རིག་གནས་འཚོ་བའི་དགོས་མཁོ་སྔར་ལས་ལེགས་པར་སྐོང་ཆེད། པེ་ཅིང་དང་། ཐེན་ཅིན། ཧོ་པེ་བཅས་ས་ཁུལ་གསུམ་གྱི་ཏང་ཨུད་དྲིལ་བསྒྲགས་པུའུ་ཡིས་རིག་གནས་ཡུལ་སྐོར་དང་། རིག་དངོས། རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས། རླུང་འཕྲིན་བརྙན་འཕྲིན་སོགས་འབྲེལ་ཡོད་སྡེ་ཚན་དང་མཉམ་དུ་ཇུས་འགོད་དང་སྒྲིག་འཛུགས་བྱས་ནས། “ཅིང་ཅིན་ཅིས་གསུམ་སེམས་མཐུན་གྱིས། དགའ་སྤྲོའི་ངང་ནས་ལོ་གསར་གཏོང”ཞེས་པ་བརྗོད་དོན་གཙོ་བོར་བྱས་ཏེ་མཉམ་དུ“2025ལོའི་པེ་ཅིང་དང་། ཐེན་ཅིན། ཧོ་པེ་བཅས་གསུམ་གྱིས་དཔྱིད་གསར་དུས་ཆེན་བསུ་བའི་རིག་གནས་ཡུལ་སྐོར་གྱི་རིམ་སྤེལ་བྱེད་སྒོ”སྤེལ་རྒྱུ་ཡིན་པ་རེད།

ཤེས་རྟོགས་བྱུང་བར་གཞིགས་ན། རིག་གནས་ཡུལ་སྐོར་གྱི་རིམ་སྤེལ་བྱེད་སྒོའི་ནང་པེ་ཅིང་དང་། ཐེན་ཅིན། ཧོ་པེ་བཅས་ས་ཁུལ་གསུམ་གྱི་ལོ་གསར་བསུ་བའི་དཔྱིད་གསར་དུས་ཆེན་གྱི་མཉམ་འཛོམས་བྱེད་སྒོ་དང་། ཚོགས་མཆོད་ལ་མཉམ་རོལ་གྱི་རིམ་སྤེལ་བྱེད་སྒོ། གངས་འཁྱགས་ལ་དགའ་རོལ་གྱི་རིམ་སྤེལ་བྱེད་སྒོ། ལོ་རྒྱུས་རིག་གནས་ཀྱི་བརྗོད་དོན་གཙོ་བོ་སྐོར་བའི་རིམ་སྤེལ་བྱེད་སྒོ། རྟེན་མཛོད་ཁང་དུ་ལོ་གསར་གཏོང་བའི་རིམ་སྤེལ་བྱེད་སྒོ། མང་ཚོགས་ཀྱིས་ལོ་གསར་གཏོང་བའི་རིམ་སྤེལ་བྱེད་སྒོ་བཅས་ཁག་དྲུག་ཚུད་ཡོད་པ་རེད། ཟླ་12ཚེས་31ཉིན་གྱི་དགོང་མོར། པེ་ཅིང་དང་། ཐེན་ཅིན། ཧོ་པེ་བཅས་གསུམ་གྱིས་མཉམ་དུ་མང་ཚོགས་ཀྱིས་ལོ་གསར་བསུ་བའི་ལྡོག་རྩིས་བྱེད་སྒོ་སྤེལ་རྒྱུ་ཡིན་པ་དང་། ཚོགས་ར་གཙོ་བོ་པེ་ཅིང་ཧྲོའུ་ཀང་གླིང་དང་། ཐེན་ཅིན་ནན་ཁའེ་ཆུས་ཀུའུ་ལོའུ་ཐང་ཆེན། ཧོ་པེ་ཧྲི་ཅ་ཀྲོང་ཀྲེང་ཏིང་གནའ་གྲོང་བཅས་སོ་སོར་བཀོད་སྒྲིག་བྱས་ཏེ་ས་ཁུལ་གསུམ་གྱི་མང་ཚོགས་ཀྱིས་དྲ་ལམ་ནས་མཉམ་དུ་ལོ་གསར་བསུ་རྒྱུ་རེད། དེ་དང་ཆབས་ཅིག་པེ་ཅིང་དང་། ཐེན་ཅིན། ཧོ་པེ་བཅས་ཀྱིས་མཉམ་འབྲེལ་ཐོག་དཔྱིད་གསར་དུས་ཆེན་གྱི་མཉམ་སྤྲོའི་མཚན་ཚོགས་ཐོག་མར་ཕབ་བཟོ་བྱས་ནས་མི་རྣམས་ལ་དཔྱིད་གསར་དུས་ཆེན་གྱི་རིག་གནས་ཀྱི་གསོལ་སྟོན་ཕུན་སུམ་ཚོགས་པ་ཞིག་བཤམ་རྒྱུ་རེད།

(པ་སངས་ཕན་ཐོགས་ཀྱིས་བསྒྱུར། གནམ་ཕྱུག་རྒྱལ་དང་པ་ཕན་གྱིས་ཞུས)